STEPHANIA SULUSULU

Ua fautuaina e le fa’amasinoga le Tina talavou lea o lo o tuli sana fa’asalaga fa’a falepuipui e 20 masina, ina ia fa’aaoga tatau fautuaga ma avanoa ua tu’uina atu e le fa’amasinoga ia te ia.

O Stephania Sulusulu lea o lo o tuli sona fa’asalaga e mafua mai ina ua ta’usala o ia i le moliaga mamafa o le ave ta’avale a o se’i lona laisene, na toe tula’i i luma o le fa’amasinoga maualuga i le vaiaso na te’a nei, mo le tu’uina atu o se fa’asalaga e tusa ai o lona le usitaia o tuutuuga o lana nofovaavaaia sa tu’uina atu e le fa’amasinoga i le 2014, e aofia ai le fa’asa lea ona ia toe soli se tulafono a le malo.

Ina ua ta’usala Sulusulu i le moliaga o lona ave fa’agaoi o le silia i le $11,000 mai le kamupani a le GHC Reid sa galue ai, na fa’anofovaavaaia ai loa o ia e le fa’amasinoga mo le 7 tausaga i lalo o tuutuuga e ao ona ia usita’i i ai, lea e aofia ai ma le tuutuuga o le aua lea ne’i ona toe solia se tulafono.

O le latalata i le fa’aiuga o le tausaga na te’a nei, na toe soli ai e Sulusulu le tulafono ina ua maua o ia e leoleo o lo o ia fa’afoeina se ta’avale ae o lo o se’i lona laisene, ma talosaga ai loa le Ofisa Faanofovaavaaia i le fa’amasinoga ina ia fa’aleaoga tuutuuga o le nofovaavaaia a Sulusulu, ae poloaina o ia na te tuliina fa’amae’a tausaga o lo o totoe o lana nofovaavaaia e 7 tausaga.

Na fa’ailoa e le fa’amasinoga ia Sulusulu e fa’apea, o le avanoa ua tu’uina atu ia te ia, e le tatau ona ia toe alu ese ai.

JOE TOGITOGI

Ua taoto atu nei i se fa’aiuga a ali’i fa’amasino o le fa’amasinoga maualuga le mataupu a le ali’i o Joe Togitogi, lea o lo o tu’uaia i lona fa’ao’o lea o manu’a i se isi ali’i i Nuuuli i le tausaga na te’a nei.

E tasi lava le aso na fa’agasolo ai le fa’amasinoga iloilo a Togitogi i luma o ali’i fa’amasino ae mae’a, ma ua taoto atu loa mo se fa’aiuga tusitusia e tusa ai o lana mataupu.

O lo o finau Togitogi na te lei fa’aooa ni manu’a i le ali’i na a’afia, peita’i o lo o finau le ali’i na a’afia, o Togitogi lava na tuia o ia ma manu’a tigaina ai, ina ua ia fesiligia Togitogi po o fea ua ave i ai le TV a le Tama a lana uo teine na ia gaoia mai le fale i Nuuuli.

O lo o taofia pea Togitogi i le toese e fa’atali ai se fa’aiuga a le fa’amasinoga e tusa o lana mataupu.

TALIGALU AH SIU

Ua malie le fa’amasinoga e fa’amalumalu le tu’uina atu o se isi fa’asalaga fa’a falepuipui ia Taligalu Ah Siu, ina ua ta’usala o ia i lona le usitaia o poloaiga a le fa’amasinoga sa tu’uina atu mo lana nofovaavaaia, a ua poloaina o ia ina ia tausisi pea ma usita’i i poloaiga ua mae’a ona tu’uina atu ia te ia i le ulua’i taimi.

O Ah Siu na ta’usala i lona le usitaia o poloaiga o lana nofovaavaaia, ina ua faia se suega i lona tino ma fa’amaonia ai lona fa’aaogaina o le fualaau fa’asaina o le mariuana. O tuutuuga o lana nofovaavaaia ina ua ta’usala o ia i le moliaga o le talepe fale, o le fa’asa lea ona ia toe tagofia le ‘ava malosi po o fualaau fa’asaina.

Ua fautuaina e le fa’amasino sili ia Michael Kruse ia Ah Siu i le vaiaso na te’a nei, afai na te toe solia se isi lava poloaiga ua tu’uina atu ia te ia, o le a mamafa loa se fa’asalaga e tu’uina atu ia te ia.