Ads by Google Ads by Google

Tala o le Vaifanua

AMATA TAPENAPENA TAUMAFATAFA MO LE ASO FAAFETAI

E ese mai le fa’atauina mai o sau turkey mo le Aso Fa’afetai ua ofo mai e ni Kamupani Kuka, e aofia ai Sadies, Tradewinds ma Aoga Kuka a Sualua, ni faiga o le a matua fa’afiafiaina ai le aiga atoa. Aua le toe popole i le toe fa’avelaina o se  taumafataga mo le ‘aiga fiafia a lou aiga, ae fa’avela mai e i latou, ma toe fa’aopoopo i ai ma isi faiga aulelei, e fa’afiafiaina atili ai lau ‘aiga fiafia ma le agaga fa’afetai fiafia!

Ua tu’uina mai e le Sadies i ona fale’aiga e lua, i Utulei ma Fagatogo, o le a latou faavelaina le ‘turkey’, ma ona teuga eseese, e fa’aosofia ai lou fia taumafa pea lava i le latou fo’i metotia e taoina ai le turkey mo le Aso Fa’afetai.

Aua le avea le palota ma mea e te le va’ai mamao ai i si ou aiga, ia fa’amanatuina le aso Fa’afetai ma le fiafia ma lou aiga atoa i se ‘aiga matagofie o le tou turkey ua mae’a saunia lelei.

O leisi ofo, e mai i le susuga Sualua ma lana ‘au kuka i le Culinary Academy, lea ua mafai ona e okaina mai ai lau turkey ma le laina atoa o isi mea’ai e fa’aopoopo i ai, ma e mo’ona ai lou aiga. Ia e manatua, e le o toe lava se taimi e kuka ai i le aiga pe afai o le a o fo’i i le sauniga, e sili ai ona fa’ate’a muamua lava le totogi o lea fo’i oka fa’apitoa mo le to’ona’i a le aiga atoa, ona malolo ai lea o le kuka a le tina, ae matua o e si’i le fa’afetai i le Tama i lana tausiga ia i tatou, ua fa’asaoina ai le folauga a lou malo ma le manuia i lenei fo’i tausaga o palotaga.

Ua mafai ona e okaina nei tautua i nofoaga nei e lua ua fa’atautaia ai kuka manogi o le turkey mo le mamalu o le atunu’u e le ASCulinary Academy.

E ese mai nei lava ‘aiga mo aiga atoa, ae o lo’o ofo mai fo’i le pa’u mo ulugali’i na’o i la’ua lava i nei lava nofoaga e lua, ae maise ai o le faletalimalo tele o le Tradewinds i lana fale’aiga o le “Equator - where North meets South!” O lo’o i ai lava a latou teuteuga fa’apitoa, ma ua i ai fo’i le tau fa’apitoa mo lea vaitaimi o le agaga fa’afetai, ua afifi mai lenei fo’i aso le agaga fa’afetai o le Tradewinds mo i latou uma ua fa’aaogaina fo’i le latou tautua mo le lautele e ala i nofoaga e fa’amautu mai i ai, ae o aiga fa’apitoa o latou aso fa’ailogaina i le tausaga atoa!

Tagai i totonu o le tatou Samoa News i tau, numera telefoni ma taimi faatapulaaina mo le okaina o nei taumafa.

AMATA FAAMAMALU FAASAO ‘MALIE O LE MOANA’

Talu mai le masina o Novema i lona aso sefulu ma le tasi, ua fa’ailoa mai, ua atoatoa i ai aso fa’aletulafono e mautu atili ai le fa’asa ma le fa’asao o Malie o le Moana i gataifale ma ogasami uma e pulea e le Malo o Amerika Samoa, fa’atasi ai ma ogasami e i lalo fo’i o le pulega ma le va’ava’aiga malu a le Malo o le Iunaite Setete o Amerika.

I le taimi na ulua’i fa’ailo mai ai nei aiaiga o tulafono e taofia ai le fagotaina o Malie o le Moana i tatou gataifale, na fa’amalosia fo’i lea e le Fa’atonuga Fa’amalosi a le Kovana Sili, peita’i, e tu’u lava le 60 aso e va’ava’aia toto’a ai pe i ai nisi e sofa’ia le tonu ma le aoga o lea fo’i fa’atonuga tu’usa’o a le Kovana e taofia ai le fagotaina o malie, fa’aaoga ni totoga, pe aofia mai fo’i nei I’a tetele i faiva ua aumaia i totonu o tatou uafu e ala i va’a fagota.

Lea ua fa’amanatu mai e le tama’ita’i Ofisa o le Shark Conservation, Jennifer Sawada, ua mautu nei lea fa’asa, ma o aiaiga uma lava ua mae’a tusia ma fa’amau i le feagaiga sa fa’amalosia e le Fa’atonuga Fa’amalosi a le Kovana Sili o Amerika Samoa, ua mae’a fa’amalosia nei, e afua ia Novema 11, 2012.

Ua fa’afetai mai fo’i Sawada ina ua mafai ona mae’a lelei lea galuega aoga sa ia taumafai i ai, “Ae o le fesoasoani ma le agaga tausoa i tiute sa fa’aalia, e faigata ona galo, fa’afetai tele.”

Ua mautinoa fo’i, e le toe mafai lava ona fa’atula’ia se pisinisi e fa’aaogaina ai ni totoga o Malie pe o latou apaapa e pei sa i ai muamua i totonu o le tatou atunu’u, ua tamau nei e matua fa’asaina lava. I le au faifaiva o le atunu’u, ia utagia, ua le toe mafai nei ona taumafaina le Malie, ae o se tasi lea pagatia i lenei tulafono, ona o le fai’ai malie, o se tasi o matai’ai a le atunu’u.

Ua fa’ailoa mai, e i ai se vaitaimi e mafai fo’i ona tatala mai le i’a e toe fagotaina mo tausami a aiga, ae o le taimi nei, ua matua fa’asaina lava.

Afai o le a maua oe ua e fagotaina le Malie ma fa’aaoga i tausami, e moliga oe i le tulafono ma ua i ai fa’asalaga fa’atulaga mo lea fo’i itu.

tusia: Leua Aiono Frost