TALA O LE VAIFANUA

Inu le Ava Samoa & Pese pe Saunoa Mai

 

Lea ua ese fo’i le kosi lea ua amatalia e le Tisa’s Barefoot Bar i Alega! O le ala fou e fa’aalia ai sou lagona, pe fa’aleleia atili sau taleni pese, ia e o’o atu i le latou i Alega e te fiafia fa’atasi ma i latou, inu sau ‘ava ma maua sou avanoa i le latou mic mo sou lagona fa’aalia, ae salani ai i sau pese e fa’anofo filemu ai ou lagona.

 

“O lenei vaitau ua tatou aga atu i ai, o le vaitau fiafia o le tausaga, ma e tatau fo’i ona i ai ni avanoa lelei, e ono fa’aaogaina e tagata uma mo le fa’aalia mai o latou lagona fiafia, e tatau  i le matou fo’i tautua ona fesoasoani atu.” O se tala ata lea ale tama’ita’i faipisinisi  Tisa Fa’amuli o Alega.

 

O le auaunaga na tatala aloaia i le afiafi o le aso Faraile talu ai, ma ua fa’ailoa mai fo’i, sa to’atele lava fo’i tulafale ma ponao’o o le atunu’u, sa tofusao i le mic i lea fo’i afiafi, ae maise o le ‘ava na sua lava le tanoa mo le fa’amoemoe o i latou na auai.

 

“Ua tele fo’i ona fa’alauiloa atu le inu ‘ava malosi, peita’i, ua faia lea fa’alauiloaga fou, aua e le o se mea leaga le tausami i le ‘ava a le atunu’u, ona o lea fo’i e talimalo le to’atele o aiga i nai aiga masi’i mai i saofa’i ma fa’alavelave fa’aleaganu’u a Samoa, ua talafeagai lava le fa’amoemoe ma lona fo’i kosi fou ua tusia nei.” O se tala ‘ata lea a le tama’ita’i faipisinisi.

 

Vala'au i le 622-7447 pe a e fia iloa atili nei avanoa lelei mo oe!

 

Tamo'ega o le Aso Fa'afetai - Leone High

 

Lea ua toe tapena mai le a'oga maualuga a Leone mo le tamo'ega lenei i tausaga taitasi o le “Turkey Run” e faia i le vaveao o le aso 27 o Novema.

 

Ua fa'ailoa mai e totogia le ta'i $3 a le tamaititi e a'oga ae o nisi o aiga e le o toe a'o'oga ae fia auai, po'o tagata lautele fo'i, e tatau ona totogia lau $5. O le lelei, o lea ua amatalia le lesitala na afua mai le aso 19 Novema ae fa'ato'a tapunia le avanoa e lesitala ma totogia ai lou ulufale i le aso 26 Novema, 2013.

 

O le taimi atofa mo le amatalia o le tamo'ega lea, o le itula e 5:00 i le vaveao ma e fa'atasia uma i le faleta'alo a Leone High mo lea fa'amoemoe a'o le'i amatalia le tu'uga.

 

E fa vaega tetele ua fa'atulaga ai lenei tamo'ega: Tagata Savavali; Tagata Tamomo'e talenia; Tagata fa'ato'a amata ona koleni tamo'e ma Faia'oga ma Fanau A'oga i Leone.

 

O le fa'amoemoe lava, ia mafai ona maua sau fa'amalositino i lea aso, a'o le'i alo atu lou aiga mo le tou tausamiga o le Aso Fa'afetai. Faamalosia loto o fanau a'oga ina ia auai i lenei fo'i fa'amoemoe lelei!

 

Masina Fa'ataua Ai Togafitiga o le Ma'i Suka

 

O lenei fo'i le masina ua fa'alauiloa mai e le poloa'iga fa'alauaitele a le afioga le Kovana, ina ia fa'autagia e le mamalu lautele o le atunu'u, "Ia siakia lou toto pe le ua maua oe i le Ma'i Suka, ma fa'asolo loa ona e fa'autagia togafitiga o lo'o ofoina mai e le Matagaluega o le Soifua Maloloina ma le Maota Gasegase i Faga'alu, e togafitia ai lou ma'i suka."

 

Afai fo'i e le'i maua oe, ia utagia, e fa'afofoga i tima'iga ua ofoina mai e foma'i fa'apitoa mo lenei gasegase ma ona togafitiga, ina ia e le auai i lea lisi, ae ia tausia lelei lou soifua maloloina. Ua maea fa'amaonia i fa'amaumauga, "E to'alua mai le to'atolu o tagata ua ma'i suka, e maliu mai fa'afitauli o lona fatu, po'o se gasegase tau le fatu ua maua ai."

 

Ona o nei fa'amaumauga ogaoga, e tatau ai ona nofouta le atunu'u ina ia faia siakiga o le toto ma ia fesiligia le tulaga o i ai le suka pe le'i maualuga tele. O le gasegase lea, e mafai on a fa'afo'ia pe afai ua fa'ato'a tau amata ona e maua ai. O le tele o le fa'amalositino, ma siakia pea po'o ua toe o'o mai oe i le laina kosi o le vaega o lo'o paleni le pasene o le suka i lou toto, e mafai ona fa'afo'ia ai le tele o ni tau toe togafitiga e te ono o'o i ai pe a fa'atalale pea le va'aia se foma'i mo ni fautuaga aoga e te mulimulita'ia.

 

Ua fa'atulaga aso Lua ma aso Tofi ta'itasi e faia ai lesona aoga i le nofoaga e fa'atalitali ai tagata mo latou talavai i lumafale ane o le Potu Talavai a le Falemai Tele i Faga'alu, e amata i  le itula e 9:00 i le taeao. E tui ai toto e le totogia, ma siakia lelei mo le toto maualuga ma le ma'i suka. A fa'apea e iloga mai ua tau afaina le pasene o le suka i lou toto, maualuga pe maulalo, o le a lapata'ia loa oe ma fa'atulaga sau talavai vave lava!

Comment Here