Tala o Faamasinoga
TU’UAIA JENSEN SAVE I LE GAOI MA LE FAIA O FAAMAUMAUGA TAU FAASESE
E fa moliaga o le gaoi atoa ai ma moliaga e fa o le faia o faamaumauga tau faasese ua tuuaia ai e le malo le alii o Jensen Save, ona o le faalavelave na ia sainia faamalosi ai ni siaki se tolu sa ia gaoi mai i se isi tagata ma faaaoga mo ia le tupe sa maua mai ai.
O lo o tuuaia faatasi Save ma Benjamin Auve’a e le malo i lenei mataupu. I faamaumauga a le faamasinoga o lo o taua ai e faapea, e tolu siaki na tala e Save, ae tasi Auve’a.
O le mataupu lenei na tofu atu i leoleo ina ua maitauina e le tina o lo o aafia lana teugatupe i le Faletupe o Hawaii, ua i ai vaega tupe ua aveese mai ai, ma tofia ai loa le tamaitai leoleo ia Fetaui Moeoge e suesueina lenei mataupu.
I faamaumauga a le faamasinoga o lo o taua ai e faapea, i le aso 11 o Ianuari 2013 na faailoa ai e le Faletupe o Hawaii i le tina o lo o aafia, siaki e fa o lo o tusia ai lona igoa ua toe faafo’i atu, ae foliga mai e le o lana tusilima o lo o i luga o siaki uma nei e fa.
A’o faagasolo le suesueina o lenei mataupu, na faailoa ai e le pule o se faleoloa i Kokoland i leoleo e faapea, i se taimi o le masina o Tesema 2012 ma Ianuari 2013, na o atu ai Save ma Auve’a ma ni siaki o lo o tusia ai le igoa o le tagata e ana siaki ma le faamoemoe e tala i lona faleoloa.
O le aso 11 Ianuari 2013 na toe faafo’i atu ai e le Faletupe o Hawaii siaki nei e fa i le faleoloa i Kokoland, ona e le o i ai se tupe i totonu o le teugatupe na saini mai ai siaki nei.
Ina ua fesiligia e leoleo Save ma Auve’a, na la ioeina ai lo la gaoia o le tusi siaki a le tina na aafia, saini faamalosi siaki e fa ae tala i le faleoloa a Li Hong i Kokoland.
O le siaki muamua e $215.03 na tala i le aso 12 o Tesema 2012; o le siaki lona lua e $265.50 na tala i le aso o 29 Tesema 2012, ma le siaki lona tolu e $285.15 na tala i le aso 3 o Ianuari 2013.
O le siaki e tasi na saini e Auve’a ma tala e $135.40, lea na tala i le aso 21 o Tesema 2012.
Ina ua fesiligia e leoleo i laua nei, sa la taua ai e faapea, o tupe na maua mai i siaki nei na faaaoga e faatau ai la meaai ma pia mai le faleoloa a Li Hong.
O lo o taofia pea i le toese i Tafuna Save ma Auve’a ao faagasolo ai taualumaga o le la mataupu.
NOFOVAAVAAIA LUTERU PEDRO MO LE 2 TAUSAGA
E lua tausaga lea ua tuuina atu e le Faamasinoga Maualuga e nofovaavaaia ai le alii o Luteru Pedro, ina ua tausala o ia i moliaga mama e 5 i lalo o se maliliega sa latou sainia ma le malo i le masina o Aperila, e aofia ai moliaga e lua o le faaoolima i le tulaga tolu, lua moliaga o le faaleaga meatotino i le tulaga tolu ma le moliaga e tasi o le faatupu vevesi i nofoaga faitele.
O nei moliaga na afua mai ina ua tatipi i lalo e Pedro ia se togafa’i a se aiga tuaoi, toe faasaga ifo i le faaleaga le tioata o le taavale a leoleo na o atu e loka mai o ia.
Na faatoese Pedro e tusa ai o le solitulafono sa ia faia, ma ia talosagaina ai le faamasinoga ina ia faamagalo o ia ma tuu atu se isi avanoa mo ia. Na talia e alii faamasino lana talosaga ma fautuaga a loia mo se faasalaga mama mo ia, ma manatu ai loa le faamasinoga o le a faamalumalu le tuuina atu o Pedro i le toese mo le lua tausaga, ae o le a nofovaavaaia ai o ia mo le lua tausaga i lalo o poloaiga a le faamasinoga.
O ni isi o poloaiga a le faamasinoga e aofia ai lona totogiina o le salatupe e $500 i totonu o le 6 masina, atoa ai ma lona totogiina o le $1,344.66 mo le tioata o le taavale a leoleo lea na ia faaleagaina i le aso na tulai mai ai le faalavelave.
O i isi poloaiga e aofia ai le faasa ona ia toe tagofia le ava malosi pe na te toe soliina foi se tulafono, a ia avea o ia ma tagatanuu lelei e usiusita’i i tulafono a le malo, ma ia auai i ni aoaoga e faailoa atu ai aafiaga o le ava malosi i lona olaga.
Na taua e le alii faamasino sili lagolago ia Lyle L. Richmond na taulimaina le mataupu a le ua molia e faapea, o Pedro o se tagata e malosi tele i le ava, ae afai e le faaeteete i le soona faaaogaina o le ‘ava malosi, o se isi faalavelave e toe tupu mai i le lumana’i e i’u ina ma’imau atu ai ma lona ola.
Sa taua le ova o le ‘ona o Pedro i le taimi na tulai mai ai le faalavelave i le amataga o le tausaga nei.