MOLIA ALESANA UTUONE I LE FAAOOLIMA I LE TULAGA MUAMUA

O le taeao ananafi na faila ai e le malo le moliaga mamafa o le faaoolima i le tulaga muamua atoa ai ma le moliaga mama o le faatupu vevesi i nofoaga faitele faasaga ia Alesana Utuone, ona o le faalavelave lea na manu’a ai se alii i se agaese i Amaua i le vaiaso na te’a nei.

O le taeao ananafi na toa’i tulai ai i luma o le Faamasinoga Faaitumalo ia Utuone ma ua toe tolopo lana mataupu i le faaiuga o le vaiaso nei, lea o le a iloilo ai le taimi ma le aso e faia ai lana ulua’i iloiloga i luma o le faamasinoga.

I faamaumauga a le faamasinoga o lo o taua ai e faapea, na osofa’i e Utuone ia le na a’afia, a’o taumafai le na a’afia e kolosi le alatele.  Na taua e ni molimau i leoleo e faapea, e ui la te le’i vaai i le taimi na faaoolima ai Utuone i le alii na aafia, peitai na la iloa le taimi na tamo’e ese mai ai Utuone ma le agaese i lona lima, a’o le taimi lea na la vaaia ai le ulu o le alii o lo o manu’a o lo o tafe mai ai le toto.

Ina ua fesiligia e leoleo le ua molia e uiga i lenei mataupu, sa ia ioeina lona faaaoga o le agaese e faaoo ai manu’a i le alii na lavea.

E oo mai i le taeao ananafi o lo o i ai pea le na aafia i le potu tigaina i le falemai i Fagaalu, ona o le matuia o le manu’a o lo o aafia ai lona ao.

E $50,000 le tupe lea ua faatulaga e le faamasinoga e totogi ona faatoa mafai lea ona tatala i tua Utuone mai le toese.

TUUAIA NI ALII FAI FAIVA SE TOALUA I LE FAAOOLIMA

E toalua ni alii fai faiva mai le atunuu o Vietnam o lo o taofia i le toese i Tafuna i le taimi nei, ona o tuuaiga i lo la faaoolima i se alii fai faiva e ala i le faaaogaina o se mea maai e pei ona taua i faamaumauga a le faamasinoga.

O lea faalavelave na tulai mai i se inugapia sa faia i le va o alii fai faiva nei i Pago Pago i le Aso Toona’i na te’a nei, ae faai’u ai i le faaoolima o le aualii ua molia i le alii na aafia.

O manu’a o lo o aafia ai le alii na lavea e aofia ai se lavea i luga o lona mata faatasi ai ma lona fatafata, ma o ia manu’a uma sa maua ina ua faaaoga e i laua ua molia se mea maai, lea o lo o masalomia e leoleo o se naifi.

O lo o taofia pea i le falema’i i Fagaalu le alii na aafia ona o le matuia o manu’a o lo o aafia ai o ia, ma o ia foi o le kapeteni o le vaa fagota e fagogota ai le au alii ua molia nei.

I faamaumauga a le faamasinoga o lo o taua ai e faapea, o le inuga na amata mai i le po o le aso Toonai, Aperila 28, 2013 ma faaauau atu ai lava i le vaveao o le aso Sa na sosoo ai, Aperila 29.

Pe tusa o le 2:30 i le vaveao na logoina ai loa e ni aiga e latalata i le nofoaga na tulai mai ai le faalavelave ia leoleo mo se fesoasoani, ina ua latou maitauina le pisapisa o le inugapia, ma e foliga mai o lo o i ai se tagata o lo o manu’a.

Na taunuu le vaega a le EMS ma ofoina atu loa le fesoasoani mo le alii o lo o manu’a ae pisi leoleo i le tau sailiina o i laua sa faatinoina le solitulafono peita’i e le’i maua, ae pe tusa o le 8:30 i le taeao o le aso Sa, na taunuu ai i le vaega o lo o i ai le vaa fagota i laua ua molia, ma logoina ai loa e se sui o le kamupani o lo o faa faigaluegaina leoleo mo sa latou fesoasoani, ma agai atu ai loa leoleo ma taofia faapagota i laua e toalua ua molia nei.

E $2,000 lea ua faatulaga e tatala ai i tua i laua ua molia e faatali ai le aso lea ua fuafua le malo latou te failaina ai moliaga faaopoopo faasaga i alii ua molia.

REUPENA SIAULAIGA

I le toe valaauina ai o le mataupu a Reupena Siaulaiga i luma o le faamasinoga maualuga i le vaiaso na te’a nei, ona o le mataupu sa fia manino i ai le faamasinoga i fualaau faasaina sa tuuaia ai le ua molia, na taua ai e le Taitai o le Vaega a le Vice & Narcotics ia Capt. Paulo Peau Leuma e faapea, o vaega o fulaau faasaina sa maua i le mataupu a Siaulaiga, ua maea ona tuuina atu i Amerika mo le faia i ai o suesuega.

Na faailoa e Capt. Leuma i luma o le faamasinoga le ripoti e faamaonia ai lana molimau.

O le aso Lua na te’a nei na lau ai le faasalaga o Siaulaiga i luma o le faamasinoga, ae poloai ai loa e le faamasinoga le malo ina ia faamanino atu le tulaga ua oo i ai mariuana sa maua i le ua molia.