Ads by Google Ads by Google

Tala o Faamasinoga

HEPERONI MAOTA

Ua toe tatala i tua mai le toese i Tafuna le alii o Heperoni Maota i lalo o tuutuuga mai le Faamasinoga Maualuga, e ao ona usitai i poloaiga sa tuuina atu e le faamasinoga ia te ia i le taimi na lau ai lona faasalaga.

O Maota na faasala i le toese mo le 28 masina, ina ua tausala o ia i le solitulafono o le talepe fale i le tulaga lua, ona o le faalavelave lea na o latou talepeina ai ma nisi se toafa se faleoloa i Tula i le masina o Aokuso o le tausaga na tea nei, ae na toe tatala i tua i le masina o Mati na tea nei, i le maea ai lea ona ia tuliina o masina e 6 o lana faasalaga.

E tele ni poloaiga sa tuuina atu e le faamasinoga ia Maota e usitai i ai, ao faanofovaavaaia ai o ia mo le 7 tausaga, ma o se tasi o ia poloaiga e aofia ai lona usitaia o tulafono uma a le malo o Amerika Samoa, aua foi nei ona toe soliina se isi tulafono.

Ae o le aso Lua na tea nei na taofia faapagota mai ai e le Ofisa Faanofovaavaaia le ua molia, ona o tuuaiga o le faatupu vevesi i nofoaga faitele, ma tulai ai loa i luma o le faamasinoga maualuga i le taeao ananafi, lea na ia ioeina ai lona soliina o poloaiga o lana faanofovaavaaia.

Ua toe tatalaina nei i lalo o le vaavaaiga a le Ofisa Faanofovaavaaia le ua molia, mo le mataituina lea o lona usitaia uma o poloaiga sa tuuina atu muamua ia te ia.

TOLOPO ULUAI ILOILOGA MATAUPU AAFIA AI NI TAMAITAI

O le aso Lulu o le vaiaso fou lea ua faatulaga e faataunuu ai le ulua’i iloiloga o le mataupu lea o loo tuuaia ai ni tamaitai se toafa mai Fatu ma Futi, ona o le faalavelave lea na tulai mai i le Aso Faafetai na te’a nei, ina ua o latou faaoolima i se isi tamaitai sa auau ma nisi o lona aiga i le sami, e pei ona taua i faamaumauga a le faamasinoga.

O le uluai iloiloga o lenei mataupu na faatulaga e faia i le vaiaso na tea nei, peitai ona o nisi o faamatalaga fou ua maua e loia e aofia ai se ata sa pu’eina e se tasi i le taimi na tupu ai le faalavelave, na mafua ai loa ona toe tolopo lenei iloiloga, ae se’i suesue mae’ae’a e loia le mea moni sa tupu.

O i latou e toafa  o loo tuuaia i lenei mataupu e aofia ai Serrah Mauga, Evelyn Mauga, Le’alai Mauga ma Simaima Mila, lea o loo tuuaia uma i le moliaga mamafa o le faaoolima i le tulaga muamua ma le  faatupu vevesi i nofoaga faitele.

E ta’i $18,000 le tupe na faatulaga e le faamasinoga e totogi ona faatoa mafai lea ona tatala i latou uma nei e toafa mai tua o le toese, ae i le maea ai ona iloilo ma le toto’a e le malo o le ata sa pu’eina, na latou lagolagoina ai loa le talosaga na faaulu e le loia a Evelyn Mauga, ina ia tatala o ia i tua e aunoa ma se e totogi.

Toe toalua o loo taofia pea i le toese i le taimi nei, ae o le isi toatasi ua tatala i tua e faatali ai le aso Lulu o le vaiaso fou lea ua faamoemoe e faataunuu ai le latou uluai iloiloga mo lenei mataupu.

TOAFA TUUAIA I LE FAALAVELAVE NA TULAI MAI LAULII

E toafa ni alii talavou na taofia e leoleo i le aso Lua na tea nei, ona o tuuaiga i lo latou faaoolima lea i le alii lea o loo taofia i le falemai i le taimi nei, ona o manu’aga tuga o loo aafia ai lona tino.

I faamaumauga a le faamasinoga na taua ai, o lenei faalavelave na tulai mai i le afiafi o le aso Lua na tea nei i Laulii, ona o se vevesi na tulai mai i le va o alii e toafa ua tuuaia ma le alii ua manu’a. I faamaumauga a le faamasinoga o loo taua ai, sa onana i latou ua tuuaia i le taimi na tulai mai ai lenei faalavelave.

O i latou e toafa ua tuuaia i lenei faalavelave e aofia ai i latou e toatolu lea na tutulai i luma o le faamasinoga faaitumalo i le taeao ananafi o Taufua Mataese, One Vaisagote ma Kalepo Alfred, ae o Falealii Sagote o loo taofia i le falemai i Fagaalu, ona o se gasegase i lona tino na alia’e mai i le taimi na taofia ai o ia i le toese, ma le mafai ai loa ona tulai i le taeao ananafi.

Ua faamoemoe le malo e tatau ona oo atui le aso Faraile o le vaiaso nei ua maea suesuega o loo faagasolo, ma iloa ai loa moliaga faaopoopo e ono faia faasaga ia i latou nei.