LAWRENCE SEVA’AETASI

E 20 masina lea ua poloaina e le fa’amasinoga maualuga le ali’i o Lawrence Seva’aetasi e taofia ai o ia i le toese i Tafuna, o se tasi lea o tu’utu’uga o lana nofova’ava’aia, ina ua ta’usala o ia e le fa’amasinoga i le moliaga mamafa o lona tagofia lea o itutinosa o se teineititi e laititi i lalo o le tulafono.

Na fa’atoese le ua molia i le fa’amasinoga e tusa ai o lana solitulafono sa fai, ma ia talosagaina ai loa se isi avanoa mo ia.

Na finau lana loia fautua ia Joel Shiver i le fa’amasinoga mo se isi avanoa mo Seva’aetasi, se’i toe fo’i atu ai i tua e tausi lona aiga ma toe saili se isi taeao fou mo ia. Na taua e lana loia e fa’apea, o le faaiuga sa faia e le ua molia, o se faaiuga sese, sa le tatau foi ona tupu lea tulaga.

Saunoa le afioga i le ali’i fa’amasino sili lagolago ia Lyle L. Richmond, e ui i le matuia o le gaioiga sa faia e le ua molia, peita’i ua manatu le fa’amasinoga e alaga tatau ma agava’a o ia i se fa’asalaga fa’a nofovaavaaia, ina ia mafai ai ona fa’atonutonu e le Ofisa Nofovaavaaia le umi lea o le a nofovaavaaia ai o ia.

E 5 tausaga na manatu le faamasinoga e taofia ai Sevaaetasi i le toese i Tafuna, peita’i o le a fa’amalumalu lona tuliina o lea fa’asalaga, ae nofovaavaaia o ia mo le 5 tausaga i lalo o poloaiga e ao ona usita’i i ai

O ni isi o ia poloaiga e aofia ai lona tuliina o masina e 20 i le toese i Tafuna, e aofia ai ma masina e 12 lea e o o mai i le taimi nei ua uma ona ia tuliina, ua faasa foi ona ia toe solia se isi tulafono a le malo, pe na te toe taumafai fo’i e fa’afeso’ota’i le teineititi na a’afia i lenei mataupu.

O le mataupu ua fa’asala ai le ua molia na afua mai ina ua le alu le teineititi na aafia i le aoga, ae ua alu ma tafafao ma le ua molia i lona fale, ma i’u ina la faiaiga ai e pei ona fa’ailoa e le teineititi i leoleo.

O le ali’i ave pasi e masani i matua o le teineititi na ia logoina le ulugali’i, ina ua ia vaaia le teineitiiti e oso mai i le fale o le ua molia i le aso na tula’i mai ai le fa’alavelave ae lei alu i le aoga, ma mafua ai loa ona faila e matua se la tagi i le ofisa o leoleo fa’asaga i lenei mataupu.

ELSARINA LEFATIA

O le aso 15 Tesema 2014 lea ua fa’atulaga e toe tula’i ai le tama’ita’i e 18 tausaga le matua mai Futiga, i le mae’a ai lea ona ia teena o tu’uaiga fa’asaga ia te ia i luma o le fa’amasinoga maualuga i le taeao ananafi.

O le tali tete’e a Elsarina Lefatia, na fa’aleo e lana loia fautua ia Douglas Fiaui, ina ua mae’a ona taulima e le ua molia ma lana loia le kopi o le tagi na fa’aulu e le malo ma talosagaina ai loa e Fiaui aso e 45 e toe tolopo i ai lenei mataupu, ina ia lava ai se taimi e faitau ai i le tagi a le malo ma iloilo mau fa’amaonia o lenei mataupu.

O lo o tuuaia e le malo ia Lefatia i le moliaga mamafa e tasi, o lona umia fa’asolitulafono lea o vaega o le pauta fa’asaina o le aisa, ma le fa’amoemoe e tulei ma fa’atau atu i isi tagata.

O lo o taofia pea Lefatia i le toese i Tafuna i le taimi nei, se’i vagana ua ia totogi le tupe e $25,000 na fa’atulaga e le fa’amasinoga e totogi ona fa’atoa mafai lea ona tatala o ia i tua mai le toese i Tafuna.