SUSUNU OLA E LE ISIS SE ALI’I PAILATE MAI IORITANA

O le vaiaso na te’a nei na susunu ola ai e le vaega fa’atupu fa’alavelave a le ISIS i Suria le ali’i pailate mai Ioritana o Lt. Moath al-Kasasbeh, ina ua tuana’i le taimi na fa’atulaga e le ISIS e tali mai ai le malo o Ioritana i le latou talosaga, ina ia tatala atu i tua a latou pagota e to’alua o lo o loka i totonu o Ioritana o Sajida al-Rishawi ma Ziad Karbouli. Ina ua fa’asalalau e le ISIS i luga o se televise Arapi le susunuina o le ali’i pailate ao ola, na faia ai loa e le Tupu o Ioritana o King Abdullah le fa’aiuga ina ia fasiotia loa Sajida ma Ziad, e ala i le sisi o la ua. O ananafi na fa’asala ai e le malo o Ioritana pagota e to’alua a le ISIS e ala i le sisi o la ua, o se latou tali atu lea i le gaioiga a le ISIS sa fai i le latou pailate.

POPOLE FBI I LE MATA’UTIA O LE MALOSI A LE ISIS

UOSIGITONE - I ni ripoti mai Amerika, ua fa’aalia ai e le Fa’atonu lagolago a le FBI ia Michael Steinbach le aga’i atu ina popole o le FBI, i le tulaga fa’atupulaia o le malosi o le vaega fa’atupu fa’alavelave o le ISIS ua vaaia i le taimi nei, e aofia ai ma lo latou fa’aaoga lea o fanau e amata atu i le 13 tausaga e fai ma latou fitafita i faiga fa’atupu fa’alavelave o lo o latou faia i vaega eseese o le lalolagi i le taimi nei. Na taua e Steinbach i le CNN se tasi o latou popolega, o le fa’aaoga lea e sui o le ISIS o fesootaiga faa initaneti e feso’ota’i mai ai i aiga Amerika e i ai a latou sootaga i tapuaiga Isalama, ina ia tula’i atu e lagolago le faia o osofaiga fa’asaga ia Amerika ma isi atunu’u o le lalolagi. O le fa’amaoniga o lea mau mai le FBI, o ni isi o ali’i Amerika e i ai o latou sootaga i Isalama ua aga’i atu i latou i Suria ma isi atunu’u o lo o malosi ai faiga fa’atupu fa’alavelave, ma auai i osofaiga e faia fa’asaga ia Amerika.

TO’A 183 FA’ASALA I LE OTI I AIKUPITO

CAIRO - E to’a 183 le aofa’i o pagota ua sauni le malo o Aikupito e fa’asala i le oti, ina ua fa’amaonia i le amataga o le vaiaso nei moliaga o le fasioti tagata fa’asaga ia te i latou, e mafua mai i le fa’alavelave lea na latou fasiotia ai ni leoleo se to’a 11 faapea ai tagata savili e to’alua, i se vevesi na tula’i mai ia Aokuso 2013. O lea vevesi na maliliu ai le silia i le 1,000 tagata savili, ae to’a 36 leoleo na feoti ai. O lo o tete’e malosi le Vaega Fa’aupufai e agaia le faigamalo a Aikupito i le fa’asalaga o le oti ua tu’uina mai mo i latou e to’a 183, ona o lo o finau latou e fa’apea, afai ua fa’asala i le oti i latou nei, aisea ua le faia ai ni fa’amasinoga o leoleo sa latou tafanaina tagata savili e silia i le to’a 1,000 na maliliu i le fa’alavelave lava lea e tasi. E to’a 415 isi tagata nu’u lautele na fa’asala i le oti i le tausaga na te’a nei e le malo, ina ua fa’amaonia moliaga o le fasioti tagata fa’asaga i leoleo a le malo.

FANA TAMAITITI 3 TAUSAGA ONA MATUA

NEW MEXICO - E tolu tausaga o se tamaititi mai le aai o Albuquerque i New Mexico na taofia e leoleo i le vaiaso na te’a nei, e mafua mai i le fa’alavelave lea na manunu’a ai ona matua i se fana ina ua ia fa’apa le fana i totonu o le fale. E 4 itula talu ona taofia e leoleo le tamaititi ae toe tatala loa i tua, ina ua mae’a a latou su’esu’ega i le mafua’aga o le fa’alavelave. Na taua i se ripoti a leoleo e fa’apea, o le fana sa i totonu o le ato a le fafine, lea na laga atu e le tamaititi le ato ae maua ai le fana, ona ia uu lea i luga ma fa’apa, ma alu atu ai le pulu lavea ai le sulugatiti o lona tama, ma ati atu ai le pulu ma lavea ai lona tina. E lua aso na togafitia ai le ulugali’i i le falema’i ma toe te’a ai i tua.