Ads by Google Ads by Google

Tala otooto mai le Fa’amasinoga

IOE TAPENI PIO I TUUAIGA A LE MALO

 

O le alii e 20 tausaga le matua lea na ia tu’iina le ulu o se isi alii i se ma’a, ua ia tautino i le faamasinoga maualuga ananafi, e faamaonia tuuaiga faasaga ia te ia.

 

E lua moliaga na ulua’i tuuaia ai e le malo le alii talavou o Tapeni Pio, ona o le faalavelave lea na manu’a ai Taisia Ale i le masina o Mati, o ia moliaga e aofia ai le moliaga mamafa o le faaoolima i le tulaga lua, faapea ai ma le moliaga mama o le faatupu vevesi i nofoaga faitele.

 

Ae i lalo o le maliliega lea na sainia e le ua molia ma faamaonia e le faamasinoga ananafi, sa ia ioeina ai le moliaga o le faaoolima i le tulaga lua, ae solofua e le faamasinoga le moliaga mama o le faatupu vevesi i nofoaga faitele.

 

I le tali ioe ai o Pio i le moliaga e pei ona tausala ai o ia, sa ia tautino ai e faapea, i se taimi o le aso 27 Mati, 2013 i Amerika Samoa, sa ia tu’iina ai le ulu o Ale i se ma’a, ma o lea gaioiga sa ia faia sa le tusa lea ma ala o le tulafono.

 

Ua malamalama le ua molia, o le a le mafai ona toe suia lana tali ioe ua tuuina atu i le faamasinoga, pe afai e tuuina mai se faasalaga a le faamasinoga ae le tusa ai ma lona mana’o.

 

O lo o taofia pea Pio i le toese i Tafuna e faatali ai le aso 6 Tesema lea ua faatulaga e lau ai lona faasalaga.

 

ROMEO PERETANIA

 

O le aso 6 Tesema, 2013 i le itula e 9:00 i le taeao lea ua faatulaga e tuu atu ai le faasalaga a le faamasinoga maualuga faasaga i le alii o Romeo Peretania, i le maea ai lea ona ia ioeina o le moliaga o le tete’e atu i leoleo a’o taumafai e pu’e faapagota o ia, i lalo o se maliliega sa latou sainia ma le malo ma talia e le faamasinoga.

 

Na ulua’i tuuaia e le malo ia Peretania, 36 tausaga le matua i moliaga mamafa e lua o lona umia faasolitulafono o se vaega o le pauta faasaina o le aisa ma le tete’e atu i leoleo a’o taumafai e pu’e faapagota o ia, faapea ai ma le moliaga mama o le faatupu vevesi i nofoaga faitele.

 

Ae i lalo o le maliliega lea na sainia e le malo ma ua talia fo’i e le faamasinoga, ua manatu ai le malo e tali ioe le ua molia i le moliaga feololo o le tete’e atu i leoleo a’o taumafai pu’e faapagota o ia, ae solofua le moliaga pito sili ona mamafa o lona umia faasolitulafono lea o se vaega o le pauta oona o le aisa, ma le faamoemoe e tulei ma faatau atu isi tagata, faapea ai ma le moliaga mama o le faatupu vevesi i nofoaga faitele.

 

I le tali ioe ai o Peretania i le moliaga e pei ona tausala ai o ia, sa ia tautino ai e faapea, i se taimi o le aso  28 Mati, 2012 i Amerika Samoa, sa ia sola ese ai mai ni leoleo ina ua ia iloa o loo o atu leoleo nei e pu’e faapagota o ia, ona o se poloaiga sa tuuina atu e le faamasinoga.

 

Na tautino le ua molia e faapea, o le taimi lava na ia vaaia ai leoleo, sa ia taumafai ai loa e tamo’e ese, ma o lea gaioiga ua le tusa lea ma ala o le tulafono.

 

Ua malamalama le ua molia i tuutuuga o le maliliega ua latou faia ma le malo, lea e aofia ai  e le mafai ona toe suia lana tali ioe ua maea ona tuuina atu i le faamasinoga, pe afai e tuu mai se faasiuga a le faamasinoga ae le tusa ai ma lona mana’o.

 

O Peretania, sa ta’usala muamua e le faamasinoga i ni tausaga e le’i mamao atu, ona o solitulafono sa tuuaia ai o ia e le malo sa faamaonia e le faamasinoga, ma o le taimi nei, o lo o tumau pea poloaiga o lo o tatala ai o ia i tua, e faatali ai le aso e lau ai lona faasalaga.

 

NOFOVAAVAAIA LE ALII GAOI FAGU PIA

 

O le alii e 23 tausaga le matua mai Tafuna lea na ulufale i totonu o se faleoloa i Tafuna i le masina o Aokuso na te’a nei, ma ave se fagupia e aunoa ma lona totogiina, ua nofovaavaaia mo le 12 masina i lalo o poloaiga a le faamasinoga.

 

O le alii o Nathan Tupulasi na tausala e le faamasinoga faaitumalo i le moliaga mama o le gaoi, ma ua poloaina o ia e le faamasinoga na te toe totogi le tau o le fagupia e $2.65 i le faleoloa na ia gaoiina mai ai le fagupia, atoa ai ma le salatupe e $100 e totogi i le faamasinoga.

 

I le nofovaavaaia ai o lenei alii talavou, ua faasa ai o ia e le faamasinoga ona ia toe tagofia le ava malosi, pe toe tu foi i le faleoloa na aafia.