Pasia Senate Pili Tupe e faasoa atu ai silia $4 miliona mo le LBJ

E tolu pili tupe na pasia e le Senate i le taeao ananafi, e fa’asoasoa atu ai le aofaiga e silia ma le $4 miliona, e fesoasoani ai i le faafitauli tau tupe lea o lo o feagai ma le LBJ i le taimi nei.

O ia pili tupe e tolu a le Senate e aofia ai le $3 miliona e fa’atupe mai i Teugatupe mo Taui o Tagata Faigaluega, o le $1.6 miliona o lo o fuafua e fa’atupe mai i Tupe Totoe o le Tausaga Tupe 2011, ma le $253,000 o lo o fuafua e fa’atupe mai i Tupe o lo o fuafua le malo e maua mai i le tausaga tupe 2012.

O le palota e 13-0 na pasia ai e le Senate a latou pili tupe nei e tolu, ma ua faamoemoe o le taeao nei o le a tuuina atu ai i luma o le Maota o Sui mo sa latou faaiuga.

Mo le $3 miliona, na saunoa le peresetene o le Senate, ia Gaoteote Palaie Tofau, o lo o i ai i totonu o Teugatupe o Taui mo Tagata Faigaluega le aofaiga e $4 miliona, ae o lo o i ai le talitonuga o le Fono, o lo o tupu pea lea tupe i masina taitasi, ona o lo o totogi atu i ai e le malo le $100,000 i masina taitasi.

Mo le $1.6 miliona, ua fuafua lona vaevaega i le tu’uina atu o le  $800,000 e faagaioi ai le falemai o le LBJ, ae o le isi $800,000 o le a tu’uina atu e fa’afetaui ai e le falemai tupe fesoasoani mai le FEMA, e fesoasoani ai i galuega toe faaleleia mo mea sa faaleagaina i le galulolo.

E talitonu le Senate, e tatau i le falemai ona ave lana faamuamua i le tausia lelei lea o le soifua maloloina o tagata Amerika Samoa, peitai o le tulai mai o le faafitauli tau tupe e pei ona pagatia ai gaioiga a le falemai, ua manatu ai le Senate ua tatau ona vave faia se gaioiga ina ia foia ai lenei faafitauli.

O atugaluga o nisi o Senatoa e pei ona tulai mai i lenei mataupu, o le ono teena lea e le kovana o pili tupe ua latou pasia, peitai na saunoa Gaoteote, e le taua ia te ia le teena e le alii kovana o pili tupe a le fono, tasi le itu e taua i lona manatu, o loo fai galuega a le Fono e saili ai se fofo i le faafitauli o loo tulai mai.

Ina ua saunoa Togiola Tulafono i le tatalaina o le Fono i le vaiaso na tea nei, sa ia talosagaina ai taitai o le fono ina ia toe silasilia toto’a i pili tupe ia sa tuuina mai muamua i le tausaga na tea nei, e fesoasoani ai i manaoga tau tupe a le malo, ina ia vave fai i ai sa latou faaiuga, ona o isi ia pili tupe o loo fuafua e maua atu ai ma se fesoasoani mo le falemai.

O nisi o ia pili tupe e aofia ai pili e faaee ai lafoga i luga o oloa mai fafo e pei o le ava malosi, pia ma le sikaleti, o le pili e sii ai totogi o laisene o pisinisi, atoa ai ma le isi pili tupe e totogi ai e pisinisi uma lava le tai $2,000 i le tausaga.

Ao lei tatalaina le Tauaofiaga lona tolu o le nofoaiga lona 32 a le Fono Faitulafono, ua uma ona tuuina atu e le alii kovana sana tusi i taitai o le fono na te teena ai pili tupe mo le falemai ia ua pasia e le Senate, peitai na saunoa Gaoteote, o le talitonuga o le Fono, e le manaomia le toe faaeeina atu o se isi lafoga i luga o le atunuu.

E toa 14 afioga  i Senatoa na auai i le tauaofiaga a le maota maualuga ananafi, o i latou foi ia sa palota ioe mo le pasiaina o nei pili tupe.

O i latou ia e aofia ai Galeai Tuufuli, Letalu Maui, Fuata Iatala, Velega Savali Jr, Lemanu P. Mauga, Asuega Faamamata, Mauga Asuega, Tulifua T. L. Yuen, Avegalio Aigamaua, Fonoti Aufata, Lualemana Faoa, Fuamatu J. Fuamatu ma le alii peresetene ia Gaoteote Palaie Tofau.