Tala otooto mai le Fa'amasinoga Maualuga

IOE COLIN BODE I TU'UAIGA A LE MALO

 

Ua fa'ailoa nei i fa'amaumauga a le fa'amasinoga maualuga le nofosala o le susuga a Colin Bode i le moliaga mamafa o lona umia fa'asolitulafono o vaega o le laau fa'asaina o le mariuana, ma le fa'amoemoe e tulei pe fa'atau atu i isi tagata, ina ua talia e le fa'amasinoga maualuga se maliliega na sainia e le itu a le ua molia ma le malo i le vaiaso na te'a nei.

 

O le moliaga lea ua ta'usala ai Bode, na afua mai i le mataupu muamua lea na a'afia ai le ua molia, ina ua maua ia te ia ni vaega o le laau faasaina o le mariuana i le taimi na tu ai i le laina mo le tu'uina atu o lona tusi folau, ina ua fa'atoa taunu'u le va'alele a le Hawaiian Air, ae sosogi ai o ia e le ta'ifau a le Ofisa o Tiute o "Jordan", ma auina atu ai loa o ia i totonu o se tama'i potu mo le sailia o lona tino, ma maua ai ni taga pepa iila se lua i totonu o lona ofuvae sa fai o lo o i ai lau mamago o le mariuana.

 

Na ta'utino Code i se vaega o le maliliega e fa'apea, sa ia te ia vaega o le laau fa'asaina o le mariuana ina ua malaga mai i le va'alele o le Hawaiian Air ma le fa'amoemoe e malaga mai i Amerika Samoa nei.

 

O le mataupu lona lua e pei ona tu'uaia ai le ua molia e le malo, o lo o tu'uaia ai o ia i le isi fo'i moliaga mamafa o lona umia fa'asolitulafono o vaega o le pauta fa'asaina o le aisa, e mafua mai ina ua maua e sui o le Ofisa o Tiute ni vaega o lea pauta fa'asaina i le aso 11 Mati, 2013.

 

I fa'amaumauga a le fa'amasinoga o lo o taua ai e fa'apea, e lei maua e sui o le Ofisa o Tiute aisa sa ia Bode i le taimi na sailia ai lona tino, se'i vagana ai pepa iila e lua sa i ai mariuana.

 

O se tama'ita'i e faigaluega i le Ofisa o Tiute na alu e asi se tasi o lona aiga o lo o taofia i le falepuipui, ona o moliaga i lona umia o fualaau fa'asaina, o lea o Tolupo Hodges, ma fa'ailoa ane ai loa e le ali'i lea i le Ofisa o Tiute, sa la talanoa ma Bode, o lana tala ia te ia, e na o mariuana na maua e Leoleo ae le i maua aisa lea sa ia tia'i i le isi tulimanu o le fale.

 

Na toe aga'i atu le tamaita'i faigaluega a le ofisa o Tiute e siaki le vaega na taua sa tia'i ai le pauta fa'asaina o le aisa, ma maua atu i ai vaega o fualaau faasaina e pei ona taua, peita'i e le o manino mai i le itu a le malo le tulaga ua o i ai le mataupu lea sa faia fa'asaga ia Bode.

 

O le moliaga la lea ua ta'usala ai le ua molia, e mafai ona fa'asala ai o ia i le otese mo le umi e mafai ona o o atu i le 20 tausaga, po o le fa'asala i le salatupe e le sili atu i le $20,000, pe fa'asala fo'i i fa'asalaga uma ia e lua.

 

O lo o tumau pea tuutuuga o lo o tatala ai Bode i tua e fa'atali ai le masina fou lea ua fa'amoemoe e fofoga aloaia ai le fa'asalaga a le fa'amasinoga fa'asaga ia te ia.

 

NOFOA SEILALA

 

Ua toe taofia nei i le toese i Tafuna le ali'i o Nofoa Seilala e fa'atalitali ai le isi ana iloiloga i luma o le fa'amsinoga fa'aitumalo, atonu e o o atu ai i le taimi lena ua mae'a suesuega a leoleo fa'asaga i le mataupu e pei ona taofia fa'apagota ai le ua molia i le vaiaso na te'a nei, ma tu'uaia ai o ia i le moliaga mama o le fa'atupu vevesi i nofoaga faitele, ma le fa'amoemoe e ono faila moliaga fa'aopoopo faasaga ia te ia.

 

O se fa'alavelave na tula'i mai i Tafuna i le vaiaso na te'a nei, o lo o tu'uaia ai Seilala i lona fa'ao'olima i se ali'i atoa ai ma lona faia o ni fa'aupuga tau fa'amata'u i lea ali'i ma lona aiga, e aofia ai le taumafai e susunu le fale o le aiga.

 

E le o i ai se vaega tupe ua fa'atulaga e tatala ai Seilala se'i vagana ua mae'a su'esu'ega o lo o faia fa'asaga i lenei mataupu.

Comment Here