FERNANDEZ EUINI

E 12 masina lea ua poloaina e le fa’amasinoga e taofia ai le susuga a Fernandez Euini i le toese i Tafuna, ina ua ta’usala o ia e le fa’amasinoga i le moliaga mamafa o le fa’ao’olima i le tulaga lua, e mafua mai i le fa’alavelave lea na ia la fa’ao’olima ai ma le isi alii i se tama talavou e 17 tausaga le matua i le aso 3 Ianuari 2014.

Na fa’atoese Euini i le fa’amasinoga e tusa ai o lana solitulafono sa fai, ma ia talosagaina ai se isi avanoa mo ia. Sa ia faatoese foi i lona aiga atoa ai ma le aiga o le ali’i na a’afia, ina ia fa’amagalo sona sese.

Na finau le loia a Euini ia Joel Shiver i le fa’amasinoga mo se fa’asalaga fa’anofova’ava’aia mo le ua molia, peita’i na finau le malo e lava le 6 masina e taofia ai Euini i le toese, e fai ma lesona mo ia i lenei mataupu.

Saunoa le afioga i le ali’i fa’amasino ia Michael Kruse e fa’apea, e foliga mai i mau faamaonia o le mea sa tupu ua latou faitau i ai, ua mafua ona salamo Euini ona ua ta’usala o ia e le fa’amasinoga, ae o manu’a na a’afia ai le alii na a’afia atoa ai ma le auala na fa’atino ai e Euini lenei solitulafono, e matua ofoofogia lava ma mata’utia, ae o le itu e laki ai e le i matuia tele manu’a na aafia ai le na manu’a.

E 5 tausaga na manatu le fa’amasinoga e faasala ai Euini i le toese, peita’i ua fa’amalumalu lona tuliina o le fa’asalaga, ae ua nofovaavaaia o ia mo le 5 tausaga i lalo o poloaiga a le fa’amasinoga e ao ona usita’i i ai.

O ni isi o ia poloaiga e aofia ai lona tuliina o masina e 20 i le toese, peita’i ua manatu le fa’amasinoga, ua lava masina e 12 e taofia mo’i ai o ia i le falepuipui, ae o le a talia fo’i se talosaga na te fa’aulu e tatala ai o ia i tua e faigaluega ma tuli lona fa’asalaga.

Ua faasa ona ia toe tagofia le ava malosi, ma faasa ona ia toe soli se tulafono pe toe mafuta atu i tagata o lo o latou tagofia le ava malosi i taimi uma o lana nofovaavaaia.

EDDIE SATELE

O le ali’i lea na ta’usala e le fa’amasinoga fa’aitumalo i moliaga mama e lua o le fa’atupu vevesi i nofoaga faitele, atoa ai ma le inupia ae le’i atoa le 21 tausaga le matua, ua nofovaavaaia nei o ia mo le umi e 12 masina i lalo o tuutuuga a le faamasinoga e ao ona usita’i i ai.

O tu’uaiga fa’saga ia Eddie Satele na alia’e mai i le fa’alavelave lea na tula’i mai i le aso 25 Oketopa i Ottoville, ina ua ia ‘ona ma faia ni gaioiga e ono save’u ai le nonofo filemu o tagata lautele.

Na fa’ailoa e le ali’i fa’amasino ia Elvis P. Patea ia Satele e fa’apea, e ui o le taimi muamua lenei ua ta’usala ai o ia i se solitulafono, o le itu fa’anoanoa ona o lea ua amata sese lona olaga talavou i le avea ma se tasi ua ta’usala i ni solitulafono.

Na fautua Patea ia Satele e faaaoga le avanoa ua avatu e le faamasinoga ia te ia, e saili ai se isi lumana’i lelei mo lona olaga, ma ia usita’i fo’i i poloaiga uma o lana nofovaavaaia ua tu’uina atu o ia.

O ni isi o tuutuuga o le nofovaavaavia a Satele e aofia ai le faasa lea ona ia toe tagofia le ava malosi, aua nei ona toe soli se tulafono, o le a faia foi ni suega i lona tino e suesue ai po o ia faaaogaina fualaau faasaina.

O isi poloaiga e aofia ai lona totogiina o le salatupe e $150, ma ia auai i ni aoaoga e fesoasoani ai i le tulaga o lona tagofia o le ava malosi.