Ads by Google Ads by Google

Tala otooto mai le Fa’amasinoga

NOFOVAAVAAIA I LE FAALEAGAINA MASINI A McCONNELL DOWELL

 

O ali’i e to’alua ia na ta’usala i le moliaga o le faaleaga meatotino i le tulaga lua, ona o le faalavelave lea na la faaleagaina ai ni masini fai auala a le kamupani o le McConnell Dowell i le masina o Aokuso na te’a nei, ua nofovaavaaia mo le ta’ilua tausaga i lalo o poloaiga a le faamasinoga maualuga.

 

O ni isi o ia poloaiga e aofia ai lo la tuliina o aso e 90 i le toese i Tafuna, ma ia totogi e le tagata e to’atasi le $2,600 mo le tau o vaega o masini sa la faaleagaina.

 

E taitasi le tausaga i le toese ma le salatupe e $1,000 na manatu le faamasinoga e faasala ai Billy Tusi ma Patrick Upusili, peitai ua finagalo le faamasinoga o le a faamalumalu le faataunuuina o lea faasalaga, ae o le a nofovaavaaia i laua i lalo o poloaiga e ao ona la usitai i ai.

 

Na faatoese Tusi ma Upusili i le faamasinoga atoa ai ma le malo o Amerika Samoa, e tusa ai o le la solitulafono sa faia, sa la faatoese foi i le kamupani a le McConnell Dowell e tusa ai o le la solitulafono, ma la talosagaina ai se faamagaloga mo i laua.

 

Na talosaga faatasi i laua i le faamasinoga, mo se avanoa se’i tatala ai i laua i tua e saili ni la galuega, e toe totogi ai mea sa la faaleagaina.

 

Na taua e Tusi e faapea, ua avea lona le usita’i i fautuaga ma timaiga a ona matua ua mafua ai ona saisaitia lona olaga i le toese, ma ua avea le malosi o faaosoosoga a le tiapolo ma itu ua faavaivai ai lona mafaufau ma ia soli ai le tulafono.

 

Na finau le loia a le malo ina ia nofovaavaaia i laua nei, ae tatala i tua e faigaluega ina ia mafai ai ona la toe totogi le tau o mea sa faaleagaina, lea e $5,534 le tau aofa’i e pei ona faamaonia mai e le pulega a le McConnell Dowell.

 

A’o nofo vaavaaia ai Tusi ma Upusili mo le ta’i lua tausaga, ua faasa ona la toe tagofia le ava malosi poo ni fualaau faasaina, ua faasa foi ona la toe eva ma tagata o lo o faia ni latou inugapia, pe toe ulufale i totonu o fale kalapu o lo o faatauina ai le ava malosi.

 

Ua faatonuina foi i laua e le faamasinoga, ia uma ane aso e 60 talu ona tatala i laua mai tua i le toese ua maua ni la galuega, a ia uma ane ulua’i masina e ono o le la nofovaavaaia ua uma ona la totogiina le ta’i $2,600 i le kamupani na aafia.

 

E oo mai i le aso ananafi ua 87 aso talu ona loka Tusi ma Upusili i le toese, lona uiga o le aso Tofi o le vaiaso nei e atoa i ai aso e 90 lea ua poloa’i i laua e le faamasinoga e loka ai i le toese ae toe tatalaina loa i tua e saili ni la galuega.

 

TATALA I TUA LEATIGAGA MA LE TOESE

 

O le itula e 4:00 i le afiafi ananafi na tatala ai i tua mai le toese i Tafuna le alii o Michael Leatigaga, ina ua talia e le faamasinoga maualuga le fautuaga a le Ofisa Nofovaavaaia, ina ia taofi loa le tuli faamae’aina e le ua molia o le 28 masina i le toese, ona o lea ua maea ona ia totogi le salatupe $2,000 sa poloaina o ia e le faamasinoga e totogi.

 

O Leatigaga na tausala e le faamasinoga i le moliaga mamafa o lona talia lea o ni oloa sa ave faagaoi e se isi tagata, o ni pusa wahoo ia na la gaoia mai ma le alii o Joe Leota mai le StarKist Samoa ao la galulue ai ae o ma faatau atu i se faleoloa.

 

E oo mai i le aso ananafi ua atoa le 22 masina talu ona loka Leatigaga i le toese i Tafuna mai lana faasalaga e 28 masina, o se tasi lea o tuutuuga o lana nofovaavaaia e 7 tausaga.

 

Sa fautuaina e le faamasinoga ia Leatigaga ananafi ina ia tumau pea lona usitaia o poloaiga a le faamasinoga ua uma ona avatu ia te ia e usita’i ai.

 

SOLOFUA TUUAIGA FAASAGA I LE STEP-FATHER

 

O le step-father lea na tuuaia e le malo i lona tagofia o itutinosa o lona afafine fai e 27 tausaga le matua, ua tatala i tua mai le toese i Tafuna i le taeao ananafi, ina ua talia e le faamasinoga maualuga le talosaga a le malo ina ia solofua tuuaiga faasaga ia te ia.

 

O le mataupu faasaga i le step-father na alia’e mai i le aso 10 Tesema 2012 ina ua faila e le tamaitai na aafia sana tagi i le ofisa o leoleo faasaga i lona step-father, lea na afua ai ona suesue e leoleo le mataupu ma i’u ina taofia ai o ia i le toese talu mai le tausaga na te’a nei.

 

Ae talu ai ua toe sui le faamatalaga a le tamaitai na aafia fai mai e leai se mea sa tupu, e le fia molimau foi i luma o le faamasinoga faasaga i lona tama fai, na mafua ai loa ona finau le malo i le faamasinoga ina ia solofua lenei mataupu.

 

O moliaga e lua sa tuuaia ai le ua molia e aofia ai le moliaga mamafa o lona tagofia o itutinosa o se tamaitai, faapea ai ma le faaoolima i le tulaga tolu.

 

Na taua e le itu a le malo i le faamasinoga e faapea, o se taimi e lei mamao atu na toe oo atu ai le na aafia i le latou ofisa, ma faailoa atu lana faamatalaga e leai se mea sa tupu i le va o ia ma le ua molia.

 

Ona o lea tulaga, na talia ai loa e le alii faamasino sili ia Michael Kruse le talosaga a le malo ina ia solofua moliaga faasaga i le ua molia.