MOLIA NI ALI’I TALAVOU I LE GAOI

E to’alua ni ali’i talavou e ta’i 15 tausaga le matutua na taofia mai e leoleo i le aso Lua na te’a nei, ona o tu’uaiga i lo la taumafai lea e gaoi ni oloa mai totonu o se faleoloa i Tafuna. O lo o tu’uaia fo’i e le malo i laua i le moliaga o le inupia ae le i atoa le 21 tausaga, ina ua fa’amaonia e leoleo sa ‘onana i laua i le taimi na taofia fa’apagota ai.

Na taua e le loia a le malo ia Terri Bullinger o lo o gafa ma le taulimaina o mataupu a fanau talavou e laiti i lalo o le tulafono, o lo o molia i laua nei i moliaga mama e lua o le gaoi faapea ai ma le tagofia o le ‘ava malosi ae le i atoa le 21 tausaga le matua.

I fa’amaumauga a le fa’amasinoga o lo o taua ai e fa’apea, o ali’i talavou e to’alua ua molia, na ulufale i totonu o se faleoloa i Tafuna e fa’atau, ona la totogi lea o isi oloa e pei o pepa ‘chips’ ae nana i totonu o la ofu sa fai meaai tu’u apa, lea na fa’atoa iloa e le faatau oloa ina ua ia iloilo lana masini pu’eata i le po lava lea, ma ia vaaia ai gaioiga a i laua nei e to’alua, ma logo ai loa leoleo mo se fesoasoani.

Pe tusa o le lua itula o taumafai leoleo e saili i laua nei ae maua loa i luma o se fale fa’atali pasi i Tafuna, ma pu’e fa’apagota mai ai i laua, o lo o ‘onana ae ua leai ni meaai i o la tino.

O se tasi o i laua o le ulua’i taimi lea ua tula’i ai i luma o le fa’amasinoga, ae o le isi o le fa’alua ai lea.

LAPATAIA LE AU INU PIA INA IA TAUSI LE FILEMU I ASO FIAFIA

O ali’i e to’alua lea na tu’uaia i lo la faia o ni gaioiga e save’u ai le nonofo filemu o ni aiga i Petesa i le masina na te’a nei, ua fautuaina i laua e le fa’amasinoga e aua ne’i o la toe tagofia le ava malosi i taimi nei o aso fiafia, ua fa’asa fo’i ona la toe soliina se tulafono a le malo.

O Mark Fa’afetai ma Ualesi Tunupopo na ta’usala e le fa’amasinoga fa’aitumalo i le moliaga mama o le fa’atupu vevesi i nofoaga faitele, ma faanofovaavaaia ai i laua mo le umi e 12 masina i lalo o poloaiga e ao ona la usita’i i ai.

O ni isi o ia poloaiga e aofia ai le fa’asa lea ona la toe tagofia le ava malosi, faasa ona la toe soli se tulafono, fa’asa fo’i ona la toe taumafai e fa’afeso’ota’i aiga na a’afia i le gaioiga sa laua faia.

O se vevesi na tula’i mai i se inuga pia sa faia i se vaega o Petesa i le masina o Oketopa na te’a nei, na fa’aumuumu ai loa Fa’afetai ma Tunupopo i luga, ma la folafola le la fasiotia o le au ali’i sa latou inupia, o i latou ia na mafua ai le vevesi.

Na tu’uaia fo’i le togi e Tunupopo o se atigi fagu pia ma toeitiiti ai lava lavea se tamaititi sa tu i luma o le faleoloa na tula’i mai ai le vevesi.

O isi tuutuuga o le nofovaavaaia a i laua ua molia e aofia ai le auai i ni aoaoga e fesoasoani ai i a’afiaga o le ‘ava malosi, ma ia la totogi sala tupe e ta’i $125 i le fa’amasinoga.

“Aua nei avea aso fiafia ua o o mai ma itu e te lua le usita’i ai i tuutuuga a le fa’amasinoga, o le fa’asa lea ona lua toe tagofia le ‘ava malosi, aua o le lua iuga pe afai ete lua le usita’i, o le falepuipui fo’i mo le 6 masina”, o le fautuaga le a a le ali’i fa’amasino o Elvis P. Patea i ali’i ia e to’alua.