Ads by Google Ads by Google

Tala otooto mai le Fa’amasinoga

POE LEAPAI

 

Ua toe tolopo e le fa’amasinoga maualuga i le aso Faraile na te’a nei le mataupu i le va o le malo ma le ali’i leoleo ia Poe Leapai, ina ua mae’a ona fa’ailoa e loia a itu e lua i luma o le fa’amasinoga, le fa’aauau pea lea o a latou feutanaiga mo se maliliega aufa’atasi e fa’amuta ai lenei mataupu.

 

Na fa’ailoa e le loia a Leapai ia Michael White e fa’apea, o lo o i ai nai fa’amatalaga laiti o lo o mana’omia lo lato fetufaa’i ai ma le malo, ma va’ava’aia ai loa i se auala e fa’amuta ai lenei mataupu.

 

E tolu moliaga o le gaoi o lo o tu’uaia ai e le malo ia Leapai, e afua mai i le fa’alavelave lea na ia faia ai ni gaioiga ina ia maua mai ai se vaega tupe mai ni faleaiga a tagata Asia, e ala i lona tu’uina lea o ni mogamoga i totonu o ipu meaai, ae mulimuli ane ua ia finau o mogamoga sa maua i totonu o ana ipu meaai, e pei ona tu’uaia e le malo.

 

O lo o tumau pea poloaiga o lo o tatala ai Leapai i tua e fa’atali ai le aso lea ua fa’atulag e toe valaau ai lana mataupu.

 

ARONA AMITUANA’I

 

O le masina o Iulai 2015 lea ua fa’atulaga e faia ai le fa’amasinoga autu o le isi mataupu o lo o tu’uaia ai e le malo le susuga a Arona Amituana’i, ina ua tula’i le ua molia ma tali tete’e i tu’uaiga e fa’apea sa ia fa’ao’olima i se ali’i leoleo ina ua aga’i atu leoleo e pu’e fa’apagota o ia, ona o se mataupu sa mana’omia ai e le fa’amasinoga le taofia fa’apagota mai o ia.

 

O se mataupu na tula’i mai i Pago Pago i le tausaga na te’a nei, ina ua ulufale fa’amalosi Amituana’i i se fale o se aiga, ma ia fa’ao’olima ai i le tama e ana le fale ma manu’a ai, na mafua ai ona sainia e le fa’amasinoga se poloaiga e pu’e fa’apagota ai o ia.

 

O le tausaga nei na fa’atoa maua ai e leoleo ia Amituana’i ma latou pu’e fa’apagota ai loa o ia, peita’i, o iina lea e alia’e mai ai le mataupu e pei ona tete’e i ai le ua molia, fai mai sa ia fa’ao’olima i se tasi o ali’i leoleo i le taimi na latou pu’e fa’apagota ai o ia.

 

O le masina fou i Ianuari lea ua fa’amoemoe e lau ai le fa’asalaga a Amituana’i ina ua ta’usala o ia i le mataupu na ia ulufale fa’amalosi ai i le fale o se aiga i Pago Pago, ua sauni fo’i le fa’amasinoga e tu’uina atu sana fa’aiuga i le talosaga a le Ofisa Fa’anofova’ava’aia, e fa’aleaoga poloaiga o le nofovaavaaia a Amituana’i sa tu’uina atu muamua, ona o lea ua fa’amaonia ua ia le usitaia ni isi o ia poloaiga, e pei o le fa’asa lea ona ia toe solitulafono a le malo.

 

SAMUEL WRIGHT

 

Ua toe tolopo le ulua’i iloiloga a le susuga a Samuel Wright lea na fa’ataunu’uina i le aso Faraiile na te’a nei, ina ua fa’ailoa e loia i le fa’amasinoga feutanaiga o lo o fa’aauau pea e tusa ai o lenei mataupu.

 

O Wright, o lo o tu’uaia fa’atasi ma ni isi ali’i se to’atolu, i lo latou auau fa’atasi lea e fa’ataunu’u se osofaiga fa’asaga i le faleoloa o le Gold Gonda Store i Fagaalu i le masina o Me o le tausaga nei, lea na latou gaoia fa’amalosi ai se tama’i pusa sa i ai se tino i tupe i totonu, ae tu’uaia ai Wright i lona fa’alala lea o se fana i le ali’i fa’atau oloa sa i le vaega tonu e i ai le masini tupe.

 

O le vaiaso na te’a nei na faia ai se maliliega i le va o le malo ma le susuga a Alatuna Simi, o le isi lea o lo o to’atolu i ai i latou o lo o tu’uaia i lenei mataupu, peita’i e le i mafai e le Samoa News ona maua vaega uma o lenei fa’amaliliega, ona e le i fa’atagaina tusitala e auai i le taimi na tolaulauina ai tu’utu’uga o lenei maliliega i luma o le afioga i le ali’i fa’amasino ia John Ward II.

 

Ua toe taofia nei Wright i le toese i Tafuna e fa’atali ai le isi aso lea ua fa’atulaga e toe fofogaina ai lana mataupu i luma o le fa’amasinoga maualuga.