MANA’O OBAMA E TAU MA LE ISIS

UOSIGITONE - O le fa’aiuga o le vaiaso nei lea ua fa’amoemoe le Fale Pa’epa’e latou te tu’uina atu ai se talosaga tusitusia mai le ali’i peresetene o Amerika i luma o le Fono a le Konekeresi, e talosagaina ai se fa’atanaga mo le faia o se taua ma le vaega fa’atupu fa’alavelave mai Isalama, le ISIS, peita’i o le fesili tele o lo o tula’i mai, fa’amata e pasia e le Konekeresi lea tulafono tau fa’aofi. I vaega o lenei tulafono taufa’aofi, e le gata o lo o talosagaina ai e Obama ma lana faigamalo se fa’atanaga mo se taua ma le ISIS, ae o lo o talosagaina ai tausaga e tolu e fa’atino ai lea taua. O lo o taua ai fo’i i totonu o le tulafono, e le toe i ai ni fitafita o le eleele e mana’omia ai i le taua lea, se’i vagana lava fitafita e aga’i atu mo le fa’asaoina mai o tagata. E foliga mai o lo o manana’o sui o le vaega a le Temokarasi, e le tatau lava ona toe tatalaina le faitoto’a mo se isi taua i totonu o Sasa’e Tutotonu, ae o lo o finau mai fo’i sui o le Republican, e le tatau ona taofia le malosi fa’afitafita a Amerika, pe afai o lo o manaomia la latou pito laau e fa’ato’ilalo ai le vaega fa’atupu fa’alavelave a le ISIS. O lo o fesiligia malosi fo’i e isi sui o le Konekeresi le fa’aiuga sa faia e Obama, ina ia tu’i pomu e va’alele tau a Amerika nofoaga eseese i Suria o lo o pulea ma fa’amautu ai le vaega a le ISIS talu mai le masina o Aokuso, e ui o lea fa’aiuga e le i pasia mai e le Konekeresi, ae na taua e faufautua a le ali’i peresetene, o lea fa’aiuga sa fa’avae mai lea i lalo o fautuaga mai loia a le ali’i peresetene.

FA’ASALA I LE OTI LE AU USO NA TA’ITA’IA LE MAFIA I SAINA

HONG KONG - O le vaiaso nei na fa’ataunu’uina ai le fa’asalaga o le oti fa’asaga i se au uso mai Saina, ina ua fa’amaonia moliaga o le fasioti tagata atoa ai ma le fa’atautaia o le vaega fasioti tagata o le Mafia i totonu o Saina. O le au uso ua faisiotia nei o Han Liu, 48 ona tausaga, o ia lea sa avea ma Ta’ita’i o le vaega sa tauao le Hanlong Group i totonu o Saina, ma lona uso laititi o Wei Liu, 42 tausaga sa fa’auluulu i ai gaioiga uma i totonu o le fa’alapotopotoga. E to’atolu isi ali’i sa fai ma lagolago malosi a Han ma Wei na fa’asala fa’atasi e le malo i le oti, ina ua fa’amaonia lo latou lagolagoina malosi o faiga le alofa sa faia e le au uso. O le tausaga e 2013 na taofia ai e leoleo i Saina i latou nei, ae o le masina o Me 2014 na fa’amaonia ai e le faamasinoga moliaga fa’asaga i le au uso, ma poloaina ai loa le fa’asalaga o le oti. O ni isi gaioiga sa faia e le au uso e aofia ai lo la faatautaia o se pisinisi poka i se tasi o aai i Saina, lea na tosina i ai le afe ma afe o tagata, mulimuli ane taofia fa’amalosi ai le to’atele o tama’ita’i ma faia i ai uiga mataga, ma i’u ina fasiotia uma i latou.

OSOFA’I E LE TAFOLA SE ALI’I A’O FA’ASE’E I LE SAMI

BALLINA, AUSETALIA - E 41 tausaga o se tagatanu’u mai Saina na maliu i luga o se matafaga i Ausetalia i le aso ananafi, ina ua osofa’i o ia e se Tafola tele lava a’o fa’ase’e o ia i luga o galu. E tusa ai o ripoti mai Ausetalia na taua ai e fa’apea, o le ali’i ua maliu e le i leva ona taunu’u i Ausetalia ma nofo mau ai, ona o le agaga e fa’aleleia lana taleni o le fa’ase’e i luga o le galu. O le aso na tula’i mai ai le fa’alavelave sa fa’ase’e ai le ali’i ua maliu ma ni isi o ana uo, ae fa’afuase’i loa ona aga’i ane se Tafola ma osofa’i o ia. Na mafai ona fa’asaoina mai le ali’i mai le taimi na osofa’i ai o ia e le Tafola, peita’i o le tuga o manu’a sa a’afia ai lona tino na i’u ina maliu ai lava o ia i luga o le matafaga.

FA’ATAGA ULUGALI’I ‘GAY’ I LE SETETE O ALABAMA

ALABAMA - Ua avea nei le setete o Alabama ma setete lona 37 i Amerika ua fa’ataga ona faia ai fa’aipoipoga a ulugali’i e ituaiga tutusa, po o ‘gay marriage’, ina ua teena e le Fa’amasinoga Maualuga a lea setete se talsoaga a le malo ina ia fa’ateletelegese sana fa’aiuga e teena ai le faia o nei ituaiga fa’aipoipoga. E ui e to’atele tagatanu’u o lea setete sa fa’aalia lo latou le taliaina o le fa’aiuga, peita’i na taua e le peresetene o le Asosi o Tulafono mo tagata lima vaivai ia Richard Cohen e fa’apea, o se aso fiafia lea mo i latou uma o lo o lagolagoina le fa’aipoipo o tagata tutusa e to’alua, peita’i o se aso fa’anoanoa mo i latou o lo o naunau e fa’amalosia tu ma aga fa’akerisiano i Amerika ma le lalolagi.