FA’AITIITIA TUPE TATALA AI TUA ALI’I AVE PASI AMIO VALEA

Ua talia e le fa’amasinoga maualuga le talosaga na fa’aulu e le loia a le ali’i ave pasi amio valea, lea o lo o tu’uaia i lona faia o uiga mataga i se teineititi e 15 tausaga le matua, ina ia fa’aitiitia le tupe mai le $50,000 i le $30,000.

Na taua e le ali’i loia ia Matailupevao Leupolu Jr, lea o lo o tula’i mo le susuga a Tinae Soosemea e fa’apea, talu ai ua latalata i aso fiafia o lenei tausaga, ua matua faigata ai i le o lo o molia ona tau saili se tupe e totogi ai le fa’aiuga a le fa’amasinoga.

Na fa’ai’u le talosaga a le ali’i loia i lona talosagaina lea o le fa’amasinoga, ina ia fa’aitiitia le tupe e tatala ai Tinae i tua i le $30,000.

Na finau le loia a le malo ia Jessica Bargman i le fa’amasinoga ina ia fa’atumau pea i le $50,000 le tupe e tatala ai le ua molia i tua.

Na taua e le itu a le malo e fa’apea, e le mama moliaga o lo o tu’uaia ai le ali’i ave pasi, ona o le laititi o tausaga o le teineitiiti na a’afia, e le gata fo’i i lea, o le molimau lea na ia logoina leoleo i le fa’alavelave na mafua ai ona taofia faapagota Tinae i le falepuipui, sa ia taua i leoleo e fa’apea, e le o se taimi muamua lea ua ia vaaia ai Tinae o ia faia uiga lava nei i fanau laiti.

Na taua e le loia a le itu tete’e e fa’apea, o lea ua mae’a ona tau aao atu e le malo fa’amaumauga e lagolago ai moliaga fa’asaga ia Tinae, atoa ai fo’i ma le ofa e pei ona tu’uina atu e le malo, pau le itu o lo o totoe, o le la taumafai ma le ua molia e iloilo le ofa ma saini loa.

O le aso 8 Ianuari 2015 lea ua toe tolopo i ai lenei mataupu, ma le fa’amoemoe e tatau ona o o atu i le aso lea ua maea ona sainia e le ua molia le ofa ua tuuina atu e le malo.

O Tinae o lo o tuuaia i moliaga mamafa e aofia ai le faiaiga ma se teineititi e laititi i lalo o le tulafono, atoa ai ma lona tagofia o itutinosa o se tamaitai e le i fa’aipoipo i ai.

JIM MAPU

O le ali’i lea na ta’usala e le fa’amasinoga i le masina na te’a nei i le moliaga mama o lona umia lea o se fana e le i lesitalaina, ua poloaina na te totogi le salatupe e $1,000, o se tasi lea o tuutuuga o lana nofovaavaaia e 2 tausaga.

Na faatoese Jim Mapu i le fa’amasinoga e tusa ai o lana solitulafono sa fai, ma ia talosagaina ai se isi avanoa mo ia, lea fo’i sa talia e le afioga i le ali’i fa’amasino sili ia Michael Kruse.

O ni isi o tuutuuga o le nofovaavaaia a le ua molia e aofia ai lona auai i ni aoaoga e fesoasoani ai i le leaga o le umia o a’upega mata’utia, ma ia aua nei ona toe solia se tulafono a le malo.

E 16 aso na poloainae le fa’amasinoga Mapu na te tuliina i le toese i Tafuna, ma o lea umi na aofia ai aso ia na taofia ai o ia i le falepuipui, ao fa’atalitali ai le aso e lau ai lana fa’asalaga, ma toe tatala ai loa o ia i le taeao ananafi.

O le moliaga e pei ona ta’usala ai Mapu, na tula’i mai i Nuuuli i le aso 27 Iulai, 2013, ina ua maua e leoleo ia te ia se fana o le ituaiga o le .38 e le i lesitalaina o le Ofisa o Leoleo.