Ads by Google Ads by Google

Tala otooto mai le Fono Faitulafono

‘MANA’OMIA MANU’A NI FALEAOGA LELEI’

 

O tulaga faaletonu o lo o feagai ma aoga i Manu’a i le taimi nei, na mafua ai ona faaleo e le alii faipule ia Toeaina Faufano Autele sana talosaga i luma o le maota o sui i le taeao ananafi, ua manaomia e Manu’a ni faleaoga lelei e aoao ai fanau aoga.

 

E le gata i faleaoga, ae faapea foi polokalame o lo o agavaa ai fanau aoga i Tutuila ma Aunuu e pei o le polokalame lea e faamasani ai fanau aoga i galuega pe a oo i le vaitaimi e tuua ai aoga.

 

Na taua e Toeaina e faapea, o ni isi o faaletonu o lo o feagai ma aoga i Manu’a, e fai atu le aoga i le isi itu ae taufetuli ane mogamoga (tulou) i le isi itu o le potu aoga, a oo foi ina fai vasega a le isi faiaoga, e lagona uma mai e le vasega a le isi faiaoga, e mafua mai lea tulaga ona o le fausaga o fale o lo o faaaoga e fai ai aoga, e fau i fausaga o fale Samoa.

 

O le talosaga a le alii faipule, afai e maua se vaega tupe mai le poloakalame a le CIP (Capital Improvement Project) lea e faatupe mai e le feterale e fausia ai ia lelei faleaoga i Manu’a, o le a lelei ma manuia lumanai o fanau aoga i Manu’a.

 

PILI E FAAOPOOPO AI TOTINO KOMITI TAUSI MAVAEGA MO TUPE LITAEA

 

Ua i luma nei o le fono se pili mo se tulafono taufaaofi, e suia ai le aofai o totino o le Komiti Faafoe a le Ofisa o Femalagaaiga mai le to’a 5 o lo o i ai i le to’a 9 e pei ona taua i le suiga o le tulafono.

 

O i latou o le a tofia e avea ma totino o le komiti, e tofia e le kovana ma faamaonia e le fono faitulafono, ma ia le silia ma le to’a 5 o i latou nei o ni Nesionale poo sitiseni o le Iunaite Setete na tupuaga mai i Amerika Samoa.

 

O le agaga o suiga i le tulafono, e manuia galuega a le komiti faafoe o le vaega o femalagaaiga, pe afai ae faaopoopo le aofai o ona totino, aua o le a faalautele ai le tomai ma le agavaa o sui o le a auai mo le faia o faaiuga tatau.

 

O le komiti faafoe o le a tofia nei, e ta’i 5 tausaga e tautua ai ae le silia i le ta’i 2 nofoaiga soso’o. E toa 5 sui e maua ai le kalama e mafai ona palota le komiti mo le faia o sana faaiuga. O lenei tulafono o le a taualoa i totonu o le 60 aso talu ona mae’a le tauaofiaga na pasia ai le suiga o le tulafono.

 

O le vaiaso fou lea ua faatulaga e amata ai iloiloga a le fono e faatatau i mataupu nei.

 

‘FA’AAOGA PEA E FANAU AOGA SUAVAI A LE ASPA’

 

Na taua e le alii faipule ia Taotasi Archie Soliai sona popolega o lo o i ai, i le faaauauina pea lea ona faaaoga e ni isi o fanau aoga o aoga i totonu o lona itumalo le suavai a le ASPA, e ui o lo o i ai le lapataiga e faapupuna muamua ai le suavai ona faatoa saogalemu lea i le taumafa.

 

Na taua e le alii faipule mai le itumalo o Ituau i luma o le maota o sui ananafi e faapea, sa faia sana asiasiga i aoga i totonu o lona itumalo ma ia maitauina ai le tulaga e pei ona ia taua.

 

O lona popolega, ina nei i ai ni isi o fanau aoga e aafia i ni faama’i e mafua mai o le suavai o lo o latou feinu ai, e le gata i aoga a lona itumalo ae faapena foi i aoga uma i le atunuu.

 

O le masina na te’a nei na tuuina mai ai e le Faalapotopotoga o le Eletise ma le Suavai sa latou faasilasilaga, e lapataia ai ni isi o le atunuu i le itu i Sisifo ina ia faapupuna muamua le suavai ona faatoa taumafa lea, ona ua faamaonia i suesuega le aafia o le suavai o lo o pamu mai i le manava o le eleele, ona o siama e mafua atu i vaivai o lo o to’a i luga o le eleele.

 

TULAFONO FAAOPOOPO AI TOTINO KOMITI FAAFOE OFISA FEMALAGAAIGA

 

Ua i luma o le Senate se pili mo se tulafono e suia ai le aofai o tagata tausi mavaega mo le Tupe o le Litaea, mai le to’a 5 o lo o i ai i le 9 e pei ona moomia i le suiga o le tulafono.

 

I le faatomuga o lenei tulafono taufaaofi o lo o taua ai e faapea, o le faaopoopo o le aofai o totino o tagata tausi mavaega, o le a atili manuia ai galuega a le vaega o le litaea a le malo.

 

O sui foi e toa 9 o le a tofia, ia i ai ni tagata ia le itiiti ifo i le toatolu e i ai le tomai masani i mea tau pisinisi mai le vaega o pisinisi tua.

 

O lenei pili ua taoto atu i le komiti o le Litaea a le Senate mo sa latou faaiuga, ma ua faatulaga ai le taeao o le aso Tofi e faia ai le iloiloga o lenei mataupu.