Tala o le Vaifanua
TETE’E LOIA A SOLOFA I LE TALOSAGA A LE MALO FETERALE
O le amataga o le vaiaso na amata ai le fa’amasinoga a Paul Solofa, ma o molimau autu o lenei fa’amasinoga, e aofia ai Gustav Nauer, lea na fa’afoeina le vaega o pasi a’oga ma Oscar Mayer, le pule o le Pacific Products, lea na sapalaia totoga mo pasi aoga. Ua mae’a ona tali ioe Nauer i ona moliaga i lenei mataupu ma o le a lauina lona fa’asalaga i se vaitaimi o lenei tausaga, ae e le o molia Mayer.
Ua fa’aalia le tete’e o loia a Paul Solofa i se talosaga ua fa’aulu e loia a le malo feterale, ina ia fa’ataga i totonu o le fa’amasinoga a Solofa, i le fa’ai’uga o lenei masina, ia ni isi molimau e fa’atatau i seisi fo’i taupulepulega fa’asolitulafono, na a’afia ai Solofa ma Gustav Nauer ma ni siaki mo le totogia o taimi faigaluega, i tua atu o taimi faigaluega fa’atulagaina (overtime).
O lo o fa’apea fo’i ona tete’e loia a Solofa, i fa’amatalaga, sa fa’apea, na faia e Solofa i vaega su’esu’e a le malo feterale, lea o lo o ta’ua, na fa’amaonia ai e Solofa lona a’afiaga i le filifiliga o sana kamupani e sapalaia mea’ai mo le polokalama o taumafa a fanau a’oga.
O lo o molia Solofa i totonu o se fa’amasinoga feterale i le laumua i Uasigitone, i faitauga ta’itasi, o lona fa’alavelave i su’esu’ega a sui feterale fa’apea ma lona taumafai e u’una’i se molimau ina ia ufiufi lona a’afiaga i totonu o se taupulepulega, ina ia soli le tulafono, a’o avea o ia ma fa’auluuluga o le ofisa pisinisi a le Ofisa o Aoga, i ni nai tausaga ua tuana’i.
O le taimi lava lea e tasi a’o avea Solofa ma fa’auluuluga o le ofisa pisinisi a le Ofisa o Aoga, o lo o taofi le malo feterale, na taupulepule ai Solofa ma Nauer ina ia maua e le aufaigaluega a Nauer siaki mo taimi faigaluega le fa’atulagaina (overtime), aemaise ai o le mauaina e se kamupani o lo o a’afia ai Solofa, ia se konakarate e sapalaia ai mea’ai mo le polokalama o taumafa mo fanau aoga.
O le Aso Faraile o le vaiaso ua mavae, na fa’aulu ai e loia feterale ia se talosaga ina ia molia Solofa i tu’ua’iga o le taliaina o tupe mo le solia o le tulafono po o le gaoia o tupe mo polokalama feterale.
Ae o lo o masalomia ia Solofa i lona taupulepule ma nisi e fa’atau ni totoga mo pasi aoga, ae le toe maua mai lava le oka o nei totoga ae le gata i lea, na talia e Solofa ma nisi ni tupe fa’apea ma nisi totogi, i le va o le 2002 ma le 2007.
O lo o finau loia a Solofa, e na’o le pau ia o fa’amaoniga ua mae’a ona ioe mai le fa’amasinoga, e mafai ona fa’aaoga i tu’uaiga o le fa’alavelave o Solofa i galuega a vaega su’esu’e a le malo feterale.
Na fa’aalia foi e Solofa e fa’apea, o le toe fa’aopoopo o molimau ae e leai ni m oliaga, o se tulaga o le a ono nunumi ai le fa’amasinoga ma ono fa’aseseina ai vaega su’esu’e o le fa’amasinoga.
Ma o lo o taofi fo’i le itu tete’e, e leai ni tu’ua’iga e fa’apea na taumafai Solofa e fa’alavelave i su’esu’ega a vaega su’esu’e o le malo feterale, i le mataupu i ovataimi, po o le tulaga i le konakarate mai i le polokalama mo taumafa a fanau aoga.
TULAFONO MO TA’AVALE PIKIAPU
Na ripotia mai i Samoa se tulaga mafatia na o’o i ai ia ni isi o le ‘au ta’alo lakapi a le Manu Samoa, ina ua lavea le ta’avale sa o latou faimalaga mai ai ina ua mae’a a latou toleniga i se tasi o taeao.
E fa’apea o le ta’avale sa fa’aaoga e le ‘au ta’alo, o se pikiapu ma e to’a 47 ni tama ta’a’alo sa nonofo i tua ma o le to’atele o i latou na fa’atopetope atu i le falema’i ina ua lavea le ta’avale.
Ma ona o lea tulaga, ua amata fa’amalosia ai i totonu o Samoa le tulafono, e fa’asa ai ona toe nofo seisi i tua o pikiapu, seia vagana o se fa’alavelave fa’afuase’i.
I totonu o Amerika Samoa, na fa’amaonia mai e le ofisa a leoleo, le leai o se tulafono e fa’asa ai lea tulaga. Na ta’ua e le susuga Lt. John Cendrowski, e mafai e fanau iti ona nonofo i tua o pikiapu pe afai o i ai se tagata matua. Ae o lo o fa’asa pea ona toe nofo seisi i luga o aupa o le pusa o le pikiapu.