Tala otooto mai le Fa’amasinoga

APISAI TINO

 

O le ali’i e 35 tausaga le matua lea na tuuaia i lona faaoolima i se ave pasi e ala i lona ta tu’iina o ona foliga, ua ia tautino e faamaonia tuuaiga faasaga ia te ia.

 

O Apisai Tino na ulua’i tuuaia e le malo i le moliaga mamafa o le faaoolima i le tulaga lua faapea ai ma le faatupu vevesi i nofoaga faitele, ae i lalo o se maliliega sa latou sainia ma le malo ma talia e le faamasinoga, ua ia tautino ai i le moliaga mama o le faaoolima i le tulaga tolu lea ua toe teuteu e le malo, ae solofua e le faamasinoga le moliaga mama o le faatupu vevesi i nofoaga faitele.

 

I le tali ioe ai o Tino i le solitulafono e pei ona tausala ai o ia e le faamasinoga maualuga, sa ia tautino ai e faapea, i se taimi o le aso 6 Ianuari 2014 i Iliili, na ia tu’iina ai se ali’i ave pasi ina ua le sa’o lana sui sa tuuina atu mai lana pasese e $20 sa totogi.

 

O lo o tatala pea o ia i tua e faatali ai le aso 23 Me lea ua faatulaga e lau ai lona faasalaga.

 

JOE TOGITOGI

 

O le vaiaso fou lea ua faatulaga e fofoga ai le faasalaga a le faamasinoga faasaga i le alii o Joe Togitogi, ina ua manaomia e alii faamasino ni isi faamatalaga auiliili e tusa ai o le mea moni sa tupu.

 

O le alii talavou o Togitogi na ta’usala i le moliaga o le faaoolima i le tulaga lua, faapea ai ma le sola ese i tua mai le toese i Tafuna, i lalo o se maliliega sa latou sainia ma le malo ma talia e le fa’amasinoga.

 

Na faatoese le ua molia e tusa ai o lana solitulafono sa faia, ma ia talosagaina ai se isi avanoa sei toe fo’i atu ai i lona aiga e fesoasoani i le tausiga o ona matua.

 

Na molimau fo’i lona tama e alu i le wheelchair ma ia talosaga i le faamasinoga, mo se avanoa e tatala atu ai Togitogi i tua e fesoasoani i le tausiga o lona ma’i. Na taua e le tama e faapea, talu ona taofia lona atalii i le toese, o si ona toalua lava lea ua gafa ma le fesiita’iina solo o ia i mea e fia alu i ai, aemaise lava pe afai e fia fa’amalu.

 

O le aso Gafua o le vaiaso fou lea ua toe tolopo i ai e le fa’amasinoga le lauina o lana faasalaga mo lenei mataupu, ona e i ai ni isi o faamaumauga o lo o fia malamalama atili i ai alii faamasino, ma o lo o taofia pea Togitogi i le toese e faatali ai le aso e toe tulai ai i luma o le faamasinoga.

 

TOLOPO LAUINA FA’ASALAGA O LE STEPFATHER

 

O le Stepfather lea na ta’usala i lona faia o uiga mataga i le fanau teine e to’alua a le fafine o lo o la nonofo nei, ua toe tolopo i le aso Gafua o le vaiaso fou le lauina o lona fa’asalaga sa fuafua e fofogaina ananafi, ina ua maitauina e le fa’amasinoga e eseese fa’amatalaga o lo o taua e le Ofisa Nofovaavaaia i le latou ripoti, ese fa’amatalaga sa tuuina atu e loia ma le to’alua a le ua molia i luma o le fa’amasinoga i le taeao ananafi.

 

O tama’ita’i laiti e to’alua na a’afia i gaioiga tau solitulafono sa faia e le ua molia e 11 ma le 9 tausaga le matutua, ma ua i ai nei laua i Hawaii i se tasi o le aiga o le la tina, e pei ona faamaonia e le tina i lana molimau i luma o le faamasinoga i le taeao ananafi.

 

O popolega e pei ona taua e le alii faamasino sili ia Michael Kruse e faatatau i lenei mataupu, o le faaauau pea lea ona i ai o fanau laiti i totonu o le aiga a le ua molia.

 

Na finau le loia a le ua molia ia Joel Shiver, e na o le to’atasi le atali’i a le ua molia o lo o nonofo ma lona tina i le aiga i le taimi nei, peitai na taua e le tina i lana molimau, o lo o latou i ai faatasi ma le isi ana tama teine o lo latou aiga, o le afafine lea a le ua molia.

 

Na faatoese le ua molia e tusa ai o lana solitulafono sa faia, ma ia talosagaina ai alii faamasino mo se isi avanoa mo ia.

 

Saunoa Kruse, e matuia tele moliaga ua ta’usala ai le ua molia, o lona tagofia lea o itutinosa o tamaitai na aafia, atoa ai ma lona faia i ai o amioga mataga faafeusuaiga.

 

O lo o taofia pea le ua molia i le toese e faatali ai le vaiaso fou lea ua faatulaga e lau ai lona faasalaga.

Comment Here