TETE’E JOSEPH IAKOPO I TUUAIGA A LE MALO

O le masina fou lea ua faatulaga e toe fofogaina ai le mataupu a Joseph Iakopo i luma o le Faamasinoga Maualuga ina ua ia teena moliaga o le talepe fale ma le gaoi i le taeao ananafi.  O nei moliaga na afua mai i se faalavelave o lo o tuuaia ai Iakopo i lona ulufale faamalosi i totonu o se faleoloa i Malaeimi ma gaoia pepa faitelefoni ma sikaleti, atoa ai ma se tino i tupe e tusa ma le $800.

O lo o ta’ua i faamaumauga a le faamasinoga le faia e Iakopo o lenei gaoiga ma lana uo o Rodriguez Xavier ia Ianuari o le tausaga nei.  Na manino i luga o masini pu’e ata a le faleoloa ia gaioiga a Xavier ma Iakopo sa faia i totonu o le faleoloa.

Na ioeina e Xavier i leoleo lo la faia o nei gaioiga ma o le amataga  le tausaga nei na tausala ai foi e le faamasinoga le alii o Iakopo i le moliaga mamafa o le gaoi, ona o le faalavelave lea na ia gaoia ai ni oloa tuuaisa mai totonu o se koneteina a le faleoloa o le YSJ i Nuuuli, a’o galue ai i lea faleoloa.

Na taua e Iakopo i leoleo e faapea, o le le sa’o ona fai o lona totogi e le alii pule o le faleoloa, na mafua ai ona ia gaoia oloa nei mai le faleoloa.

O le masina o Mati 2013 na faila ai e le malo le mataupu lenei faasaga ia Iakopo, peitai o le vaiaso na te’a nei na faatoa maua ai o ia, ma tula’i ai loa i luma o le faamasinoga i le Aso Gafua na te’a nei.

E tusa ai ma se saunoaga mai i le komesina o Leoleo sa taua ai e faapea, e 13 mataupu tau talepe fale ma le gaoi o lo o tuuaia ai Iakopo i totonu o masina e fa, ma o le tasi o ia mataupu lea ua tuuaia ai o ia e le malo i le vaiaso nei.

Saunoa le alii komesina o leoleo e faapea, e tusa ma le valu faleoloa  ma aiga e to’alima na osofa’i e le ua molia. O meatotino sa gaoia i nei osofaiga e atoa le $50,000 pe a faatupeina, e aofia ai ma se tinoitupe e $5,000 na gaoia mai i le fale o se Faifeau.

O lo o taofia pea i le toese i Tafuna le ua molia, sei vagana ua totogi le $15,000 ua faatulaga e le faamasinoga ona faatoa mafai lea ona tatala o ia i tua.

MAEA LE RIPOTI A LEOLEO I LE FAAOOLIMA NA TULAI MAI TOTONU TOESE I LE 2012

Ua maea nei ona tuuina atu se ripoti a leoleo e tusa ai ma se faalavelave na tula’i mai ia Novema 26, 2012 i totonu o le toese i Tafuna, lea ua tuuaia ai le alii pagota o Drek Ropati i le faaoolima ia James Barlow, peita’i e le’i failaina i luma o le faamasinoga.

O le aso na soso’o ai na faafesootai ai e Barlow le Ofisa o Leoleo e tusa ai ma lenei faalavelave.  Na taua e Barlow i leoleo e faapea, o le faalavelave na tulai mai i le taimi a’o tu i le laina e faatali le taimi e taele ai, ae faafuase’i ona tuli o ia e Ropati i totonu o lana sela, ae sa fai i ai e manaomia ona taele faalua o ia i le aso mo le inuina o ana fualaau, e pei ona faatonuina ai o ia e lana foma’i.

Na taua e Barlow le tago o Ropoti ma toso o ia i totonu o le sela ma tatu’i ona foliga a’o taatia i lalo, ae o le taimi lea sa ia taumafai ai e faaaoga ona lima e pupuni ai ona mata mai le aafia i gaioiga a Ropati.

E toalua ni alii pagota, o Aperaamo Levi ma Maosi Fualaau, na tulioso atu ma fesoasoani ia Barlow ma tulei ese Ropati.

Na taua e Barlow i leoleo e faapea, ao taumafai Levi ma Fualaau e vaovao Ropati, na toe mamulu atu le ua molia ma folafola atu lona fasiotia o ia pe afai na te ta’uina i se isi le mea sa tupu.

Ina ua fesiligia e leoleo Levi ma Fualaau e tusa ai o lenei mataupu, sa la faamatalaina ai le tala atoa e pei ona taua e Barlow, atoa ai ma lo la vaai lea o tatu’i e Ropati ia Barlow a’o taatia i totonu o le sela, ona la tulioso atu loa lea ma fesoasoani ia te ia.

O le mataupu lenei na laga e le loia a Barlow o Mark Ude i luma o le faamasinoga maualuga i le vaiaso na te’a nei, ina ua faatulaga le isi iloiloga o le mataupu o lo o tuuaia ai Barlow e le malo, ae na taua e le loia a le malo o Julie Pasquale, e le’i oo atu se ripoti a leoleo ia te ia e faatatau i lenei faalavelave.

O Ropati o lo o tuli sona faasalaga faafalepuipui ona o le faalavelave lea na ia fasiotia ai lona uncle i ni tausaga ua mavae atu, a’o taofia ai o ia i le toese i Tafuna, e silia ma le faatolu ona sola ese i tua.

O Barlow o lo o tuuaia i lona faia o ni uiga mataga faasotoma i ni alii talavou se toatolu i le tausaga na te’a nei, ma o lo o ia teena ia tuuaiga faasaga ia te ia.

SAM TUPUOLA

O le aso 21 o Me lea ua toe tolopo i ai le mataupu a Sam Tupuola ma le tuutuuga, e tatau ona oo atu i le aso lea ua maea ona saini sa latou maliliega ma le malo.

O le Aso Gafua na te’a nei na toe tulai ai Tupuola i luma o le Faamasinoga Maualuga mo lana ulua’i iloiloga, peitai na faailoa e lana loia o Leslie Cardin i le faamasinoga e faapea, toeititi lava maea fetuanaiga o lo o faia ma le malo mo se maliliega, atonu e uma ane le isi lua vaiaso ua maea feutanaiga o lo o faia ma sainia loa le maliliega.

O Tupuola o lo o tuuaia faatasi ma lona toalua i le umia faasolitulafono o le pauta faasaina o le aisa, ina ua maua e leoleo ni vaega o le pauta i lo la i Iliili, a’o isi vaega fa’aaoga e ula ai le aisa sa maua i totonu o le taavale a Tupuola.

O lo o taofia pea Tupuola i le toese i Tafuna ina ua le mafai ona totogi le $100,000 na faatulaga e tatala ai o ia i tua.