PUIPUI E LE KOVANA ANA TAGATA FAIGALUEGA

“Ona o le to’atolu lea, ua mafai ai ona matou fa’atautaia le Malo mai le muta’aga o le isi faigamalo ua tuana’i ma lenei fo’i fa’afoega ua toeititi atoa le tausaga!” O se fa’aupuga lea a Kovana Lolo Moliga e tusa ai o nisi o fa’asea sa lagona fo’i mai tagata faigaluega maualuluga i nisi o matagaluega, ae maise ai lana lava Kapeneta.

I le fonotaga lona 11 sa usuia a le Kovana ma lana Kapeneta, sa ia fa’ailoa mai ai lona taofi e tusa o le tele o le galuega a i la’ua o ta’ita’ia le Faigamalo, o lo’o tau’avea e nei sui e to’atolu, o lo’o ia fa’amoemoe tele i ai: Loia o Steve Watson, I’ulogologo Joseph Pereira ma Fiu Johnny Saelua.

“I so’o se taimi e o’o ane ai se mataupu i lo’u mafaufau, i so’o se vaitaimi o le po ma le ao, ou te telefoni loa lava i so’o se tasi o le to’atolu lea, ma talanoa i ai, ma faia ai se fa’ai’uga o se gaoioiga e ao ina latou faia, ia vave ona fa’afo’ia se mataupu e alia’i mai! O lea faiga ua toeititi lava atoa le 24 itula o aso ta’itasi, o fa’aaoga ai nei sui, e le malolo lelei i latou. O le taua lena ona fa’atino o se suiga i se mea a le tatou malo ia i latou ma ma i ma’ua fo’i o lo’o taumafai atu e ta’ita’ia le tatou malo!”

Na ia toe fa’amamafa mai i lana tima’iga i Fa’atonu o Matagaluega ta’itasi, “O le tulaga o i ai nei, e matua tele se vaega o le ma’ua pito la’au tau’ave o lo’o fa’atino e sui nei e to’atolu, e mautinoa, e ma te le iloa ona faia o mea uma, ae o nei sui, ua tele se latou avega e si’itia ese atu mai o ma’ua tau’au, afai la e le i ai i latou nei, e le mafai ona fa’atino le tele o suiga tatau, ua mae’a faia nei mo le tatou malo!”

E ui la i lea tautalaga, peita’i, ua avea fa’afautuaga fo’i e le Taiulu o le tatou faigamalo, ia manatu po’o ni fa’asea sa fofogaina e lana Kapeneta ma tagata faigaluega maualuluga i matagaluega ta’itasi, ona ua tau sopoia fo’i le va tapuia fa’atagata faigaluega i o latou tofi o galulue ai i nisi o fa’atonuga ma ni poloa’iga fa’amalosi ua fa’ao’o atu e i latou nei.

“O le tatou faigamalo e matua taua ai fautuaga fa’aulu mai, o le a taga’i toto’a fo’i i ma’ua i nei fa’asea ua fa’ao’o mai, ma e moni lelei lava, ua matele ina matou fa’alogoina fo’i nei ituaiga o tima’iga a’o matou taumafai atu i suiga ua mae’a fa’atinoina nei!”

E le’i taumafai fo’i Kovana Lolo Moliga e ufiufi ni a latou fa’ai’uga ua sasi, sa ia fa’ailoa mai, “E tele taimi e matou te faia ai fo’i ni fa’ai’uga sese, e leai se tasi e sa’o pea, ae matou te toe feutaga’i lava ma toe taumafai e fa’asagatonu se mea ua sasi, ma fa’ailoa atu lava! Ia tatou iloa, o isi sese e faia, e matua mausali ai se mea ia sa’o ma lelei mo le atunu’u.”

FONOTAGA PNRS - NOFOAGA O LE VILIMA’A

Mai le fonotaga a le Komiti Fa’afoe o le PNRS ma le Kamupani Paramount Builders lea  e talosaga le pemita e fa’atautaia ai le latou Nofoaga o le Vilima’a i Tafuna - eleele o le FAA i le ulu o le malaeva’alele, na vevela ai ni taofi na fa’aalia e te’ena lea nofoaga mo le vilima’a.

“Ona o le nofoaga lava lea na mua’i fa’asea ai tagata e to’atele ona o le pefu ma le manogi o vaila’au eseese o lo’o fa’aleagaina ai le ea e manavaina e le mamalu o le atunu’u o nonofo tulata i lea nofoaga.”

Ona o lea itu, ua tetele ai manatu fa’asea na fa’alogoina i le fono fa’alaua’itele ma le PNRS ae maise le mamalu o nisi o lo’o nonofo tulata e aofia ai Happy Valley, Tafuna ma aoga e fa o lo’o aofia ai, Tafuna High, Tafuna Elementary ma le Samoa Baptist School ma le South Pacific Academy.

E ui la ina tetele pesega, ae i ai le mea na toe maua atu lava o se pito’afa taua o le fonotaga! Ua fa’ailoa mai, o le taeao o le fonotaga lea, o le taeao fo’i lea na sainia ai e le Kovana le pemita ua talia e fa’atuina lava le palusima ma le masini pefu a le Paramount Builders i lea lava nofoaga e tasi, sa fa’asaina ai le McConnell fo’i ia!

Ae o le tetele o nei faitioga ma tu’i fesili sa faia e sui totino o le PNRS, ae o ai e malosi lana fa’ai’uga, aua o lea e faia lea fonotaga ma le tele o fa’asea a le mamalu lautele o le atunu’u sa suia e Ms Bartley ma Wells i lea fonotaga, ae ua sainia e le tatou Taiulu le fa’atagaga e fa’atautaia ai ia galuega? O lona uiga e faia lea fonotaga, ae ua leva ona iloa e talia? Ae o fea a goto ai finagalo o le atunu’u e le taulia ua mae’a fa’aalia?

O lea lava fonotaga sa tufaina atu ai se pepa o lo’o ua failaina ma ua saunia e le to’a 221 tagata o lo’o nonofo i lea vainu’u, o e ua i ai afaina tumau o gasegase ma nisi fo’i e le manana’o e toe fa’atuina lea ituaiga o pisinisi i totonu o laueleele o le tualauta, aua e ogaoga gasegase e ono afaina ai o latou aiga i nei ituaiga o pisinisi.

fa’aliliu: Leua Aiono Frost