SUIGA TETELE I LE OFISA O AOGA

E tele ni suiga ma fuafuaga faataoto na faailoa e le Faatonusili o le Matagaluega o Aoga a le malo i luma o le Komiti o Aoga a le maota o sui, o le a faia mo le manuia o le tautua a le matagaluega i totonu o le atunuu.

O ni isi o ia suiga ma fuafuaga faataoto e pei ona saunoa Vaitinasa Dr. Salu Hunkin-Finau e aofia ai le faatulagaina lea o ta’iala i le va feagai o faiaoga ma fanau aoga, faapea ai fuafuaga mo le siitia lea o totogi o faigaluega.

I le tulaga i totogi o faiaoga, na taua ai e le tamaitai faatonusili e faapea, o le totogi amata mo faiaoga i le malo tele o Amerika o lo o umia le tikeri mo le fa tausaga e $30,000 i le tausaga, ae mo Amerika Samoa nei, e $16,000 i le tausaga o lo o totogi ai faiaoga o lo o umia faailoga e pei ona taua.

Ina ua fesiligia e le komiti, na taua ai e Vaitinasa e faapea, o le ata faataoto mo le siitaga i totogi o faiaoga ua fuafuaina, o le a aofia ai le $25,000 i le tausaga mo faiaoga e pei ona taua. Sa ia taua foi e faapea, o faiaoga o lo o umia faailoga BA, o le toatele o i latou sa faauu mai i Iunivesite tetele i le malo tele, o a latou faailoga foi o lo o laina tutusa ma faailoga o lo o umia e isi faiaoga o lo o galulue i Hawaii ma Amerika.

Na fesili le afioga i le faipule ia Vui Florence Vaili Saulo i le tamaitai faatonu, pe i ai se faiga faavae a le Ofisa o Aoga e mafai ai ona taofi faiaoga o lo o umia faailoga maualuluga ina ia fai ma faiaoga i totonu o potu aoga, nai lo le tau o solo e saili ni a latou galuega, ae na faamanino e le faatonu e faapea, e ui e le o i ai se aiaiga faapea a le ofisa o aoga o i ai, ae o lo o mafai lava ona faia se maliliega i le va o le ofisa ma le faiaoga ina ia toe foi atu e avea ma faiaoga mo sina taimi.

I le tulaga o taiala i le va feagai o le faiaoga ma fanau aoga, ua faatulaga ai aiaiga talafeagai i le va o le faiaoga ma fanau aoga, ina ia maua le faaaloalo, saogalemu ma le fiafia i le va o fanau aoga ma faiaoga.

MANA’OMIA NI ATINA’E E FAAAOGA I AI FANUA I MANU’A O LO O LISI ATU MALO

Ua talosagaina e le alii faipule ia Vaetasi Tuumolimoli Saena Moliga le Faatonusili o Faatoaga ia Lealao Melilo Purcell ina ia silasila i ni isi atina’e e faaaoga ia i fanua o Manu’a lea o lo o lisi atu i le Ofisa o faatoaga, ona e tele  naua se vaega o lea fanua e le o faaaogaina i le taimi nei.

O le finagalo o le alii faipule sa tuuina atu lea i le taimi na iloilo ai e le komiti o le Faagaioiga o le malo tofiga a le kovana mo le tofa a Lealao e avea ai ma faatonusils o le Ofisa o Faatoaga.

Na taua e Vaetasi e faapea, o se tulaga lelei pe afai ae toe faaopoopo tagata faigaluega a le Ofisa o Faatoaga i Manu’a, e galulue i le fa’ato’aina o eleele o lo o lisi atu i le malo.

Ae na talosaga le alii faipule mai le itumalo o Manu’a #1 ia Fetu Fetui Jr i le alii faatonu, ina ia silasila toto’a i ni atina’e lelei mo tagata Manu’a. Na faailoa e Fetu ia Lealao e faapea, e leai ma se mea sa ia faia mo Manu’a i le lua tausaga lea na tofia ai o ia e kovana Togiola e nofoia le nofoa faatonusili, ma ua i ai lona talitonuga atonu o le a maua se fesoasoani mo lona itumalo ina ua toe tofia e kovana Lolo o ia e fai ma faatonu.

Sa ia talosaga i le alii faatonu ina ia silasila i se siitaga o totogi o tagata faigaluega a le Ofisa o Faatoaga i Manu’a, lea ua silia i le ta’i 20 tausaga o galulue ni isi o i latou peitai o lo o maualalo lava o latou totogi.

Na fautuaina e le alii faipule ia Maugaoalii Leapai Tusipa Anoai le alii faatonusili, ina ia vaavaai i le faafitauli lea ua ia maitauina i le maketi i Fagatogo, o le mananao lea o tagata e tatala i aso Sa, ma o se suiga e le’i masani mai ai le afioga.

Saunoa Maugaoalii e faapea, afai e finagalo le aufai faatoaga e tatala le maketi i le aso Sa, e lelei pe a tatala i le 12:00 i le po, o le taimi lea ua maea ai tapuaiga a le afioaga, nai lo le faalavelave o a latou gaioiga i taimi o tapuaiga i le aso Sa.

O le alii faipule ia Vaamua Henry Sesepasa na fesiligia le atina’e koko Samoa lea ua toatele aiga ua faamanuiaina ai, pe faapefea ona auina atu i fafo le fua o le koko pe afai ae matua.

Na faamanino e Lealao e faapea, o le atina’e i le totoina o le koko lea ua toatele aiga ua faamanuiaina ai, o le faamoemoe, afai ae fua le koko ma matua, e auina atu lava e le aiga a latou koko i pisinisi Amerika o lo o gaosi ai le sukalati, lea ua faailoa mai lo latou mananao i le fatu koko lea e maua i Samoa, ona e suamalie, e talafeagai foi mo le gaosiina o le sukalati.