MOLIA MATULINO TAUALI’I I LE FASIOTI TAGATA

O le alii lea na ulua’i tu’uaia e le malo i le moliaga mamafa o le fa’ao’olima i le tulaga muamua, ona o le faalavelave lea na manu’a tigaina ai se isi ali’i mai Fagaalu i le faaiuga o le vaiaso, ua molia nei e le malo i le moliaga pito sili atu ona mamafa o le fasio tagata i le tulaga muamua, ina ua fa’amaonia i se ripoti mai le falema’i ua maliu le ali’i sa manu’a.

O le aso Gafua na te’a nei na tulai ai Matulino Tauali’i i luma o le faamasinoga faaitumalo mo lana ulua’i iloiloga, ma tofu atu ai loa lana mataupu i luma o le faamasinoga maualuga i le aso Lulu na te’a nei, ae o ananafi na faatoa maua ai e le malo le ripoti ua maliu le ali’i sa manu’a i lenei fa’alavelave, ma ua sauni nei le malo e faila le moliaga mamafa o le fasioti tagata i le tulaga muamua.

I faamaumauga a le faamasinoga o lo o taua ai e faapea, o le vevesi na amata mai i se inugapia, ma tula’i mai ai loa se feeseeseaiga i le va o le ua molia ma le ali’i ua maliu.

Na taua le taumafai o ni isi e vaovao le ua molia mai le o o atu i le alii na manu’a, ona alu ai loa lea o le alii ua maliu ma sau ma se agaese e pei ona tuuaia e le malo, ae o le taimi fo’i lea na alu ai le ua molia ma aumai se samala.

Na taua i suesuega a leoleo e faapea, o le samala lea na faaoo ai loa e Matulino se manu’a tuga i le ulu o le alii na manu’a ma taofia ai o ia i le falemai, mulimuli ane maliu ai lava o ia.

O lo o taofia pea Matulino i le toese i Tafuna e faatali ai le isi aso lea ua faatulaga e toe tula’i ai i luma o le fa’amasinoga maualuga.

MOLIA NI ALII TALAVOU I LE FAATUPU VEVESI I NOFOAGA FAITELE

O le po o le aso Toona’i na te’a nei na taofia mai ai e leoleo ni alii talavou se to’alua e ta’i 18 tausaga le matutua mai Amanave, ona o tuuaiga i le faatupu vevesi i nofoaga faitele atoa ai ma le inupia ae le’i atoa le 21 tausaga.

O ananafi na tutulai ai i luma o le faamasinoga faaitumalo le alii o Kuresa Gago ma Rhys Faamausili, ma ua toe tatala i tua e faatali ai le aso lea ua toe tolopo i ai le la mataupu.

O lenei mataupu na tofu atu i le ofisa o leoleo i Leone, ina ua vili e le pulenuu a Amanave le ofisa o leoleo mo se fesoasoani, ina ua ia vaaia ni alii se toalua o lo o laulauvavale i totonu o le nuu ma fai isi uiga mataga.

Na valaau i ai le pulenuu ia Rhys ma Kuresa e o ese peitai na lafo i ai e i laua nei upu masoa, ma faafesootai ai loa e le pulenuu le ofisa o leoleo mo se fesoasoani, ae o le taimi foi lea na vaaia ai e le pulenuu se taavale SUV lanu uliuli ua alu atu ma piki i laua ua molia.

Na taofi e leoleo le SUV ae aumai i fafo i laua ua molia, ma auina atu loa i le ofisa mo isi suesuega, mulimuli ane taofia i laua i le toese i le po lava lea.

Ua poloaina e le faamasinoga Rhys ma Kuresa ina ia aua ne’i o la toe tagofia le ava malosi, pe la te toe taumafai fo’i e faatupu se vevesi i totonu o le nuu.

SOPA SIAGIGI

O le ali’i pagota lea na tuuaia e le malo i le moliaga o le faatupu vevesi i nofoaga faitele, ona o le faalavelave lea na maua ai se telefoni feavea’i o lo o ia umia ao i ai i totonu o le toese, ua poloaina e le faamasinoga na te tuliina aso e 90 i totonu o le toese, o se tasi lea o tuutuuga o lana nofovaavaaia e 12 masina.

O le 90 aso o le faasalaga faafalepuipui a le alii o Sopa Siagigi e pei ona tuuina atu e le faamasinoga i le vaiaso nei, o le a tuli faatasi ma lana faasalaga faafalepuipui o lo o tuli i le taimi nei.

Ua poloaina foi e le faamasinoga Siagigi ina ia aua ne’i ona toe solia se tulafono a le malo ao taofia ai o ia i le toese i Tafuna.

O tuuaiga faasaga ia Siagigi na alia’e mai ina ua taumafai leoleo e saili lona tino po o i ai se telefoni, ae e e ai i luga le ua molia ma palauvale i alii leoleo, atoa ai ma lona faia o ni faamatalaga tau faamata’u i leoleo o le toese.