TALA O FAAMASINOGA

MOLIA TAGI TE’O I LE GAOI

 

O le taeao ananafi na tula’i ai i luma o le Faamasinoga Maualuga se tina mai i le afioaga o Lauli’i ona o moliaga o le gaoi ma le ave faagaoi o tupe sa tuuina atu i lalo o lana vaavaaiga, lea e mafai ona faasala ai se tagata i le fitu tausaga i le falepuipui po o se sala tupe e o’o i le $5,000 po o faasalaga uma e lua.

 

E silia ma le $10,000 le tinoitupe ua tu’uaia ai e le malo ia Tagi Te’o i lona ave’esea mai i le kamupani a le CSL, e tusa ai ma faamaumauga a le faamasinoga.  E $10,000 ua mae’a ona faatonu e le faamasinoga e tatau ona totogi e Te’o ona mafai lea ona tatalaina i tua.  O le alii loia ia Michael White o lo o tula’i mo le ua molia.

 

E tusa ai ma faamaumauga a le faamasinoga, o lo o ta’ua ai e faapea, i le aso 13 o Me, 2013 na valaau ai se tagata faigaluega a le CSL i le ofisa a leoleo ma ripotia ai se tasi o a latou tagata faigaluega ua masalomia i le gaoia o se tinoitupe mai i le latou kamupani ma o le alii leoleo ia Jay Vaoalii sa gafa ma le suesueina o lenei mataupu.

 

Na mafai ona faatalanoaina e leoleo ia se tasi o pule o le CSL ma sa ta’ua e lenei tamaitai lona maitauina o le tele o tupe ua to’esea mai i le tusitupe a le kamupani, na o’o lava i le $10,696.31.

 

Na ta’ua e le pule lenei a le CSL, o Te’o sa gafa ma le faatulagaina o totogi a le kamupani ma o ia foi sa gafa ma le aoina o tupe ma le faia o siaki a le kamupani e totogi ai a latou faatauga.  Ma na faailoa foi i leoleo, pe a ma le 10 tausaga talu ona galue Te’o i le CSL.

 

O lo o ta’ua i faamaumauga a le faamasinoga ia le le tutusa o faamaumauga tau tupe a le kamupani ma faamaumauga o tupe o lo o teuina i totonu o tusitupe a le CSL i le faletupe a le ANZ ma le BOH.

 

Na fa’aalia foi e le pule a le CSL i leoleo e faapea, sa ia faia sana lava suesuega ma ia faamaonia ai le tele o se vaegatupe a le kamupini o lo o toesea.

 

O lo o taofi le malo e faapea, o le aso 25 o Aperila, 2013 na faatalanoa ai e le alii leoleo ia Vaoalii ia Te’o a’o iai ma le pule o le CSL ma na faamaonia ai e Te’o lona aveesea o le tupe ma lona faamoemoe e toe totogi.  I le i’uga o lea faatalanoaga, na faate’a ai loa Te’o mai i le CSL.

 

Na fa’ailoa e le pule a le CSL i leoleo e faapea, o le faate’aina o Te’o na mafai ai ona maua i faamaumauga o tala o le tupe a le kamupani le tele o gaioiga sa faia e le ua molia, e nana ai tupe sa ia toesea, e pei o se tinoitupe e $700 na ia gaoia ae e le’i faamaumauina i tusi tupe a le kamupani.

 

E tusa ai ma faamaumauga a le faamasinoga, o lo o ta’ua ai le faamaonia e Te’o lona aveina o se tinoitupe i le va o le $6,000 ma le $8,000.

 

FAASALA SE TAMALOA I LE 20 MASINA I LE FAIA O AMIOGA MATAGA I SONA AFAFINE FAI

 

E le gata i le 20 masina ua faasala ai e le Faamasinoga Maualuga ia se tamaloa i lona faia o ni amioga mataga i sona afafine ae ua faapea foi ona nofo vaavaaia mo le lima tausaga.  O le a le lomia e le Samoa News le igoa o lenei alii ina ia puipuia ai le tamaitai na aafia i lenei mataupu.  Na ulua’i molia lenei tamaloa i faitauga e lua o le faia o amioga mataga taufaamata’u faapea le faaoolima i le tulaga muamua ma le tolu.

 

Ae i se maliliega na faia e lenei alii ma le malo, ua ia ioe ai i le moliaga o le faitauga e tasi o le faia o amioga mataga taufaamatau, o se solitulafono e mafai ona nofosala ai seisi i le lima tausaga i le falepuipui po o se sala tupe e $5,000 ia po o faasalaga e lua.

 

E lima tausaga na faasala ai e le alii faamasino sili lagolago  o Lyle L. Richmond ia le ua molia, ae peitai ua faa...lea faasalaga ae o le a nofovaavaaia mo lea lima tausaga ma se tuutuuga e nofosala i le falepuipui mo le 20 masina.

 

O lo o ta’ua i faamaumauga a le faamasinoga le o’o atu o lenei lipoti i le ofisa a leoeleo ma faatalanoaina ai e leoleo ia le tamaitai na a’afia ma sa ia faamatalaina ai i leoleo leoleo le faafefeina o ia e lona tama fai ina ua i’u ina ma’itaga le teineititi.

 

TALI IOE BENJAMIN AUVEA MA JENSEN SAVE I MOLIAGA O LE GAOI MA LE SAINI PEPELO O NI SIAKI

 

O le aso ananafi na tali ioe ai Benjamin Auvea ma Jensen Save i moliaga o le gaoi ma le saini pepelo o ni siaki, o se vaega o se maliliega ua la faia ma le malo.  O lo o molia nei alii i le faitauga ta’i fa o le gaoi, ma faitauga ta’i fa o le saini pepelo o ni siaki, o ni moliaga e mafai ona faasala ai se tasi i le fitu tausaga po o sala tupe e o’o i le $5,000 ma le $20,000.

 

Ua ioe uma nei alii i fautaiga taitasi o le gaoi ma le siaki pepelo o siaki, ae faaleaogaina isi moliaga.

 

O le aso 26 o Aokuso o le tausaga nei ua fuafua e lau ai le faasalaga o nei alii.

Comment Here