ANGELICA HUDSON

Ua fa’amalumalu e le Fa’amasinoga Maualuga le tu’uina atu o sana fa’asalaga fa’a falepuipui mo Angelica Hudson, ae  ua poloa’ina o ia e na te totogia se salatupe e $2,000 i totonu o le 90 aso.

O Angelica na tu’ua’ia fa’atasi ma lona to’alua o Sene Hudson, i le umia o mariuana, ina ua su’esu’eina e leoleo le la ta’avale ma le fale, i lalo o se poloa’iga mai i le fa’amasinoga, i le masina o Iuni, ma maua ai ni mariuana ma se fana i totonu o le ta’avale na i ai Angelica.

E tusa ai ma fa’amaumauga a le faamasinoga, e laiti vaega o mariuana sa maua i totonu o le talavale, ma o le isi lea itu na fuafua i ai le faasalaga a le faamasinoga.

Na tautino ma loimata Angelica i le fa’amasinoga i le sese o le gaioiga sa ia faia, ma ua ia a’oa’oina foi se lesona taua. Sa ia fa’ato’ese i le faamasinoga, ma ia talosagaina ai se isi avanoa mo ia.

Na faailoa e lana loia o Leslie Cardin i le faamasinoga, o le ta’avale lea na ave e Angelica, o le ta’avale a se tagata o lona aiga, a'o mea sa maua i totonu o mea totino a lana uo.

Ua fa’atonuina fo’i Angelica ina ia aua ne’i ona toe tagofia le ‘ava malosi po o fuala’au fa’asaina ma o le a su’esu’eina lona tino ma ana mea totino i so’o se taimi.

O le vaiaso nei lea ua faamoemoe e lau ai le faasalaga a Sene Hudson i luma o le Faamasinoga Maualuga.

FAAMANU AOKUSO

O le vaiaso nei na fa’atulaga e faia ai le ulua’i iloiloga o le mata’upu a Fa’amanu Aokuso, peita’i na fa’aalia e lana loia o Ruth Risch-Fuatagavi, ua saunia itu e lua mo le faia o se maliliega.  O lea ua fa’atulaga ai le toe tolopoina o lenei mata’upu i le aso 6 o Ianuari, 2012 e fofoga ai lenei maliliega i luma o le fa’amasinoga.

O Aokuso, o se alii fusu mai Samoa na malaga mai i le aufusu a Samoa lea na aumai i le Mosooi ia Oketopa na tea nei, ae alia'e mai ai loa tu’ua’iga e pei ona taofia ai o ia i le to’ese i le taimi nei, ina ua le mafai ona ia totogia le $100,000 lea sa faatulaga e le faamasinoga.

O loo tuuaia Aokuso i le faamalosi teine, faia o uiga mataga fa’afeusuaiga, tagofia o itutinosa o se teineititi, faapea ai ma lona faia o se gaioiga e ono lamatia ai le saogalemu o se fanau e laititi i lalo o le tulafono.

E tusa ai ma fa’amaumauga a le fa’amasinoga o lo o taua ai, o le teineitiiti na a’afia e nofo latalata i le fale lea na api ai le au fusu mai Samoa.

FELETI NIUE

Ua ta’oto atu nei i se fa’aiuga a le Fa’amasinoga Maualuga se talosaga tu’u fa’atasi a loia, i se poloaiga mai le fa’amasinoga e fa’ataga ai ona auina atu le alii o Feleti Niue e fai se su’esu’ega i lona mafaufau, pe a’afia o ia i le gasegase o le mafaufau.

Na fa’ate’ia le ali’i fa’amasino sili, le susuga Michael Kruse, ina ua talosaga loia a itu e lua mo lenei su’esu’ega.  Na ia fesiligia le mafua’aga o lenei su’esu’ega, ae o lea ua ta’usala i le solitulafono ma o lo o fa’anofova’ava’aia i le taimi nei.

Na fa’aalia e Kruse, le i ai o tulafono e fa’avae ai le tu’uina atu o se poloa’iga a le fa’amasinoga, pe afai e le’i tausalaina se tasi.

Na ta’ua e Kruse, e tasi lava le mafua’aga na ala ai ona toe loka Niue i le falepuipui, ina ua le o’o atu i le aso na fa’atulaga ai le iloiloina o lana fa’anofova’ava’aia, ma e le o malamalama foi le fa’amasinoga i le mafua’aga na ala  ai ona le o’o atu.

O le aso 6 Ianuari 2012 lea ua fa’amoemoe e toe val’aau ai lenei mata’upu, ae ua ta’oto atu talosaga a loia se i toe iloilo e le faamasinoga.

O Niue na tausala i le moliaga o lona fesoasoani i lona tama i le umia o mariuana, ma fa’asala ai o ia i le to’ese mo le umi e 20 masina, o se tasi lea o tu’utu’uga o lana fa’anofova’ava’aia e 5 tausaga.

Sa poloaina e le faamasinoga o ia ina ia toe o’o atu i le masina o Oketopa mo le isi ana iloiloga, peitai e lei o’o atu o ia e tusa o lea poloaiga, ma mafua ai loa ona toe taofia o ia i le toese i le taimi nei.