Ads by Google Ads by Google

Tala o le Pasefika

3 FASIOTIA-12 MANUNU’A I GUAM

 

Mai GUAM ma le HawaiiNewsNow i Honolulu ua fa’ailoa mai ai e to’atolu ua maliliu ae to’a 11 isi ua manunu’a ina ua fa’alavea e le ave ta’avale lana ta’avale i le ABC Store o le Outrigger Resort, ma oso i fafo, ae amata ona tatui tagata o lana pasese o tagata maimoa mai fafo.

 

Ua fa’ailoa mai e le Guam's Pacific Daily News, o lenei mea na tupu tonu lava i le aso Luana te’a, ma ua saisaitia nei e leoleo le ali’i talavou ave ta’avale ona o lea mea matuia ua tupu mai ua ia faia. O le tala mai a leoleo, e to’alua lava sui na lavevea ai i lea ta’avale na feoti lava i le taimi na o’o atu ai i latou, ae silia ma le vaetolu o i latou, ua i ai pea i le falema’i mo togafitiga.

 

Ua fa’ailoa e le Guam Memorial Hospital i le Leitio Ausetalia, o le to’atele o nei tagata maimoa mai fafo,  O le Sifi Leoleo a Guam Fred Bordallo sa ia fa’ailoa mai, e 14 sui ua afaina i lea fa’alavelave ina ua sofa’i e le ta’avale lea le Faleoloa ABC ma na oso i fafo le ali’i ave ta’avale ma amata loa ona tatui lana pasese.

 

Ua fa’ailoa mai, o le Vaega o Turisi a lea teritori, ua latou fa’aaogaina nisi e fa’amatala upu i le va o le falema’i ma e malaga mai fafo ua a’afia, ma ua taumafai ina ia vave o’o se tala i aiga o i latou nei, ae maise sui ua malilie to’atolu. O le tala ua fa’ailoa ane i le Guams Pacific Daily News, “Na ou va’aia le fetamoea’i o le ave ta’avale, e tatui tagata o taumafai ona malamalama mai ae ua lavea le ta’avale, o i’ina sa amata ai loa ona ou fefe.

 

Taufana le Leoleo o Solasola & le Vaega saili
Mai le Associated Press i Los Angeles ua fa’ailoa mai ai le Leoleo LA o lo’o sola ae o lo’o tausailia nei i le atumauga o San Bernadino e le vasega o leoleo a LA, o le aso ananafi sa faia ai se latou taugafana. Peita’i, sa matua faigata ona tausailia e ta’ifau sosogi tulaga a’ao o lea sui, ona ua toulu tetele mai le sinou po’o le ‘aisa o le tau malulu ua i ai nei lea itu o Amerika.

 

O le tele o nei lipoti, o le a le fa’aalia suafa o ali’i leoleo o lo’o latou tausailia le sui o solasola, ina nei aofia ai ma i latou ma latou aiga i le lisi e fa’atama’ia e lenei ali’i i lona fa’amoemoe o i ai nei, o le fa’alalo uma o i latou, o ona uso a leoleo, sa latou ta’uleagaina lona igoa.

 

O lea ali’i leoleo o Christopher Dorner, sa ia sofa’ia se tasi o fale o se aiga, ma ia saisaitia ai le ulugali’i, ma o se tasi o i la’ua nei na sola ese ma mafai ona ia faia mai se telefoni i le Ofisa o Leoleo, lea ua aga’i ai i atumauga le sailiga. Na sola le ali’i leoleo o sailia i se ta’avale na ia avea fa’amalosi, ma sa faia se taugafana i le taimi na tulia ai lea ta’avale.

 

O le aso Tofi talu ai na maua atu ai lana pikiapu lea ua mae’a fa’apaina i le ogaeleele e fa’aigoaina o le “Big Bear.” O se tasi o ali’i tusitala o le KCAL-TV sa ia fa’alogoina le taugafana lea i le va o e saili ma le sui o solasola, ma sa ia lipotia mai. Ina ua toe lipotia mai le isi ta’avale ua gaoia i San Bernadino i le 12:20pm, o le afuaga lea ua toe fa’atetele ai sailiga i lea fo’i ogaeleele.

 

O le mea ua tupu, o nisi o ali’i leoleo ua osovale tafana se pikiapu ma le manatu o le ta’avale lea o lo’o alu ai tu Dorner i lona aiga i Torrance, ua la’ua tafana sese ai ni tina se to’alua o lo’o fa’atau nusipepa i lea lava pito nu’u.

 

SAISAI E LEOLEO SUI UA MASALOMIA FASIOTI 2 TAGATA - HILO

 

Mai Hilo, HAWAII  ma le “HawaiiNewsNow”  ua fa’ailoa mai ai e leoleo su’esu’e ua latou saisaitia nei se tasi ua masalomia sa ia fasiotia ni tagata se to’alua i le aso Gafua na te’a nei i se fana. Ua ta’ua mai e to’alua fafine nei e maliliu i lea fa’alavelave.

 

E tusa ma le 600 mita mai le Leilani Street sa fa’alogoina ai le papa taso’o mai o pulufana, ma sa lipotia mai e nisi i leoleo ma osofa’i atu ai. E maua atu e leoleo, e to’alua tina ua manunu’a i pulufana o lo’o ta’o’oto mai ma fa’avave loa i la’ua i le falema’i i Hilo Medical Center, lea na latou fa’ailoa mulimuli mai ua maliliu ma nei tina.

 

Ua le mafai e leoleo ona fa’ailoa mai suafa o nei tina, ona se’i mua’i fa’ailoa i o la’ua aiga, ae maise se’i matua mautinoa fo’i o i la’ua nei, ae o lo’o fa’aauau pea su’esu’ega a leoleo, se’ia mautinoa le mafuaga tonu o lea fa’alavelave.

 

O Sean Ivan Masa Matsumoto, 34 tausaga o Hilo, ua i ai nei i le saisaitiaga a leoleo i ona moliga e lua o le fasioti tagata #2. E to’alua fo’i tamaiti laiti sa i ai i le fale i le taimi o lea fa’alavelave, ae le’i afaina i la’ua i le mea na tupu, peita’i, ua tausia fa’apitoa i la’ua e tagata o le latou puiaiga. Ua talosaga mai leoleo ia taofia le so’ona fa’aaoga o le alatele i Hinano ma Manono Streets se’ia mae’a le suesuega.

 

saunia; Leua Aiono Frost