TALI IOE MULU MALUIA I LE MOLIAGA O LE GAOI

O le masina fou lea ua faatulaga e le faamasinoga maualuga e lau ai le faasalaga a le alii o Mulu Maluia Jr, i le mae’a ai lea ona ta’usala o ia i le moliaga o le gaoi, i lalo o se maliliega sa latou sainia ma le malo ma ua talia fo’i e le fa’amasinoga.

Na ulua’i tu’uaia e le malo ia Maluia Jr i moliaga mamafa e lua o le talepe fale i le tulaga muamua, faapea ai ma le moliaga o le gaoi, ae ina ua talia e le faamasinoga le tali ioe a Maluia Jr i le moliaga o le gaoi, na talosaga ai loa le malo ina ia solofua le moliaga pito mamafa o lo o totoe ai i le pepa o tagi sa latou fa’aulu.

I le tali ioe ai o le ali’i ua molia i le moliaga e pei ona ta’usala ai o ia, sa ia ta’utino ai e fa’apea, i se taimi o le po o le aso 19 Tesema 2014 i Nuuuli, sa ia ulufale fa’amalosi ai i totonu o le fale a se aiga ma ave fa’agaoi ni meatotino sa i totonu.

I fa’amaumauga a le fa’amasinoga o lo o taua ai e fa’apea, i le vaveao o le aso na tula’i mai ai le fa’alavelave, na vaaia ai e ni alii se to’alua se tagata o lo o fealua’i i autafa o le fale na a’afia, mulimuli ane sa latou iloa ai, o le alii ua molia o lo o fealua’i i tafatafa o le fale.

I le tuana’i ai o se taimi puupuu ae toe vaaia ai loa e alii e to’alua le ua molia, ua ese ona ofu ua ofu mai, o lo o ia talanoa fo’i i se telefoni, ae ina ua siaki e ali’i ia le fale lea sa vaaia ai le ua molia i tafatafa, sa latou vaaia ai le alii e ana le fale o lo o moe.

Na faailoa e le alii e ana le fale, o meatotino sa i totonu o lona fale na leiloa e aofia ai lana telefoni ma lana iPad.

O lo o taofia pea Maluia Jr i le toese i Tafuna ina ua le mafai ona ia totogiina le $15,000 sa fa’atulaga e tatala ai o ia i tua, e fa’atali ai le aso 9 Oketopa lea ua fa’atulaga e lau ai lona fa’asalaga.

SAUNI AUNEI MUAMUA E TALI I TU’UAIGA A LE MALO

O le ali’i lea o lo o tu’uaia e le malo i lona fa’aaogaina o se agaese e fa’aoo ai ni manu’a i ni ali’i se to’alua, ua sauni e tu’uina atu lana tali ioe i luma o le fa’amasinoga e tusa ai o le mataupu e pei ona tu’uaia ai o ia e le malo.

O le vaiaso na tea nei na sainia ai e Aunei Muamua sa latou maliliega ma le malo, lea ua ia sauni ai e tali ioe i le moliaga muamua o le faaoolima i le tulaga muamua, lea ua toe suia e le malo i le moliaga feololo o le faaoolima i le tulaga lua.

O le vaiaso nei na fa’atulaga e tolaulau ai le maliliega a Muamua ma le malo i luma o le fa’amasinoga maualuga, ae talu ai e le i lava se taimi e faitau ai e le ua molia ma lana loia tuutuuga uma o le maliliega, na manatu ai loa le fa’amasinoga ina ia toe tolopo le fofogaina o le maliliega, ae tu’u atu se taimi e faitau ai le ua molia ina ia malamalama i aiaiga ma tuutuuga uma o le latou maliliega ma le malo.

O tuuaiga faasaga ia Muamua na afua mai i le faalavelave lea na manunu’a ai ni ali’i se toalua mai Pago Pago i se agaese i le masina o Iulai o le tausaga nei, ina ua fa’alogoina e ali’i e to’alua na a’afia se ta’avale o lo o ee leotele le afi i luma o le latou fale, ae ina ua la o ane e vaai, sa la vaaia ai o le ta’avale a le ua molia.

Na taua i faamaumauga a le fa’amasinoga e fa’apea, na fesili alii na aafia ia Muamua i le mafu’aaga ua soona fa’a ee ai le afi o lana ta’avale i luma o le latou fale, peita’i sa leai se tali a le ua molia, o lea na toe fo’i ai loa i laua i totonu o le fale, ae ina ua la toe fo’i mai i fafo, o le taimi lea na osofa’i ai loa e le ua molia i laua i le agaese ma manu’a ai foliga o le isi ae manu’a le lima o le isi.

O lo o taofia pea Muamua i le toese i Tafuna e fa’atali ai le tolaulauina o le latou maliliega ma le malo i le taeao nei.