LAGA TUI

O le alii talavou mai Pavaiai lea o lo o tu’uaia e le malo i lona fa’aaoga o se aga’ese e fa’ao’o ai manu’a i se isi alii, ua fa’atulaga e le Fa’amasinoga Maualuga le aso 13 Ianuari 2012 e vala’au ai lana ulua’i iloiloga, ina ua ia te’ena moliaga fa’asaga ia te ia.

O le Aso Tofi na fa’atulaga e faia ai le uluai iloiloga a le alii o Laga Tui i luma o le faamasinoga faaitumalo, peitai na malie Tui e tu’u sa’o atu lana mataupu i luma o le faamasinoga maualuga, e fa’atulaga ai se aso e faia ai lana uluai iloiloga.

O lo o tuua’ia Tui i le moliaga mamafa o le fa’ao’olima i le tulaga muamua, ma le moliaga mama o le fa’atupu vevesi i nofoaga faitele.

Na fa’ailoa e le loia fautua a Tui o Leslie Cardin le tete’e o le ua molia i moliaga a le malo, ma talosagaina ai le toe  vala’auina o lenei mata’upu i totonu o le 30 aso, lea foi na talia e le faamasinoga ina ua leai se fa’atui’ese mai le itu a le malo.

O lo o taofia pea Tui i le to’ese e aunoa ma se tupe ua fa’atulaga e le fa’amasinoga e tatala ai o ia i tua, ona o tulaga fa’aletonu i ona pepa nofomau.

IANUALIO LEIATO

O le alii lea na ta’usala i lona umia fa’asolitulafono o ni vaega o le la’au fa’asaina o le mariuana, ua fa’amalumalu e le fa’amasinoga le tu’uina atu o sana fa’asalaga fa’afalepuipui, ae ua fa’anofova’ava’aia mo le 3 tausaga i lalo o poloaiga a le fa’amasinoga.

O nisi o nei poloaiga, e aofia ai le fa’asa ona ia toe tagofia le ‘ava malosi po o fuala’au fa’asaina, fa’asa ona ia toe umia ni a’upega mata’utia, o le a mafai ona su’esu’eina lona tino, o lona fale ma lana ta’avale e se sui o le Ofisa Fa’anofova’ava’aia po o leoleo foi, ina ia mautinoa na te le o toe fa’aaogaina ni fuala’au fa’asaina po o le ava malosi.

O Leiato na ulua’i tu’uaia i lona umia fa’asolitulafono o mariuana, ave ta’avale ‘ona atoa ai ma lona umia o se a’upega, ae i lalo o se maliliega sa ia sainia ma le malo lea foi na talia e le faamasinoga i le aso 8 Novema.

O ia moli’aga na afua mai ina ua taofi e leoleo le ta’avale a le ua molia ina ua masalomia lona ‘ona ma faafoe le taavale, ae maua ai e leoleo i totonu se fana ma se sikaleti mariuana.

Na fa’ato’ese Leiato i le fa’amasinoga e tusa ai o le solitulafono sa ia faia, ma sa ia fa’ailoa i le fa’amasinoga, o aso ia na loka ai o ia i le to’ese, ua ia a’oa’oina ai se lesona aoga mo lona olaga, ina ua ia iloa le leaga o le motusia o le mafutaga ma aiga.

Na ia ta’utino i le faamasinoga, na te le toe soli se isitulafono i le lumanai, pe afai e tu’u atu e le faamasinoga se isi avanoa mo ia.

Na talia e le faamasinoga le talosaga a Leiato atoa ai ma fa’afinauga a loia ina ia fa’anofova’ava’aia le ua molia.

Ua fa’atonuina foi Leiato e na te totogia se salatupe e $2,000, ae afai e na te usita’ia uma poloa’ia ua tu’uina atu ia te ia, o le a mafai ona fa’amalumalu le totogia o lea tupe.

 Ua se’i fo’i e le faamasinoga lona laisene ave taavale mo le 6 masina ma ua fa’atonuina le fa’atama’ia o le fana ma le sikaleti mariuana na maua ia Leiato.

JUNIOR PATEA

O le alii mai Pago Pago lea na ia susunua le pusa lavalava a lona to’alua, ua fa’atulaga e le fa’amasinoga le uluai iloiloga o lana mataupu e valaau i le aso 23 Ianuari 2012, ina ua ia teena le moliaga mamafa o lona susunuina lea o se tafuna’i i le vaiaso na tea nei.

O le moliaga fa’asaga i le alii o Junior Patea na afua mai i se fe’ese’ese’aiga i totonu o lona aiga, ma ia susunua ai lavalava o lona toalua e pei ona taua e le malo, ma avea ai loa ma itu na a’afia atu ai ma le soifua maloloina o ni isi o aiga tuai, ma vili ai loa e aiga nei leoleo mo se fesoasoani.

O lo o te’ena e Patea moliaga fa’asaga ia te ia, ma ua tatalaina nei o ia i tua mai le to’ese i lalo o ni  poloaiga mai le fa’amasinoga e ao ona ia usitai i ai.

O nisi o ia poloaiga e aofia ai le faasa lea ona ia toe soli se tulafono, a ia auai i soo se taimi e valaauina ai lana mataupu i luma o le faamasinoga.