PULUMU FIFITA

O le ali’i lea na ia tauaia fagu ma ma’a i le fale o se aiga i Leone, atoa ai ma luga o le auala tele a le malo a o feoa’i ta’avale, ua poloaina e le fa’amasinoga fa’aitumalo ina ia aua ne’i ona toe faia se isi lava gaioiga e ono save’u ai le nonofo filemu o tagata lautele i totonu o le nu’u.

O le vaiaso nei na tula’i ai i luma o le fa’amasinoga fa’aitumalo le ali’i o Pulumu Fifita, ma ia teena le moliaga mama o le fa’atupu vevesi i nofoaga faitele e pei ona tu’uaia ai o ia e le malo.

O le mataupu lenei na tofu atu i le ofisa o leoleo i Leone, ina ua logo e se molimau leoleo mo se fesoasoani, i le mae’a ai lea ona tauai e Fifita ma lona uso o atigi fagu i luga o lona fale, ae o isi atigi fagu ma ma’a na tauai aga’i i le auala, pe tusa lea o le itula e 9:29 i le po o le aso To’ona’i na te’a nei, Tesema 6, 2014.

Na taunu’u leoleo i le nofoaga na tula’i mai ai le fa’alavelave ma vaaia ai tagata o lo o tumutumu solo i le nofoaga lea, e foliga mai o lo o i ai se vevesi o lo o tupu, e le i umi ae vaaia e leoleo ni ma’a o lo o tauai mai e ni tagata aga’i i luga o le auala, ae o le taimi lea o lo o pisi ta’avale.

E le i umi ona fai tuliga a leoleo ma ali’i e to’alua sa faia lea amio ae maua loa le ali’i o Pulumu, ma vaaia ai le malosi o le manogi pia o lo o sau mai lona tino, ae ina ua fesiligia e leoleo le ua molia i le mafua’aga ua ia faia ai lea gaioiga, sa ia taua e faapea, o lona ita tele i tupulaga o le nu’u i le o atu fua fasi laua ma lona uso.

O le vaiaso fou lea ua toe tolopo i ai lenei mataupu, ma ua fa’atulaga e le fa’amasinoga le $500 e totogi ona fa’atoa mafai lea ona tatala le ua molia i tua e fa’atali ai taualumaga o lana mataupu lea ua fa’agasolo i luma o le fa’amasinoga i le taimi nei.

SULA TUI

O le masina fou o Ianuari 2015 lea ua fa’atulaga ai le ulua’i iloiloga o le mataupu a Sula Tui, ina ua ia tula’i i luma o le fa’amasinoga maualuga ma ia teena moliaga mamafa e lua fa’asaga ia te ia i le taeao ananafi.

O moliaga fa’asaga ia Sula e aofia ai lona umia fa’asolitulafono o vaega o le pauta fa’asaina o le aisa, atoa ai ma lona umia fa’asolitulafono ma le fa’amoemoe e tulei pe fa’atau atu i isi tagata.

O moliaga fa’asaga ia Tui na afua mai i le fa’alavelave lea na alu ai e momoli se afifi i lona to’alua o Samuel Wright o lo o taofia i le toese i Tafuna, ae maua ai e leoleo o le toese i totonu o le afifi ni straw se lua e tipi tulimanu, o lo o i ai ni vaega o le pauta fa’asaina o le aisa.

Ae ina ua fesiligia e leoleo ia Tui e tusa ai o le afifi na alu atu ma ia i lona to’alua, sa ia taua ai e faapea, o le afifi na tu’u atu e se uo a lona to’alua ma le fa’aupuga, e momoli i lona to’alua o lo o taofia i le toese.

O lo o taofia pea i le toese ia Sula ina ua le mafai ona ia totogiina le tupe e $10,000 na fa’atulagae le fa’amasinoga e totogi ona fa’atoa mafai lea ona tatala o ia i tua, e fa’atali ai taualumaga o lana mataupu lea ua fa’agasolo i le taimi nei i luma o le fa’amasinoga.