Ads by Google Ads by Google

Tala o le Vaifanua

TOE FONO LOIA A LE AIGA O HALECK MA LOIA LE INITERIA

O se vaitaimi o lenei masina, ua fa’amoemoe e toe fono ai loia a le Ofisa o le Initeria ma loia a le aiga o Haleck, e tusa ai ma se tagi na fa’aulu e le aiga o Haleck, i le masina o Aperila, i luma o le fa’amasinoga feterale i le laumua i Uasigitone, mo se fa’atagana e mafai ai ona o latu galuea’iina le fanua lea o lo o i Ottoville, ua ta’ua o le Naumati.

O le amataga o lenei vaiaso na fa’aulu ai e le loia a le Initeria, o Michelle Lo, mo ni aso fa’aopoopo e mafai ai ona tu’uina mai sa latou tali e tusa ai ma le tagi a le aiga o Halecks, lea na fa’aulu ia Aperila 5, 2012, ae na fa’ato’a taulimaina e le loia a le Initeria i le aso 10 o Aperila, ae o le 11 o le masina nei, e tatau ona fa’ao’o mai ai sa latou tali.

O lo o talosagaina e loia a le Initeria ia le fa’amasinoga, pe mafai ona fa’ao’o mai le latou tali ae e le’i o’o ia Iulai 11.

O suafa o lo o aofia i le itu tagi, e aofia ai Cathie Haleck-Paala, David Otto Haleck, Ernest Haleck ma Otto Vince Haleck Jr.

O le o lo o fa’asaga i ai le tagi, o le Failautusi o le Interia, o Kenneth L. Salazar.

Ua mafua ona faaulu le tagi a le aiga o Haleck, ona ua fiu e talosaga sa latou pemita e amata ai galuega i le fanua o le Naumati, lea o lo o i Ottoville, ae peita’i, e te’ena lava e le malo o Amerika Samoa.  O le fanua foi lea sa taumafai le malo o Amerika Samoa, i tausaga ua tuana’i, e fa’atau mai mai i le aiga o Haleck.

O lo o finau le aiga o Haleck, tauala atu i le latou tagi, ina ia u’unaia le Ofisa o le Initeria ina ia fa’atonu le malo o Amerika Samoa e fa’atau le fanua mai i le aiga o Haleck, a leai, ona tatalaina mai lea o le fa’atanaga mo pemita e mafai ai ona faia galuega i luga o le fanua.

FA’AMAVAE LOLO MOLIGA MAI I LE DBAS

O le aso 23 o Me, sa tusia ma fa’ao’oina atu ai e le susuga Lolo Letalu Matalasi Moliga, lea na avea ma peresetene o le Faletupe o Atina’e a Amerika Samoa, sana tusi fa’amavae i le ta’ita’ifono o le faletupe, le susuga Malemo L. Tausaga.  Na ta’ua i lea tusi, o le aso 30 o le masina nei, ua fuafua e faamuta ai le tautua a le susuga Lolo, i totonu o le Faletupe.

Na tusia ai fo’i e Lolo ma ia faauluina le suafa o le susuga Jason Betham, e avea ma le peresetene fou o le Faletupe, atoa ai ma le suafa o le faletua ia Iutita Galea’i e avea ma sui peresetene o le faletupe.

O le susuga Lolo, sa avea ma peresetene o le Senate ae e le’i filifilia e avea ma peresetene o le Faletupe.  Ae ona o lona alo atu i kemupeni mo le tofi Kovana i le palota o loma nei, ua fa’apea ona fa’ama’amulu ai Lolo mai i le tofi peresetene o le DBAS.

FA’ATAUTAIA DYWA POLOKALAMA MO FANAU FA’AU’U

“E LELE LE TOLOA AE TOE MA’AU MAI I LE VAI”

O le aso ua fuafua e fa’afoe ai e le Ofisa o Tama’ita’i ma Fanau Talavou (DYWA), ia se polokalama mo fanau talavou uma, na toa’i fa’au’uina mai i a’oga maualuluga, i fa’au’uga na se’i mavae atu, i le Fale Laumei i Utulei.

O lenei polokalama, ua fa’aautuina o le “E lele le Toloa, ae toe ma’au mai i le vai”.  Ma o le fa’amoemoega o lenei polokalama, o le sauniuni o fanau talavou o le teritori, e fetaia’i ma tulaga o le lalolagi, pe a malaga atu i atunu’u i fafo mo le fa’aauauina o a’oa’oga, e pei ona saunoa i ai le sui Faatonusili o le DWYA, le susuga Pa’u Roy T. Ausage.

O i latou ua fa’amoemoe e avea ma fofoga o lenei polokalama, e aofia ai le tama’ita’i foma’i ia Dr. Faofua Faatoafe mai i le Kolisi Tu’ufa’atasi o Amerika Samoa fa’apea le susuga Leiataua Leuga A. Turner, le Fa’atonusili o le DYWA.

O lo o tatalaina le avanoa mo so’o se fanau fa’au’u e fia auai i lenei polokalama ma e amataina i le 7:30 i le taeao nei.

FA’AMANATU LE 114 TAUSAGA TUTO’ATASI O TAGATA FILIPAINA I TOTONU O AMERIKA SAMOA

O le afiafi a taeao, ua fa’amoemoe e fa’ataunu’uina ai se fa’atasiga tele, i le Samoa Sports Center (Bowling Alley) i Tafuna, mo tagata Filipaina o lo o aumau i totonu o Amerika Samoa, e fa’amanatu ai le 114 tausaga talu ona tuto’atasi lo latou malo.

E ui ina o le aso tonu o lenei aso fa’apitoa, o le aso 12 o le masina nei, ae peitai, ua a’e se manatu i tagata Filipaina i totonu o Amerika Samoa, e faia la latou fa’atasiga i le aso a taeao.

E tusa ai ma se fa’asalalauga o lo o i totonu o lenei nusipepa, o lo o ta’ua ai e fa’apea, o nisi o vaega o lenei polokalama taua, e aofia ai se fa’aaliga o tu ma aganu’u Filipaina, e ala i pesepesega ma siva, fa’aaliga taumafa Filipaina fa’apea o latou la’ei.