Ads by Google Ads by Google

Tala o le Vaifanua

TALOSAGAINA SE PEMITA A LE SAMOA EA MO LE VA O SAMOA E LUA

O le vaiaso na te’a nei na taunuu ai i le Matagaluega o Femalagaaiga a le malo tele o Amerika (USDOT) se talosaga mai le kamupani vaalele a le Samoa Ea, mo se pemita e faataga ai ona faia ni ana malaga i le va o Samoa ma Amerika Samoa.

O le tolu a’i lea o kamupani vaalele o le a ulufale e faatino le tautua mo femalagaaiga i le va o Samoa e lua, lea na amata i lana tautua i le va o Savaii ma Pago Pago, sosoo ai ma le va o Upolu ma le teritori ma fafo atu.

O le talosaga a le Samoa Ea o lo o aofia ai ma le talosaga mo se avanoa e faia ai ni ana malaga i malae vaalele e lua i Manu’a ma ia toe faaauau femalagaiaga i le va o Maota ma Pago Pago, o se tautua ua tusa nei ma le fitu tausaga e le’i toe faataunuuina.

O lo o faamoemoe foi le Samoa Ea e fealua’i i le va o Fagalii ma Faleolo ma le malae vaalele i Asau, Savai’i.

E 3 vaalele a le Samoa Ea ua faamoemoe e faatinoina lenei tautua.  O le taimi nei, e na o le Polenisia ma le Inter Island, o lo o tautuaina femalagaiga i le va o Samoa e lua.

I se tusi na tuuina atu e le afioga i le kovana sili ia Togiola Tulafono i le Failautusi a le USDOT, o Ray LaHood, e le gata o lo o taua ai e Togiola lona lagolagoina o le talosaga a le Samoa Ea, ae o lo o fofola atu ai foi ma le talosaga mo ni malaga i le va o Samoa ma Pago Pago.

FAAOPOOPO MALAGA A LE HAWAIIAN EA MO ASO FIAFIA

I tulaga lava o femalagaaiga i luga o vaalele, ua faalauiloa mai ai e le Kamupani Vaalele a le Hawaiin Ea a latou malaga faaopoopo e lua, amata atu i le aso 19 Tesema 2012 seia oo atu ia Ianuari 2, 2013 i aso Lulu o vaiaso taitasi, mo le faalauteleina o le latou tautua i le atunuu, i le va o Pago Pago ma Hawaii.

O ia malaga faaopoopo ua faia ona o le toatele o tagata ua fuafua e faimalaga i le va o motu ia e lua i vaitau o aso fiafia o le Kerisimasi ma le Tausaga Fou.

I se pepa o faamatalaga mai le HAL o lo o taua ai e faapea, e tuua e le vaalele Honolulu i le 4:40 i le afiafi ae taunuu mai i Pago Pago i le 9:30 i le po, ona toe tuua lea o Pago Pago i le 11:20 i le po lava lea, ae taunuu i Honolulu i le 5:35 o le taeao e sosoo ai.

TO’ILALO TALAVALU LAITI I LE ‘AU A SAMOA, 92-0

Na matua iloga ona faavavai e le Manu Samoa Laiti le Talavalu Laiti i le malae i le Apia Park i le afiafi o le Aso Gafua na sei mavae atu nei i ‘ai e 92 i le leai, peitai o lo o maualuga pea le faamoemoega o le alii faiaoga, o Leaupepe Terry Chang, o le a si’itia le tulaga o lana ‘au, pe a galulue malosi e fa’asa’o ni isi o mea sa sasi i a latou tapenaga, e pei ona maitauina i le latou taaloga ma Samoa.

Na fa’aalia e Leaupepe, “O le taimi muamua foi lenei ua ou faiaoga ai I se aufili!  O lona uiga, o le taimi muamua foi lenei ua matou tauva ai i se taamilosaga faavaomalo. O le tulaga lea ou te fiafia ai I le taumafaiga a le fanau e ui ina lami Samoa ia I matou, ona o lo latou agaga finau I le taimi o le taaloga. E lei talia i ni vai e le matou au osofaiga a le au a Samoa e ui ina lapopoa mamao toe lelei mamao tino o le au.  Peitai, o le faaaogaina o le polo ma a latou gaioiga na a’o na saofia ai osofaiga a le au ma tele ai a latou ai,”

Na ta’ua foi e Leaupepe i le tau tu’u faatasiga o le ‘au U19 a Amerika Samoa, “O le Iuni Lakapi a Samoa e faitau selau tama taaalo e fai mai ana filifiliga, ae o le Iuni Lakapi a Amerika Samoa, sa faasalalau pe i ai ni tama taaalo e fia auai I le filiina o se aufili mo i latou e i lalo o le 19 tausaga le matutua, Ia o nai tamaiti lava sa tali mai i lea faasalalauga, o lea ua fai ai nei le au ma e pe a ma le na o le masina e tasi sa sauniuni ai mo le taamilosaga lenei.”

“O le tulaga o lo o I ai nei le lakapi i Amerika Samoa e sa’o ai le upu fo’i lea e faapea, ‘O le Malaga e selau maila e amata I le la’a muamua,’” o le saunoaga lea a le alii faiaoga. “O lea faatoa amata le faigamalaga faavaomalo a au lakapi a Amerika Samoa ma e tatau ia i tatou ona tatou lagolago i a tatou tama taaalo i so o se itu e mafai ai! E tatau ona tatou saunia ni avanoa e taaalo ai ma au mai isi atunuu aua na o le pau lava lena o le auala e oo ai i le tulaga faavaomalo le latou taaalo. O le auala lena ua aofia ai nei le Manu Samoa I au e 10 pito I luga o le lalolagi, ma o le auala foi lea e tatau ona uia e le Talavalu!”

O le taaloga i le va o Samoa e lua o se tasi o taaloga i le aso muamua o le taamilosaga o au I lalo o le 19 tausaga a le itulagi o le Oceania lea o lo o faagasolo nei I Apia. O isi taaloga sa faia I lea lava aso na manumalo ai Vanuatu I le Atu Solomona e 55-8, ae faatoilalo e Toga ia Papua Niu Kini I ai e 58 I le leai.

Ua toe sauni nei la le Talavalu Laiti I lana taaloga lona lua I le itulae tasi i le aoauli a taeao ma le au mai Papua Niu Kini.

(Faitau i le tala i lagona fa’aalia o le Peresetene o le Iuni Lakapi a Amerika Samoa e uiga i lenei ta’aloga, i le aso a taeao).