KOLENI FA’A FITAFITA E LE ISIS TAMAITI LAITI

O se tasi o atugaluga tele o ta’ita’i o le malo tele o Amerika atoa ai ma isi atunu’u o malo Aufa’atasi, o le fa’aauau pea lea o le faiga le alofa a le vaega faatupu faalavelave a le ISIS, o le koleni lea o fanau laiti ina ia avea i latou ma fitafita o le taua, atoa ai ma le fa’aa’oa’o o i latou e fa’ataunu’u fa’asalaga i tagata o lo o latou taofia ma ave fa’apagota. I ni ata sa fa’alauiloa e le ISIS i le vaiaso nei, o lo o fa’aalia mai ai le silia i le to’a 200 fanau e i le va o le 10 - 15 tausaga le matutua, o lo o aoaoina i latou i le fa’aaogaina o fana atoa ai ma le faia o osofaiga. I le amataga o le tausaga nei, na faaali mai ai e le ISIS ata o se tamaititi e 12 tausaga le matua na ia tafanaina ni ali’i se to’alua, ae i le masina na te’a nei o Fepuari, sa toe fa’aali mai ai fo’i e le ISIS se ata o se tamaititi e 7 tausaga o lo o ia uuina mai le ulu o se tagata ua uma ona fasioti (tulou). O nei faiga mata’utia e pei ona taua e ta’ita’i o Amerika, o se taumafaiga ina ia fa’atosina atu ai tupulaga laiti e fai ituaiga gaioiga nei e aunoa ma le fefe.

MASALOMIA E FITI VAEGA SPY A NIU SILA

SUVA, FIJI - Ua fa’aalia e le ta’ita’i o le Militeli a le atunu’u o Fiti ia Mosese Tikoitoga e fa’apea, ua iloa e Fiti faiga faalilolilo a le vaega o le GCSB a Niu Sila, i lo latou taumafai lea e ao faanana atu faamatalaga mai atunuu eseese o le Pasefika e aofia ai ma Fiti, ma le fa’amoemoe e auina atu i le malo tele o Amerika. Na taua e Mosese e faapea, na amata spy mai lava le malo o Niu Sila i faamaumauga a le militeli a Fiti i le 2000 e oo mai i le 2006. Na taua e lea ta’ita’i le leai o ni faamaumauga e ono natia e Fiti, e leai fo’i ni fa’amaumauga e ono maua atu i Fiti e fesoasoani ai i ni isi malo i ana gaioiga faa fitafita.

FA’A 202 ONA TEXTS SE ALI’I PAGOTA I SE FAFINE

MANUKAU, NIU SILA - O le ali’i pagota lea na ia texts fa’a 202 i se fafine ina ua fa’atoa magalo mai i le falepuipui, ua toe fa’a falepuipui e le fa’amasinoga maualuga mo le isi 2 tausaga, ina ua fa’amaonia e le fa’amasinoga le moliaga o lona faia lea o ni gaioiga e fa’afefe pe lamatia ai le saogalemu o se isi tagata. O le ali’i o Glenn Green e pei ona taua i ni ripoti mai le RNZI, ua masani lona olaga i le falepuipui, e mafua mai i ituaiga solitulafono e aofia ai le gaoi, talepe fale ma le toso tiene sa ta’usala ai o ia i le tele o tausaga. O le fa’alavelave lea ua toe faasala ai o ia, na mafua mai ina ua ta’u e le fafine i leoleo, ua silia i le 20 tausaga o taumafai pea lenei ali’i e fa’afeso’ota’i atu o ia e ala i le telefoni poo text foi, peita’i e le mana’o i ai o ia.

OSOFA’I E LE AMI NOFOAGA AUTU VAEGA FA’AUPUFAI

ISLAMABAD, PAKISTAN - O fana ma fualaau faasaina na maua e le Ami a le atunu’u o Pakisitana i le aso ananafi, ina ua latou osofaia le nofoaga autu a le vaega fa’aupufai a le faigamalo, ma taofia ai loa ni sui se to’alima o lea vaega fa’aupufai, e aofia ai ma le latou ta’ita’i. O le vaega fa’aupufai a Pakisitana e taua o le “Muttahida Qaumi Movement (MQM), o se tasi o vaega fa’aupufai e sili ona malosi i totonu o le atunu’u, o lo o latou nofoia nofoa e 54 mai nofoa e 130 o le Palemene a lea atunu’u. O se poloaiga mai le Ami e sailia ai le nofoaga autu a le vaega faaupufai, n mafua ai ona osofa’i lea nofoaga ma maua i ai le tele o fualaau faasaina, atoa ai ma fana e le tatau ona i ai. O sui e to’alima ua taofia e le Ami e aofia ai ni faipule se to’atolu ma ni ali’i sinia se to’alua e galulue foi i totonu o le malo.