Ads by Google Ads by Google

TALA OLE LALOLAGI

ULUA’I SUI O LE ISIS UA MAUA E FITAFITA AMERIKA

 

Ua fa’amaonia mai i ripoti a fitafita Amerika mai totonu o le malo Iraq lo latou taofia fa’apagota lea o le ulua’i fitafita mai le vaega a le ISIS, i le mae’a ai lea o se osofaiga mata’utia ma le malosi na fa’atautaia i le aso ananafi, lea ua atoa le lua vaiaso o tau fuafua mai, i lalo o se gaioiga e galulue fa’atasi ai fitafita Amerika ma fitafita Iraq. O le ali’i o Abu Sayyaf, o se tasi lea o tagata fa’amoemoeina a le ISIS o lo o autu i ai a latou nofoaga o lo o teu ai le tele o meatau fa’apea ai pagota o le taua i le itu i Saute o Iraq. Ina ua pu’e fa’apagota e fitafita Amerika ma Iraq le to’alua o Sayyaf mai totonu o Suria i le tausaga na te’a nei, na mafai ai loa ona fesoasoani fa’amatalaga uma sa tu’uina atu e le fafine i fitafita e tau saili ai le nofoaga e maua ai Sayyaf, ma pu’e fa’apagota ai loa o ia i le aso ananafi. Ua tu’uina atu e fitafita Amerika le ali’i o Sayyaf i fitafita Iraq ma le fa’amoemoe e fesiligia mo le tu’uina mai o ni isi fa’amatalaga e fa’atatau i le vaega a le ISIS.

 

TA TIPI E SE ALII TAMAITI AOGA E TO’A 10 I SAINA

 

E to’a 10 tamaiti aoga mai se aai o Saina na manunu’a ina ua ta tipi e se alii i latou i se naifi (tulou), fa’atoa pule ai loa lea ali’i i lona ola. O le itu e laki ai e pei ona taua i ripoti, e leai ma se tamaititi na maliu, ae o lo o taofia pea i se tasi o falema’i ma ua aga’i ina manuia i latou. E ui e le o manino tonu le mafua’aga o le fa’alavelave, peita’i na taua i ripoti mai le au fa’asalalau e fa’apea, o Saina le isi atunu’u o le lalolagi e numera tasi i ituaiga fa’alavelave nei, o le ta tipi o tamaiti aoga e aunoa ma se agasala. O le tausaga e 2014 na ta tipi ai fo’i e se isi ali’i ni tamaiti aoga se to’atolu, fa’atoa pule ai i lona ola e ala i lona puna i lalo o se ala laupapa ma maliu ai.

 

UMA LE PUSA ONOSA’I O AMERIKA IA RUSIA

 

Na fa’aalia e le Ta’ita’i Fitafita a Amerika ia Gen. Philip Breedlove i se iloiloga sa faia i luma o le Komiti o Vaega’au a le Senate i le taeao ananafi, o le taimi lava e la’asia ai e au tau a Rusia eleele ma laufanua fa’asaina i lalo o tulafono a Malo Aufa’atasi, o le taimi fo’i lena e tulioso ai loa va’alele tau a Amerika e osofa’i ma amata loa le taua i le va o Amerika ma Rusia i totonu o le atu Europa. O va’alele tau fa’apitoa a Amerika lea ua taua o le Black Knave, ae fa’aigoa e Rusia o le White Swan, ua mae’a ona fa’aa’upegaina mo soo se taimi e tula’i mai ai se osofaiga fa’asaga ia Rusia. Na taua atili e le ta’ita’i fitafita i luma o le Senate e fa’apea, o le vaiaso na te’a nei na la’u atu ai e Rusia le silia i le 10,000 o fana e fesoasoani ai i fitafita a le ISIS i Suria, ma ua atagia mai ai le lagolago malosi e Rusia o faiga fa’atupu fa’alavelave o lo o faia e le ISIS fa’asaga i soo se malo o le lalolagi e aofia ai ma Amerika.

 

AFAINA ITU TAU TUPE A PAPUA NIU KINI

 

Ua fa’aalia e le Failautusi o le malo o Papua Niu Kini ia Isaac Lupari i vaega fa’asalalau le tele o se vaega tupe a le malo o lo o maua mai i fesoasoani mai atunu’u tetele o le lalolagi ua le toe maua, ona o le fa’amatala o ofisa o le malo i le fa’atinoina o aiaiga o lo o moomia mai e ia atunu’u mo le fa’aaogaina o tupe. O le misia ai o le faitau piliona ma piliona mai atunuu tetele e pei o Saina, Initia, Ausetalia, Niu Sila,  Amerika, fa’apea ai atunuu o le atu Europa, na taua ai e Lupari le tele o se a’afiaga i ni isi o tautua i totonu o le malo e pei o falema’i ma aoga, ma, e oo ina a’afia ai ma le auaunaga a le malo mo tagata lautele. O lo o galulue malosi pea le malo o Papua i le faia o auala e toe maua ai nei vaega tupe.