Tala o le Pasefika
FA’AAOGA KOMIPIUTA FEUTAGA’I & TEINEITI - FA’AI’U I FEUSUA’IGA
Ua fa’ailoa mai e le 3NewsNZ le ali’i e 22 tausaga ua mae’a talia e ona moliga o le faiaiga ma teineiti e 12 ma le 15 tausaga le matutua, ae na amatalia atu i ana olega o nei o teineiti i le facebook i luga o le Komipiuta i Aukilani, Niu Sila.
O James McIntosh lea na tula’i i luma o le fa’amasinoga i Waitarake Dsitrict Court ma ia fa’ailoa, e tele na’ua uiga mataga fa’aleituaiga na ia faia i nei teineiti e fa’auia atu i le Initeneti. O lona fa’asalaga ua fa’atulaga nei e le fa’amasinoga lea, e lua tausaga ma le tolu masina i le falepuipui.
Ua talosaga nei le tama’ita’i Fa’amasino, Lisa Tremewan i le pa’ia o Matua uma i Niu Sila, ina ia taumafai e taga’i toto’a i taimi e fa’aaogaina ai e fanau le masini komipiuta ma va’ai i ai po’o ai o feutaga’i ma latou fanau i vaitaimi o le leva o le po.
SU’ESU’E OFISA FEMALAGA’IGA AUSETALIA - TU’UAIGA I FAILA O TAGATA TONGA
O lo ua fa’ailoa mai e le Ofisa o Femalaga’iga a Ausetalia i Canberra, ua latou va’aia toto’a fo’i le fa’aletonu lea ua latou matauina o lo’o ua faia e le Ofisa o Leoleo a le Malo o Tonga. Ua suia e i latou nisi o mea i faila o i latou e fia talosaga mo avanoa e femalaga’i atu ai i Ausetalia ma Niu Sila.
Ua toe iloilo uma lava e i latou le tele o talosaga na mua’i fa’aulu atu ma ulufale atu ai tagata i Ausetalia, pe le o a’afia nisi i nei faiga sa fa’atautaia i totonu o le Ofisa o Leoleo a le Malo o Tonga. O le mea lava lea e tasi o lo’o sailia fo’i i totonu o le ofisa o Femalaga’iga i Niu Sila, ma e to’alua sui maualuluga o le Ofisa o Leoleo a Tonga ua iloiloa nei lo la’ua a’afiaga ma nei faiga sese.
O le a a’afia se tasi e fia ulufale i nei malo pe afai sa i ai sona fa’amasinoga i totonu o Tonga, sa o’o ai ina tulia sona fa’asalaga i le falepuipui mo le umi e silia ma le tausaga atoa. O lea vaega o le tulafono e mafai ai ona e ulufale i nei malo e lua, o le a taofia ai lou fia ulufale e te asiasi pe nofo mau i Ausetalia po’o Niu Sila fo’i.
SALA LE FIJI TIMES - $300,000
Ua fa’ailoa mai le ali’i “Fa’atonu” o le Nusipepa a le Fiji Times ua sala nei i le latou malo i le $300,000. ina ua le usita’ia le poloa’iga a le fa’amasinoga. O le ali’i fa’atonu o lea nusipepa o Fred Wesley. O le fa’atonuga a le fa’amasinoga ina ia totogia e le Fiji Times le $300.000. ae le o le $500,000. sa mana’o i ai le Ofisa o le Loia Sili. Ua fa’apea fo’i ona fa’amaonia le solitulafonoa a le ali’i Fainusipepa o Brian O’Flajerty ma ua fa’asala tupe e $10,000. Ua fa’atulaga mai fo’i le sala a le Fa’atonu o le Fiji Times i le ono masina i le falepuipui ua tu’umamaina mai ai le 2 tausaga e tatau ai ona fa’afalepuipuia o ia.
E ese mai na fa’asalaga ua toe fa’atonuina i la’ua nei ia totogia le ta’i $2,000. i le Ofisa o le Loia Sili. O le tinoitupe lea e $300,000. e tatau ona totogia e le Fiji Times i le Ofisa o le fa’amasinoga i Suva a’o le’i mae’a le 28 aso talu mai lenei aso na tolaulauina ai le fa’asalaga.
O lenei fa’asalaga e mafua i ni fa’amatalaga sa faia aga’i i ni sui o le fa’amasinoga, ma ua fa’aititia ai le tulaga agava’a o le fa’amasinoga maualuga i a latou fa’ai’uga fai.
saunia: Leua Aiono Frost