Ads by Google Ads by Google

Tala otooto mai le Faamasinoga

MOLIA SE ALI’I AVE TAXI I LE FA’ATUPU VEVESI

O le po o le Aso Lulu na te’a nei na taofia ai e leoleo i le toese i Tafuna se alii ave taxi, ona o se fa’alavelave ua molia ai o ia i le faaoolima i se tamaloa. O le taeao ananafi na tulai ai le alii ave taxi ia John Schuster i luma o le Faamasinoga Faaitumalo.

I faamaumauga a le faamasinoga o lo o taua ai e faapea, na valaau le toalua o le alii na a’afia, i le ofisa a leoleo mo se fesoasoani, ina ua tauai e Schuster le latou fale i ma’a toe fasi lona to’alua.

Na taua e le fafine i leoleo lona fefe ma popole i le saogalemu o lana fanau.

Na faamatala e  Aurthur Lam Yuen (o ia lea na a’afia) i leoleo e faapea, ina ua alu atu e fesili ia Schuster i le mafuaaga ua ia tauaia ai le latou fale i ma’a, ae una’i ese o ia e Schuster ma faaoolima ia te ia. Fai mai Lam Yuen, e faatolu ona tu’i e Schuster o ia.

Ina ua fesiligia e leoleo ia Schuster i le mafuaaga o le faalavelave, na ia ta’ua e faapea, o lona ita tele ina ua sosola le toalua o lona ‘niece’ ma le toalua muamua o Lam Yuen, na mafua ai ona alu e talanoa ia Lam Yuen, peitai sa le’i fia talanoa atu Lam Yuen ia te ia.

Na taua e leoleo le malosi o le manogi pia na sau ia Schuster, i le taimi na fesiligia ai o ia e uiga i lenei mataupu.

MAPU TOLO

O le aso 15 Novema lea ua faamoemoe e faataunuu ai le ulua’i iloiloga o le mataupu a le alii o Mapu Tolo, lea o lo o tuuaia i le moliaga mamafa e tasi o le ave taavale ‘ona, ua mafua ai ona oo manu’a i se isi tagata.

O lo o teena e Tolo le moliaga o lo o tuuaia ai o ia, ma o lo o tumau pea poloaiga o lo o tatala ai o ia i tua i le taimi nei, ao faagasolo ai lana mataupu i luma o le famasinoga.

FAILA MOLIAGA FAAOPOOPO FAASAGA TINA NA TIA’I LANA TAMA FAFO FALE

O le tina lea o lo o tuuaia i lona tia’i o lana tama e 3 tausaga e faatagi i fafo o le fale, a’o nofonofo i totonu o le fale ma le isi ana fanau, ua molia nei e le malo i moliaga mama e lua, o le faaoolima i le tulaga tolu atoa ai ma lona faia o ni gaioiga e ono lamatia ai le saogalemu o lana tama laititi.  Ma ua faaopoopo i ai ma le moliaga o le faatupu vevesi i nofoaga faitele.

O le vaiaso na tea nei na tulai mai ai lenei faalavelave, ina ua logo e ni aiga tuaoi i leoleo se tamaititi o lo o tagi i fafo o le latou fale, ae o lo o ee atu i ai lona tina e soia le tagi, manu e lei alu atu e sasa o ia.

I faamaumauga a le faamasinoga o lo o taua ai, ina ua fesiligia e leoleo le ua molia po o sana tama lea sa faatagi i fafo o le fale, na tali le ua molia, e le o sana tama.

Fai mai foi faamaumauga a le faamasinoga, sa vaaia e leoleo foliga faasua’ava o lea tina talavou i le taimi na tupu ai le faalavelave.