MAGALO LE ALI’I MA LONA TUAFAFINE NA TA’USALA FASIOTI TAGATA

O le ali’i ma lona tuafafine lea na faasala i le falepuipui mo le 18 tausaga, ina ua tausala i laua i le fasiotiina o le uo teine a lo la Tama, ua avea nei i laua ma tagata sa’oloto, ina ua tatala i tua mai le falepuipui i Florida i laua i le aso Lua na te’a nei. O le ali’i o Curtis Jones, 12 tausaga le matua i le taimi na loka ai o ia i le 1999, ma lona tuafafine o Catherine e 13 tausaga i le taimi na tula’i mai ai le fa’alavelave, ua avea nei i laua ma tagata matutua, i le 29 ma le 30 tausaga i le taimi nei. O Curtis ma Catherine na ta’usala i le moliaga o le fasioti tagata i le tulaga muamua, e mafua mai i le maliu o le uo teine a lo la tama o Sony Speights e 29 tausaga le matua, lea na maua ua maliu i le Cocoa Beach i le 1999. O itu mataina i le tatalaina ai o le ali’i ma lona tuafafine, ona e lea’i se isi o i laua e iloa ave ta’avale, la te le iloa fo’i fa’aaoga fesootaiga faainitaneti, ma, o le a avea le olaga sa’oloto ua la maua o se lu’itau tele mo i laua, i le taumafai lea e fa’amasani i le televave o le olaga ua i ai tupulaga i Ameika i le taimi nei.

TIA’I SE PEPE I LE FALE TAELE

O loo tau sailia nei e leoleo i le atunuu o Saina le tina e ana le pepa tama’ita’i lea na tia’i i totonu o le fale taele i le aso ananafi. E tusa ai ma ripoti mai le vaega fa’asalalau mai fafo o loo taua ai e fa’apea, na logo e aiga tuaoi leoleo mo se fesoasoani, ina ua latou fa’alogoina se pepe o loo tagi mai i totonu o le ipu o le Fale Taele (tulou). Na aga’i atu leoleo ma latou toso mai ai i fafo se pepe tamaita’i o loo ola mai totonu o se ipu o le fale taele mo tamaitai ae ua sola ese lona tina. Na fa’aalia i nei ripoti le ofo o foma’i ma i latou sa molimauina lenei fa’alavelave, ina ua maua mai le pepe o loo ola pea lava. E faitau afe ma afe pepe e maua o taatia’i solo e o latou tina i vaega eseese o le atunuu o Saina i tausaga taitasi, o le mafuaaga fo’i lea na ala ai ona fa’avae e Saina se Faalapotopotoga e gafa ma le tausiaina o pepe e ta’atia’i e o latou tina, ina ia mafai ai ona tausia lelei i latou. O le tele o pepe e masani ona ta’atia’i e latou matua, e a’afia i latou i manaoga fa’apitoa o le tino. E oo mai lava i le taimi nei o loo tau sailia pea e leoleo le tina o le pepe sa maua o tia’i.

MALILIU SUI O LE AIGA O BIN LADEN INA UA PA SE VA’ALELE

E to’atolu sui o le aiga o le ali’i o Osama bin Laden na maliliu i le taeao ananafi, ina ua pau se tama’i va’alele sa malaga ai i le itu i Saute o Enelagi i Peretania. E to’afa i latou sa malaga i le va’alele na maliliu uma, lea e aofia ai sui e to’atolu o le aiga o Osama ma le Pailate o le va’alele. E tusa ai o ripoti o loo taua ai e fa’apea, o sui e to’atolu ua maliliu o le aiga, e aofia ai lona tina, o lona tuafafine, atoa ai ma le to’alua a lona tuafafine. O le lenei faalavelave na tula’i mai ina ua toe fo’i mai se tafaoga a le aiga sa alu i Peretania, ma pau ai loa le va’alele i luga tonu o se nofoaga e fa’atautu’i ai ta’avale i totonu o Enelagi i totonu lava o le taulaga, ma e leai nisi na maliliu ai pe manunu’a e ese mai i tagata e to’afa sa malaga i le va’alele. E pei ona silafia, o le ali’i o Osama na fasiotia e fitafita Amerika i le masina o Me o le 2014, ina ua osofa’i e fitafita le fale sa lafi lilo ai i totonu o Pakisitana.

FA’ASALA LE ATALI’I O MOAMMAR GADHAFI I LE OTI

O le aso Lua na te’a nei na faasala ai i le oti le atali’i o le alii sa avea ma taitai o le malo o Lybia o Moammar Gadhafi, le ali’i o Saif al-Islam Gadhafi faatasi ai ma isi sa latou fai fai mea faatasi, i le mae’a ai lea ona ta’usala o i latou i lo latou fesoasoani i faiga saua ma le le alofa a le ali’i o Gadhafi, e aofia ai ma le fasiotia o tamaiti laiti. O le tausaga e 2013 na pu’e faapagota ai le alii o Saif ma isi sui o le faigamalo a lona tama, ma taofia ai i le falepuipui, peita’i o le vaiaso nei na faatoa faataunuu ai le latou faasalaga o le oti, e ala i le ta sisi o latou ua.