Ads by Google Ads by Google

Tala o le Pasefika

LORD TU’ILAKEPA - TOLOPO LONA FA’AMASINOGA

Ua fa’ailoa mai se tasi o ali’i maualuga o le Malo o Tonga, Lord Tu'ilakepa, sa avea fo’i ma Fofoga Fetalai o le Maota o le latou Fono Faitulafono, ua molia nei i lona auai i feso’ota’iga ma le aumaia i totonu o le Malo le tele o Fuala’au fa’asaina faatasi ai ma lona umia o ni au’upega malolosi, ae ua fa’ailoa mai, ua tolopoina lona ulua’i iloiloga lea sa fa’atulaga e fa’ataunu’uina i le aso 27 Novema, 2012.

Ua fa’ailoa mai, ona o le augani mai lea ali’i nopele mai Vava’u, ua fa’amatu’u ai le fa’amasinoga le avanoa lea, peita’i e le’i toe fa’atulagaina mai se isi aso mo lea ulua’i iloiloga. Ua fa’ailoa mai e le ali’i Fa’amasino Sili, Sione Sisifa, “Ua mae’a soalaupule le vasega o fa’amasino i le mataupu lenei, ma ua nofo sauni i matou e fa’afofogaina le ulua’i iloiloga o Tu’ilakepa, peita’i, o lea ua toe tolopoina, e ao ina toe faia le matou fonotaga, ma fa’ailoa mai se isi aso mo lea tulaga!”

O le afuaga o lea mataupu, o se fa’ai’uga o su’esu’ega na fa’atautaia e le vasega o ali’i leoleo nana sa malaga mai Ausetalia, na sailia ai le itumalo o Vava’u ma ua molia ai Lord Tu'ilakepa e tusa o se fa’ai’uga o latou su’esu’ega.

O lea sailiga na faia ia Tesema 2, 2010 ma e lima lelei tusi samania na talosagaina e leoleo Ausetalia fa’atasi ai ma leoleo o le Malo o Tonga, ma o se tasi o tusi sa sailia ai le maota ma meatotino a lenei nopele o le malo mai Vava’u.

TOE FA’AFO’I MAI FITI

Ua tula’i mai ua toe mafai nei ona talia e atumotu o le Pasefika e to’a 14 o lo’o auai o totino o le ACP le malo o Fiti e toe fa’aulu atu i totonu o le latou lea sosaiete. O le ACP na fa’atula’ia i Fiti i lona amata mai, peita’i, ina ua tetele fouvalega ma ua fa’aletonu ai le fa’atautaiga o le Malo o Fiti i lalo o sana faigamalo patino, sa fa’ai’ugafonoina ai e tatau ona fa’atula’i ese mai, se’i vagana ua mafaia e Fiti ona toe fa’atautaia lelei sana faigamalo ma’oti.

O le ali’i Palemia o Papua Niu Kini Peter O’Neil sa ia fa’aalia, “O lenei galuega ua mae’a nei, ua faia aua e mo’omia e le ACP ona toe auai mai le malo o Fiti i le mafutaga, e ao ina va’ai toto’a fo’i Fiti i le tele o feutaga’iga ma aiaiga o nisi o mataupu fa’avaomalo e ao ina manino i malo uma o le Pasefika, a’o lei avea se mau e talia ai mo le fa’amalosiga fa’avaomalo.

O le isi lava mea sili ona matagofie i lagona fa’aalia o nei ta’ita’i o le Atu Kuki ma Papua Niu Kini, ona o se latou tala, “Matou te fiafia e fa’ailoa i so’o se atunu’u tetele o le lalolagi, e tasi lava le loto ma le fatu o atu motu uma e to’a14 o le Pasefika. E tutu fa’atasi fo’i i matou i so’o se mataupu matou te pasia ma aiaia e fa’atautaia ai feutaga’iga ma i latou o malo tetele o lalolagi.”

Ua tulata nei le malo Fiti ina ia latou filifilia se latou uluai faigamalo fa’atemokalasi ma ua avea Bainimarama ma sui e ta’ita’ia atu le latou aumalaga lenei ua toe fa’aulu mo se latou nofoa i le fonotaga a le ACP i Papua Niu Kini. O i latou e aofia ai le Failautusi o Fefa’ataua’iga Shaheen Ali ma le minisita o mataupu Tau le Va i Fafo Ratu Inoke Kubuabola.

SAISAITIA TAMALOA - AVE FAAMALOSI TAGATA E TO’ALIMA

E to’alima ni tagata na avea fa’amalosia mai le latou fale i Tofoa e se tamaloa i le po o le aso 20 Novema, 2012, ma ua fa’ailoa mai sa fa’afefe i latou i le fana, gaoia ni mea mai lo latou fale, peita’i, na toe mafai e i latou ona sosola ese mai lea ali’i na avea fa’amalosi i latou.

Ua latou fa’ailoa mai, sa avea i latou mai Tofoa i Tokomololo e le sui na sofa’ia le latou aiga. Sa saisaitia i latou ma ua i lima nei o leoleo se ali’i e 34 tausaga le matua, o se tasi ua masalomia sa ia faia lea solitulafono i lea aiga. Peita’i, o le ta’avale numera C15530, lea e fa’apea na gaoia e le vaega solitulafono o lo’o sa’ilia pea.

saunia: Leua Aiono Frost