TALA O LE VAIFANUA

3 TOLAUAPIGA FA’ATAUTAIA 4H LAND GRANT-TUUAGA O AOGA

 

Ua fa’ailoa mai o le a fa’atautaia tolauapi e tolu a le 4H e amata ia Iulai 1-3, 2013 mo fanau a le vasega o fitafita ma e sa tautua i so’o se Vaega ’Au a Amerika. O tausaga faatulaga mo le fanau e aofia i le Apitaga e amata i le 6 tausaga se’ia o’o i le 12 tausaga le matutua. I le ulua’i aso e amata ai le tolauapi lea o le itula e 2:00 i le aoauli.

 

Ua fa’ailoa mai fo’i e mafai ona moe ai ma se matua e to’atasi pe afai e manatu e talafeagai mo lona alo. Ua fa’aauau mai lenei tolauapi mai le tausaga ua tuana’i, sa fa’atautaia ai fo’i lea lava tolauapi e le 4H e so’ofa’atasi ai ma le US Army Reserve, o polokalama e fa’ataua ai alo o i latou uma i vaega au.

 

E amata fo’i lea tolauapi i le itula e 2:00 i le aoauli, ma e faia fo’i i le ASCC Land Grant i aso ua fa’atulaga fa’apea ma le moetasi a i latou ua talia e lesitalaina. O lo’o fa’ailoa mai e leai se totogi mo le lesitala lea.

 

O le tolauapi lona tolu, ua fa’atulaga mo Iulai 15-19, 2013 ma e faia i le Faleta’alo o le Kolisi Tu’ufa’atasi i Malaeimi. O lea tolauapi ua talia ai le fanau e afua mai le 8 tausaga se’ia o’o i le 19 tausaga.

 

Ua fa’ailoa mai e matua tele mea e ao ina fa’atautaia ai mo le fanau, ma ua fa’atulaga e amatalia i le itula e 9:00 i le taeao seia o’o i le 1:00 i le aoauli, peita’i e le o fa’ailoa mai pe moetasi le tolauapi lea. Ia vala’au i le 699-1575 Ext 242, 243 mo se avanoa o lou alo i nei apitaga lelei mo lou alo e a’otau ai i nisi o tomai aoga a’o tu’ua a’oga.

 

A’OGA KUKA MO TUPULAGA

 

Ua tatala mai le avanoa e fa’aulu ai lou suafa e a’otau ai oe i lea fo’i taleni aoga tele o le “Kukaina o Mea’ai.” Ua na’o le 30 avanoa mo nisi o talavou e fia auai, ma e ao ai ina ia vave ona vala’au mo sou avanoa.

 

O taimi o vasega nei e amata i le 9:00 i le taeao se’ia o’o i le 2:00 i le afiafi e amatalia i le aso muamua o Iulai, 2013 i aso Gafua ma aso Lulu mo le 8 vaiaso soso’o. O le tina e fa’atautaia lea vasega o Malia A. Lemalu, o se tasi sa a’otauina fo’i i le A’oga Kuka, American Samoa Culinary Academy a le Polokalama NEG.

 

O nei a’oa’oga uma e faia lea i le Fale Palota Tuai a le tatou Malo i Utulei, ma ua fa’atautaia lea a’oga aoga tele mo tupulaga e le Matagaluega o Tupulaga ma Tina a le tatou Malo.

 

FOA’I SAU $1 MO CHARLIE

 

Ua taumafai mai Charlie le Tuna a le Kamupani a le Star Kist Samoa  ina ia fesoasoani i le taumafaiga e fa’ato’ai mai le aumalaga o Foma’i Fatu i le tatou atunu’u ina ia fesoasoani e faia talavai o ma’i fatu eseese mo a tatou fanauiti.

 

O lenei aumalaga e aga’i mai Oregon, ae o lo’o ofo mai le tautua mo i tatou, pe afai e totogia atu lo latou pasese.

 

O le a fa’atulaga atigi apa e mafai ona fafao i ai sau $1. ia faia ai sou sao mo lea fa’amoemoe aoga tele i a tatou fanau, ma ua fa’ailoa mai e Charlie, e tatau ona e faliu e faia lea foa’i, ina ne’i afaina ane lo alo ae ua fa’aleleia tomai ma agava’a o tatou tagata e siakia fanau iti.

 

O nofoaga po’o faleoloa nei ua fa’atutu ai nei atigi apa mo lau foa’i $1.00: Ace Hardware, Koko Bean, Cost-U-Less, McDonalds, Laufou Shopping Center, KS Mart, DDW, Blue Sky ma Carl’s Jr.

 

 

Comment Here