Ads by Google Ads by Google

Tala oto’oto o le Pasefika

FA’AAUAU MATA’UTIA ASIOSIO I AUKILANI

O le to’alua lea na maliliu fo’i i le asiosio i Aukilani, ua fa’ailoa mai na tanumia i la’ua i sima na felelei solo i le malosi o le asiosio ma ua iloga ai, e le o sefe lava lou fealua’i i Aukilani, aua ua fa’aopoopo nei i ai ma le lologa i le malolosi o matagi.

O nisi vaega o Aukilani, ua na ona a’afia i matagi malolosi ua mae’a fa’ailoa o se afa, ae o le isi itu, lea e fealua’i solo ai le asiosio, ma e matua fita ma matautia mea ua va’aia e i latou o alaala i na itu, aua e o’o i taavale ua feagia’i solo i luga o le ea, ona o le malosi o matagi o i ai.

Ua fa’ailoa mai, e ese mai ananafi, ua to’afitu isi tagata ua avea i le falema’i ona o tulaga ogaoga o manu’aga o i ai, ma le 150 o fale nofo o aiga, ua fa’atama’ia leaga faia e le matagi. Ua fa’amatala mai e le au fai lipoti o nusipepa a le NZ Herald, “Ua foliga mai e lua ni asiosio e foliga o ni twister ua fealua’i solo i le itu i matu ma sisifo o Aukilani, ma e leai ma se mea o toe sao i lona ala. E pau le mea o fai nei a le vaega va’ai tau, o le taumafai e tau matau po’o fea lea o le a aga’i atu i ai le asiosio lea ma lapata’ia ia nofoaga ia sauniuni.”

Ua o’o le asiosio lenei i Hobsonville i le itu i sisifo o Aukilani, ma ua va’aia fo’i le lia’i fa’atasi ma a’a i luga o la’au tetele, le toe i ai ni taualuga o fale, ma ua ta’ei le tele o fa’amalama o fale o aiga i lena itu o le a’ai. E o’o mai i le taimi nei, ua le toe i ai se va’alele o toe alu ese mai Aukilani, fa’apea ma ni feoa’iga, ua taofia femalaga’iga i alatele i le taimi nei.

PUIPUIMALU FALETUPE - PAGOTA SOSOLA

Ua fa’ailoa mai le tima’iga ua fa’amalosia nei ia matua fa’ateleina le leoleoga a leoleo i Faletupe i totonu o Hawaii ina ua sosola i tua ni ali’i pagota se to’alua, ae ua mau tala leoleo, o lo’o iai le la’ua fa’anaunauga, e fia sofa’ia ni faletupe i le a’ai.

Ua i ai nei le fa’amalosiga ua fa’atonuina ai Ofisa o Leoleo, ia matua leoleomalu so’o se faletupe ma nofoaga o ATM, ae maise fo’i faleoloa e tatala umi aga’i atu i itula o le vaveao. O le ali’i pagota muamua e 35 tausaga le matua, o Jarvis Naoki Higa. E foliga sapani o ia, ma e tusa ma le 5ft 6” le umi ae 160 pauna lona mamafa, e oti pupu’u lava lona ulu lanu uliuli ae i ai pe’a e ta i lona fatafata. Ua fa’ailoa mai, e tauau o lo’o umia e ia se fana ma e tatau ona nofouta tagata e mata’utia fo’i solitulafono e mafai ona fa’ao’o e lea ali’i pagota i so’o se taimi. O le fasioti tagata na saisaitia ma fa’amaonia ai le nofosala o lea ali’i e le fa’amasinoga.

Ole pagota lona lua e 31 tausaga le matua o Ryan James Jeffries Hamar. E tali tutusa o la’ua mamafa 170 pauna, o se tagata enaena e 5ft7” lona umi ae o lo’o tatali se tala mai lona palola, ae na toe molia ona ua sola i tua mai le falepuipui i Hale Naniia Aukuso 2012, e mata’utia fo’i solitulafono e ono faia e lenei sui i so’o se taimi. Ua tima’i mai leoleo i tagata nu’u uma o Hawaii, fa’amolemole vala’au 911 pe a masalomia ua e fetaui pe e te va’aia nei sui i nofoaga faitele po’o lou vainu’u fo’i.

O le vave ia o le sosola a nei sui, ua faailoa mai na lipotia mai e se tasi i le 10:00 i le taeao o lo’o va’aia i totonu o se ta’avale, ae o’o ane i ai leoleo 5 minute, ua leai nisi ae ua tia’i ai lava i’ina le ta’avale sa i ai i totonu.

UNA’IA MALOSI FUSU’AGA I FITI

O lo ua fa’ailoa mai ua toe taumafai atili le Asosi Fusu a Fiti le Fiji Boxing Commission, e toe fa’aolaola ma fa’atula’i mai Fusu’aga i totonu o Fiti, i le mea sa masani ai, o le tauva mo fusi o le lalolagi, ma fusi fo’i fa’avaomalo a latou tama fusu.

O le sui o Fiti ua iloga mai ua avea ma sui o le World Boxing Federation Saki Veitogavi, ua avea nei ma se tasi e fa’apuluina mai lea fa’amoemoe ia gaua’i Kalapu fusu a le latou malo ia toe a’e le fusu’aga i totonu o Fiti ma tauva ai i latou i fusi maualuluga o le lalolagi atoa.

Ona ua avea se tasi o tama fanau a Fiti ma sui o le WBF, o se isi lea fa’aosooso o mea lelei i le Asosi Fusu a Fiti i le taimi nei, ma ua iloga fo’i, ua feso’ota’i mai ma Samoa i tulaga o fusu’aga fa’avaomalo. Ua tatau fo’i ona tatou faia lea tulaga, aua ua iloga mai, e sili atu le tofiga o lo’o tula’i ai se tasi o alo o Amerika Samoa i le AIBA nai lo le sui lea mai Fiti, ae o lo’o fa’atalale lava Amerika Samoa i lea sao ua tatau ona fa’aaoga i lona malosi’aga e tatau ai.

Ua fa’ailoa mai e le FBC ua mae’a fa’ailoa mai e le WBF o le latou alo o Vaitogavi, ua avea nei ma latou sui iloga i totonu o Fiti e va’ai toto’a i tulafono ma aiaiga uma o fusuaga fa’avaomalo, ia fa’atautaia i fusuaga i totonu o  Fiti, ma ia fai se sao o lea tofiga, i le fa’aleleia atili o tomai e fusu ai alo o Fiti i fusu’aga fa’avaomalo i le lumana’i.

O le tala mai a Veisamasama o se sui iloga o le FBC, “O se mea sili lea ua tupu mai mo Fiti e ala i lea fo’i fa’agatama, o le fusu fa’apolofesa pe o fusu’aga fa’avaomalo.”

saunia: Leua Aiono Frost