Tala otooto mai le Fa’amasinoga

TOE TAOFIA SOPI SENIO I LE TOESE I TAFUNA

 

Ua toe taofia nei le ali’i o Sopi Senio i le toese i Tafuna, i lalo o se poloaiga na sainia e le fa’amasinoga maualuga, se’i vagana ua ia totogiina le tinoitupe e $5,000 ona fa’atoa mafai lea ona tatala o ia i tua, e fa’atali ai le isi ana iloiloga lea ua fa’atulaga mo le aso 8 Ianuari, 2015, i le luma o le afioga i le ali’i fa’amasino sili lagolago ia Lyle L. Richmond.

 

O le aso 18 Aokuso 2014 ina ua le tula’i Senio i luma o le fa’amasinoga maualuga i sana iloiloga sa fa’atulagaina ai, na sainia ai loa e le ali’i fa’amasino ia Richmond se poloaiga e saili mai ai o ia i luma o le fa’amasinoga.

 

Talu mai lea taimi, sa taumafai pea vaega o Masela a le faamasinoga e saili Senio po o fea e maua ai, peita’i sa le’i manuia, ae ina ua taofia fa’apagota o ia e leoleo i le aso o le Kerisimasi na te’a nei, i le mae’a ai lea o se latou tuliga ta’avale ma leoleo sa faia, na fa’atoa maua ai loa iina ma le avanoa e pu’e fa’apagota ai o ia.

 

O le afioga i le ali’i fa’amasino ia John L. Ward II na fa’atautaia le iloiloga a Senio ananafi i luma o le fa’amasinoga maualuga, i le lagolagosua ai a le afioga i le ali’i fa’amasino ia Mamea Sala Jr.

 

Na fa’amanino e Ward II e fa’apea, o le aso 18 Aokuso na saini ai e le fa’amasinoga sana poloaiga e saili mai ai le ua molia, ina ua fa’alua ona le alu atu i taimi o ana iloiloga sa fa’atulaga e faia i luma o le fa’amasinoga maualuga.

 

Saunoa atili Ward II e fa’apea, o le aso tonu lava fo’i lea na fuafua e fofoga aloaia ai le maliliega ua uma ona sainia e Senio ma le malo, lea e pei ona tu’uaia ai o ia i moliaga mamafa e lua o le fa’aleaga meatotino i le tulaga lua, atoa ai ma le taumafai e gaoi oloa a se isi tagata, o solitulafono D uma o solitulafono mamafa, lea e mafai ona fa’asala ai se tasi i le toese mo le umi e le silia i le 5 tausaga, pe fa’asala fo’i i le salatupe e le silia i le $5,000, po o le fa’asala fo’i i fa’asalaga uma ia e lua.

 

Na fesili Ward II i loia mo se fautuaga e tusa ai o se isi aso e toe tula’i ai Senio i luma o le fa’amasinoga, peita’i na talosaga loia mo se taimi umi e toe tolopo i ai lenei mataupu, ina ia maua ai le avanoa la te iloiloina ai le faila a le ua molia, ona e ese loia sa laua taulimaina lenei mataupu.

 

Na soisoi Ward II ma fa’apea atu i loia, e fa’apena fo’i ia te ia, e le o ia fo’i e ana le mataupu lenei, o le mataupu a Richmond, ae lelei pe a fa’atulaga le aso 8 Ianuari o le tausaga fou e toe tula’i ai Senio i luma o Richmond.

 

E le i fesili le fa’amasinoga i le ali’i ua molia i le mafua’aga na fa’alua ai ona le alu atu i luma o le fa’amasinoga ina ua valaau ana mataupu, e ui o se tasi o tuutuuga na tatala ai o ia i tua, o le auai lea i soo se taimi e valaau ai ana mataupu i luma o le fa’amasinoga.

 

I le toe fa’atulaga ai la e Ward II o le tino i tupe e totogi ona fa’atoa mafai lea ona tatala le ua molia i tua, ua poloaina ai o ia ina ia aua ne’i ona toe misia isi ana poloaiga o lo o mulimuli mai, ia avea o ia ma tagatanuu lelei e tausisi i tulafono a le malo, aua ne’i ona toe solia se isi tulafono, aua fo’i nei taumafai e sola ese ma le atunu’u, pe toe tu fo’i i le fanua ma le fale o le aiga o lo o a’afia i lenei mataupu.

 

TAUMAFAI NI ALI’I E GAOI SE TA’AVALE

 

E to’alua ni ali’i talavou na taofia mai e leoleo i le fa’aiuga o le vaiaso na te’a nei i Tafuna, ina ua masalomia lo la taumafai e gaoi se ta’avale sa paka i luma o se faleoloa, ae alu le ave ta’avale e fai sana fa’atau.

 

O i laua e to’alua na taofia e leoleo i le fa’aiuga o le vaiaso e aofia ai le ali’i e 19 tausaga le matua o Fetu Alefosio, ma se ali’i e 17 tausaga le matua.

 

I fa’amaumauga a le fa’amasinoga o lo o taua ai e fa’apea, ina ua paka le ta’avale a se fafine i luma o se faleoloa i Tafuna, sa ia vaaia ai i laua ua molia o lo o nofonofo i le isi tulimanu i luma lava o le faleoloa, e foliga mai o lo o inu ni la pia, ona savali lava lea o le fafine i totonu o le faleoloa e fai lana fa’atau.

 

E le i atoa se 3 minute talu ona savali le fafine i totonu o le faleoloa, ae ona toe manatua loa se mea o lo o galo i le ta’avale, ma toe savali atu ai loa i fafo ma le faleoloa, peita’i e fetaui lona oo atu i fafo ae tau atu loa ma lana vaai i se tasi o le to’alua lea o lo o taumafai e tatala le faitoto’a pito i tua o lana ta’avale.

 

Na ona iloa mai lava e le au ali’i ia o le fafine ua savali atu, alu loa ma le tuli i le atoa, ae o le fesoasoani mai le pule o le faleoloa e ala i le iloiloina o le masini pu’eata o lo o i fafo o le vaega e paka ai ta’avale, na mafua ai ona iloa i laua nei, o ni isi lava e masani ona fa’atau i le faleoloa lea, e nonofo latalata atu fo’i i le nofoaga lea.

 

Ua molia nei i laua i le moliaga mama o le fa’atupu vevesi i nofo’aga faitele, atoa ai ma le isi moliaga mama o le inupia ae lei atoa le 21 tausaga fa’asaga i le ali’i e 17 tausaga le matua, ma ua fa’amoemoe o le aso 12 Ianuari 2015 e toe valaau ai le la mataupu i luma o le fa’amasinoga fa’aitumalo.

Comment Here