Ads by Google Ads by Google

Tala o taaloga

FAASALA COLLINS $1,900 INA UA TATALA TUA MAI LE FALEPUIPUI

 

E $1,900 le salatupe lea ua malie le alii o Jerry Collins na te totogiina i le faamasinoga a le malo o Iapani, ona o le faalavelave lea na ia fealua’i ai ma ni tama’i naifi se lua i le po o le aso 17 Mati, o le po foi lea na loka ai o ia e leoleo.

 

I se ripoti mai le New Zealand Heralds sa taua ai e faapea, ua sauni le alii o Collins e toe foi atu i Niu Sila i le maea ai lea ona ia totogi o lea salatupe, ma ua sauni foi lona aiga i Niu Sila faatasi ai ma ana uo e faatali lona toe foi atu i lona atunuu.

 

O lo o i ai Collins i Iapani i sana konekarate lakapi, ma o lo o taua mai e lana kalapu lona fiafia pea e taalo i Iapani, e ui i le faalavelave e pei ona loka ai o ia i le falepuipui.

 

FAALETONU AU A NIU SILA I LE SUPER 15

 

Ua taua mai ini ripoti le tulaga faaletonu o nisi o au a Niu Sila i le taamilosaga a le Super 15, lea e tausinio ai au mai Niu Sila, Ausetalia ma Aferika i Saute.

 

Na pau le au feololo a Niu Sila o lo o i ai, o le au a le Waikato Chiefs lea na sianupini i le taamilosaga o le tausaga na te’a nei.

 

O lo o tulaga lelei au a Aferika i Saute ma Ausetalia i le taamilosaga i le taimi nei, ma e le taumate ae manuia se taumafaiga a se au mai ia atunuu i le sailiina o le siamupini.

 

FAATUSA GENNADY GOLOVKIN IA MIKE TYSON

 

O le malolosi o tu’i a le alii fusu lenei o Gennady Golovkin ua mafua ai ona faatusa o ia e le au faasalalau i le fusu tautaua o le lalolagi o Mike Tyson.

 

O Golovkin o lo o ia umia le siamupini o le aupaga a le middleweight mai le atunuu o Kazakhstan, ua faatusa le malolosi o ana tu’i faatasi ai ma lona malosi ua i ai ia Tyson.

 

Ua 25 fusuaga a lenei alii na manumalo uma ai, e aofia ai manumalo e 23 i le tu’ioti.

 

O isi aupaga i fusuaga a le lalolagi o lo o maitauina ai foi ni isi o tama fusu lauiloa ma le malolosi, ma atonu o se taimi o i luma o le a tulai mai ai foi se isi tama fusu e uiga ese ni ona talaaga.

 

FAASI’USI’U MATA TUA IA THOMPSON

 

E foliga mai ua naunau lava le pulega a le alii o David Tua mo le faia lea o se fusuaga ma le alii Amerika o Tony Thompson. O Thompson o lo o i ai lona igoa i le lisi o tama toa 10 pito i luga o tamafusu i le paga mamafa a le lalolagi.

 

I se ripoti na taua ai e faapea, ua maea ona tuuina atu e le vaega o lo o faalauiloaina fusuaga a Tua ia Duco Events se ofa tuu gutu i le pulega a le alii o Thompson mo se fusuaga a nei alii, ma o lo o faatali le taimi e faamaonia mai ai.

 

Na gata mai le fusu a Tua ina ua faiaina i le alii Amerika o Monte Barrett i ‘ai i le tausaga

 

O le alii o Thompson ua 41 nei ona tausaga, 37 manumalo e aofia ai manumalo i le tu’i oti e 25, ae 3 ana faiaina. O Tua ua 58 ana fusuaga, 52 manumalo e aofia ai manumalo e 43 i le tui oti, ae ua 4 ana faiaina.

 

LATALATA ALEX LEAPAI I LE FUSI O LE LALOLAGI

 

Ua vaaia le agai atu pea i luga o taumafaiga a le alo o Samoa ia Alex Leapai i le taaloga o le fusuaga, e pei ona tusia ai lona igoa i le tulaga lona 9 mo le fusi o le IBF i le aupaga mamafa.

 

O le laasaga ua ausia e Alex na mafai ona ia maua ina ua ia faatoilaloina se tasi o alii Amerika i le masina na te’a nei i Ausetalia, lea na ia manumalo ai i le tu’i oti i le taamilosaga muamua.

 

E ui e lei faalauiloaina mai se isi paga a lenei alii Samoa, peitai o lo o i ai tusitusiga e ono maua sona avanoa e fusu ai i le fusi o le lalolagi i i se taimi o le tausaga fou, pe afai ae tumau pea le lelei o lana fusu o lo o i ai i le taimi nei.

 

O Alex ua 34 ana fusuaga ua maea ona faia, 27 manumalo, 4 faiaina ae 3 tutusa, ae ua 33 tausaga o lona soifua.

 

Faaliliu: Toleafoa Haserota Auvaa / AF