TAPUNIA FAAVAE FESOASOANI MO TAGATA A’AFIA I LE HIV

Na ripotia e le vaaega faasalalau a le FBC,  le tapunia o se faalapotopotoga ua silia ma le 10 tausaga o fesoasoani i tagata ua a’afia i le faama’i o le HIV, i totonu o le Pasefika, lea e ta’ua o le ‘Pacific Islands Aids Foundation”.

O le mafua’aga o lenei tulaga, ona ua motusia le alagatupe sa faatupeina lenei faalapotopotoga.  Na amata mai lava i le 2009 o taumafai lenei faalapotopotoga e faaitiitia vaega tupe fa’aalu a’o taumafai e faamautu se vaega tupe e fa’aauau ai la latou tautua.

Ae peitai, o le masina o Novema o le tausaga ua tuana’i, na tapunia ai le ofisa autu a lenei faalapotopotoga, i totonu o Suva i Fiti.  O lo o galulue pea le lala i le Atu Kuki ma se fuafuaga, o le a tapunia i le masina fou.

FAATULAGA TUPE TATALA AI TUA SUI KOMESINA CNMI

Ua faatulagaina nei e le faamasinoga ia se tinoitupe e mafai ona tatalaina ai i tua ia le sui Komesina o le Atu Malesala, o Ambrosio Ogumoro, talu ona lokaina ina ua tuuaia i taupulepulega ina ia le samania ia se tasi na avea ma loia sili, i le masina o Aokuso o le tausaga ua tuana’i.

E $10 afe tala Amerika lea na faatulaga e le alii faamasino o faamasinoga maualuga, o David Wiseman, e mafai ona tatala ai i tua ia Ogumoro.

Ina ua toe taliu atu Ogumoro i CNMI mai i sana malaga i Kanata, na ave faapagota ai o ia e leoleo, ma faate’a mai i lana galuega i le Ofisa o Leoleo.

O lo o molia Ogumoro i lona taupulepule e faalavelave i galuega a le malo, faalavelave i se molimau, gaoi ma le faia o amioga e le talafeagai ai ma lona tofi faalemalo.

O le aso 22 o le masina fou ua fuafua e tulai ai Ogumoro i luma o le faamasinogaa.

FAIA SOLO TETE’E TUSITALA NUSIPEPA I NIU KALETONIA

Ua fa’aalia le tete’e o tusitala o le ofisa nusipepa e tasi i Niu Kaletonia, i le faatauina atu o le kamupani i tagata faipisinisi, e ala i lo latou le toe o’o mai i galuega.

O le tausaga ua tuana’i, na faatauina ai e se alii faipisinisi o Bernard Tapie ma le aiga o Hersant ia le nusipepa ta’ua o le “Nouvelles Caledoniennes”, i se tinoitupe e $68 miliona (tupe Amerika).  O lenei nusipepa o lo o salalau ona lala i Falani ma ona teritori.

E ui ina e leai se faamaoniga ae na ta’ua e tusitala le toe faatauina atu o lenei pisinisi e se kamupani faatau taavale, kamupani oloa siiatoa ma se pisinisi inisinia.  O lo o i ai se popolega i le au tusitala i le aafia o a latou aia faaletusitala i nei fesuiaiga.

FAIA ILOILOGA SUI FOFOGA FETALAI A TONGA I LUMA O LE FAAMASINOGA I LE ASO FARAILE

O le Aso Faraile o le vaiaso nei (Aso Tofi i Amerika Samoa nei) ua fuafua e toe tula’i ai le sui Fofoga Fetalai o le Palemene a Tonga, Alii Tu’iha’ateiho, i luma o le faamasinoga ona o moliaga i lona umia faasolitulafono o aupega.

Ae e leai se aso faatulagaina mo se iloiloga e faasaga i le Faipule o Vava’au, Alii Tu’ilakepa, lea o lo o molia i lona umia faasolitulafono o aupega ma pulufana.  O le amataga o le tausaga na toe faaleaogaina ai ni isi o moliaga sa faasaga i lenei alii.

Ua ripotia e le Matangi Tonga e faapea, na molia foi i la’ua nei i le umia o fualaau faasaina ae peitai, na toe faaleaogaina ia moliaga i le masina ua tuana’i.

TOE FAATU NI ISI NOFOAGA E FESOASOANI I LE FAASAGATAU I LE PESI O LE DENGUE FIVA I LE ATU SOLOMONA

E fa ni isi nofoaga faaopoopo ua faatuina i totonu o le a’ai o Honiara i le Atu Solomona, e fesoasoani i le togafitia o gasegase ua a’afia i le faama’i o le dengue fiva, talu ona pesi lenei faama’i i ni nai vaiaso ua tuana’i.

Ua iai nei lenei atunu’u i se va’ava’aiga o atunu’u ua aafia i faalavelave faalenatura faafuase’i ina ia ave le faamuamua a foma’i ma tausima’i ia gasegase ua a’afia i le dengue fiva.

Na ta’ua e le failautusi o le minisita o soifua maloloina, e toalua ni tagata ua maliliu ona o lenei faama’i, ae silia ma le 900 o lo o masalomia o lo o aafia.

Na fa’aalia e Dr. Lester Ross, e to’a 74 ua taofia i le faama’i,a e silia ma le to’a 200 ua faamaonia o lo o aafia i le faama’i.

Source: Radio New Zealand