Ads by Google Ads by Google

Tala otooto mai le Fono Faitulafono

MALOLO LE FONO MO LE LUA VAIASO

O le aso lea ua faamoemoe e amata ai le malologa a le Fono Faitulafono mo le umi e 2 vaiaso, ona o le manatu e sefe aso fono ina ia lava se taimi e iloilo ai le Paketi a le malo mo le Tausaga Tupe fou 2013 lea ua fuafua le fono e iloilo i se taimi o le masina nei.

Na faailoa e taitai o maota e lua i le taeao ananafi i le taimi o a laua tauaofiaga, ua tasi moemoe le finagalo o taitai o maota ina ia malolo le fono mo le lua vaiaso, ona toe a’e mai lea i le aso Gafua, aso 30 Iulai.

O le taeao nei lea ua faamoemoe e fofogaina ai i luma o maota e lua se iugafono e aloaia ai le faamaloloina o galuega a le fono.

FAASEA FONO FAALETONU MOLI MA AUALA

E le fou le mataupu e uiga i faaletonu i moli ma omoomo o auala i luma o le fono i soo se taimi e tauaofia ai.

O le taeao ananafi na faaleo ai e nisi o faipule ma Senatoa le manatu lava lea e tasi, ona ua maitauina se faaletonu i le pepe lea o nisi o moli i luga o le alatele, aemaise ai o le tele o omoomo i vaega eseese o le auala.

Saunoa le alii faipule ia Tuuamolimoli Saena Moliga e faapea, o moli i le itumalo o le Maoputasi ua maitauina le faaletonu, e manaomia le fesiligia o le Faatonu o Galuega pe ua i ai se fuafuaga mo le toe faaleleia o moli nei.

I luma o le Senate, sa fesiligia ai foi e nisi o Senatoa le tulaga faaletonu i auala ma talosagaina ai se iloiloga a le maota ma le komiti o Galuega, ina ia fesiligia ai le Faatonu e uiga i lenei mataupu, peitai na saunoa le alii Senatoa ia Fuamatu J.V Fuamatu, ua amata ona faagasolo galuega mo le fausiaina o taligalu i le itumalo o Fofo, ma e i ai lona talitonuga o le a sosoo atu ai lava ma le fausiaina o le alalaupapa i Leone, lea sa faaleagaina i le galulolo.

O le tatalo a le alii Senatoa, talosia ae faaauau atu ai lava ma le fausiaina o taligalu i lona itumalo o Alataua, ona ua leva ona taoto le talosaga, ua maitauina foi le malolosi o galu ua faaleagaina ai tatafatafa o le alatele.

SAUNI LE ILOILOGA FAIPULE MO LE FALEMA’I

Ua sauni le komiti o le Soifua Maloloina a le maota o sui e faatulaga sana iloiloga mo le mataupu e uiga i le falema’i, ona ua tele i ai manatu ma faasea a le atunuu, atoa ai ma le taumafai lava e saili se fofo o le faafitauli o loo tulai mai.

Saunoa le afioga i le alii taitaifono ia Puleleiite Tufele Jr, o le a taumafai le komiti e faatulaga ana iloiloga mo le mataupu i le falemai, ina ia mafai ai ona maua se fofo o le faafitauli, aemaise ai o lea ua tele faasea ma ua tuuaia foi le fono i le le faia o sa latou galuega e uiga i lenei mataupu.

O nisi o faasea o loo faia faasaga i le fono o loo afua mai lea i le atunuu faapea ai ma le alii kovana, i le leai lea o se galuega a le fono o faia i pili tupe na aumai e le kovana e fesoasoani ai i le falemai, lea ua i’u ai i le sii o pili a le falemai.

E tasi le pili tupe a le kovana na pasia e le fono mo le falemai, o le pili lea e faasoasoa atu ai le $3 miliona mo le falemai, peitai o le isi pili tupe lea na pasia e le maota o sui e faasoasoa atu ai le $2 miliona mo le falemai, na teena e le Senate.

O isi pili tupe e pei o lafoga i oloa sa fuafua mo le falemai, e le o faia i ai se faaiuga a le fono faitulafono.