MANAOMIA LE FAALELEIA O LE FALEAOGA I FAGAITUA

Ua talosagaina e le alii faipule ia Fatulegae’e Mauga le Komiti o Aoga a le maota o sui, ina ia silasila toto’a i le faafitauli o lo o feagai ma le aoga maualuga i Fagaitua, o le vevela lea o totonu o potu aoga e mafua mai e le o ola le ea malulu.

O popolega o le alii faipule, afai ae faaumiumi pea lea faaletonu, e ono avea lea ma itu e aafia ai se soifua o se tamaititi aoga poo se faiaoga fo’i, ona o le vevela o totonu o potu aoga.

O lana saunoaga, afai e lelei vaega e aoaoina ai fanau a le atunuu, e le gata e i’u manuia i latou ae ola fiafia fo’i.

AMATA FAATULAGA ILOILOGA FONO MO TOFIGA KOVANA

O le vaiaso nei lea ua toe amata faatulaga ai iloiloga a le Senate ma le Maota o Sui, mo le iloiloina lea o tofiga a le kovana sili ua maea ona tuuina atu i luma o le Fono.

O ananafi na amata ai iloiloga a le Senate mo le susuga ia Douglas Fiaui e avea ma Loia Fautua mo tagata lautele, sosoo ai loa ma le iloiloga i le taeao nei mo le alii foma’i ia Mataupu Peter Tinitali e avea ma Faatonusili o le Ofisa e puipuia aia o i latou e aafia i le gasegase o le mafaufau, ae o le iloiloga mo le afioga ia Fagafaga Daniel Langkilde e avea ai ma Faatonu o le KVZK-TV ua faatulaga mo le aso Gafua o le vaiaso fou.

I le toe tauaofia ai o le Fono i le vaiaso nei, ua fautuaina ai e taitai o maota e lua taitaifono o komiti o lo o gafa ma iloiloga nei, ina ia ave la latou faamuamua i le iloiloina o tofiga a le kovana, ina ia mautinoa e vave fai i ai faaiuga a le Fono.

Sa fautuaina foi e le alii peresetene o le senate ia Gaoteote Palaie Tofau le taitaifono o le Komiti o le Falema’i, ina ia vave faatulaga se iloiloga mo le faamaoniaina o totino o le Komiti Faafoe fou a le falema’i lea ua maea ona tofia e le kovana, ona o lea ua galulue i latou nei ae le’i faamaoniaina.

I le maota o sui, o le aso Gafua o le vaiaso fou i le 8:30 i le taeao lea ua faatulaga ai le iloiiloga a le Komiti o Tulafono a le maota, mo le pili e faaopoopo ai le aofa’i o totino o le Komiti Faafoe a le Ofisa o Femalagaaiga, mai le to’a 5 i le to’a 9, ao le itula e 11:00 i le taeao lava lea e iloilo ai e le komiti lava lea tofiga a le kovana mo i latou ua filifilia i totonu o le komiti faafoe.

O le afioga i le tamaitai faipule ia Vui Florence Vaili Saulo o le a faatautaia le iloiloga, o ia fo’i lea o le taitaifono o le komiti.

O le aso Lua e sosoo ai o le vaiaso fou, o le a faataunuu ai le iloiloga a le komiti o le Faagaioiga o le malo, mo le fesiligia lea o tofiga a le alii kovana mo le alii foma’i ia Dr. Tinitali, lea ua tofia e avea ma faatonusili o le Ofisa e puipuia aia tatau o i latou e aafia i le gasegase o le mafaufau.

MALAE TAALO MO FAGATOGO

Ua i luma o le maota o sui se iugafono na faaulufaleina e le afioga i le alii faipule ia Maugaoalii Leapasi Tusipa Anoa’i o le afioaga o Fagatogo, e talosagaina ai ma le faaaloalo le alii kovana, ina ia faatonu le faatonusili o Paka ma Malaetaalo, ina ia toe fuafua ma faamaea le fausiaina o le malae paseketipolo/volipolo mo tupulaga o Fagatogo.

I se vaega o le iugafono o lo o taua ai e faapea, talu ona maea le fausiaina o le Fagatogo Square i le 30 tausaga ua mavae, e lei toe vaaia lava ni isi atina’e o toe fausia i Fagatogo, ma ua atagia mai ai le aga’i ina faatuatuana’i Fagatogo i le fausiaina lea o atina’e ma nofoaga lelei mo ona tupulaga.

O le tupe e $87,000 o Foa’i mo Poloka Fa’alaua’itele sa fuafuaina mo lenei galuega, ua talosagaina e le alii faipule ina ia faaaoga lea tupe e fausia ai loa malae taaalo e pei ona taua.

Na taua e le alii faipule e faapea, o le toatele o tupulaga o le atunuu, ua afaina i le tino puputa e mafua mai ona o le le lava o le faamalositino, ae afai ae fausia malae taalo e pei ona talosagaina, o le a avea lea ma sao taua mo le soifua maloloina o tupulaga i le atunuu.