Ads by Google Ads by Google

Tala o Faamasinoga

IOE FETA’I AULEAFA SA IA UMIA  AISA

 

O le aso 7 o Iuni, 2013 lea ua faatulaga e le Faamasinoga Maualuga e tuuina atu ai le faasalaga o le alii o Feta’i Auleafe, ina ua talia lana tali ioe i le moliaga feololo o lona umia faasolitulafono o se vaega o le pauta faasaina o le aisa, i lalo o se maliliega sa latou sainia ma le malo.

 

Ua tautino Auleafe i luma o le faamasinoga e faapea, i se taimi o le aso 19 o Oketopa 2012 i Tafuna, sa ia umia ai faasolitulafono se tama’i taga pepa iila sa i ai se vaega o le aisa.  Na maua lenei alii ma ana taga pepa iila o i ai le aisa, ina ua aga’i atu leoleo e saili ni tamaitai talavou se toalua (18 ma le 19 tausaga) na taua i se ripoti o lo o inupia ma ni alii i se fale tuufua i Ottoville.

 

Na faamatala e tamaitai nei i leoleo e faapea, na alu atu Auleafe ma piki mai laua i lana taavale. Ao latou i ai i totonu o le taavale, sa la vaaia ia Auleafe ua tago ula lana aisa i luma o laua, ina ua maea, sa ia tuuina atu ia te i laua ma la ula ai foi.

 

Ina ua ia fesiligia e leoleo Auleafe e faatatau i le taga pepa, sa ia taua e faapea, sa ia vaaia se taga pepa o taatiatia i luga o le mutia i le vaega na latou tafafao ai, na ia pikiina ma tuu i totonu o lana taga, e le’i umi ae taunuu atu loa ma leoleo.

 

Ua manatu loia o le a faatali le tuuina atu o ni a laua faafinauga mo se faasalaga o le ua molia, sei maea ona la faitau i se ripoti mai le Ofisa Nofovaavaaia.

 

O lo o taofia pea le ua molia i le toese i Tafuna e faatali ai le aso lea ua faatulaga e lau ai lona faasalaga.

 

O le tamaitai loia fautua ia Leslie Cardin o lo o tulai mo le ua molia, ae o le tamaitai loia ia Kimberly Hyde o lo o tula’i mo le itu a le malo.

 

SAUNI IOANE LOGOVII E TALI IOE I ONA MOLIAGA

 

O le taeao nei lea ua faatulaga e toe faaauau ai le fofogaina o le maliliega aufaatasi ua maea ona sainia e le malo ma le alii o Ioane ‘Upuese’ Logovii.

 

I se maliliega na fofogaina i luma o le faamasinoga i le Aso Faraile na te’a nei, o lo o  talosagaina ai e le malo le faamasinoga ina ia talia suiga ua latou faia i ulua’i moliaga o Logovii. 

 

O Logovii o lo o tuuaia i le moliaga mamafa o le faaoolima i le tulaga muamua ma le moliaga mama o le faatupu vevesi i nofoaga faitele, ae i lalo o le maliliega ua latou sainia ma le malo, o le a ia tali ioe ai i le moliaga muamua lea ua toe teuteu e le malo, ina ia faailoa ai le solitulafono o le faaoolima i le tulaga tolu, atoa ai ma lona tali ioe foi i le moliaga o le faatupu vevesi i nofoaga faitele.

 

O moliaga faasaga ia Logovii na afua mai i le faalavelave lea na tulai mai i Fagatogo i le amataga o le tausaga nei, ina ua ia faaaogaina se tamai naifi e tui ai lima o se alii, atoa ai ma lona taumafai e tau ta tui ona vae e pei ona tuuaia ai o ia e le malo.

 

Na taua e molimau i leoleo e faapea, o le faalavelave na tulai mai ina ua taumafai le ua molia e saili poo ai le tagata na ulufale faamalosi i totonu o lona fale ma gaoi ni isi o mea aoga sa i ai, o lea na ia tuuaia ai loa le alii na manu’a o ia sa gaoiina meatotino mai totonu o lona fale.

 

TETE’E UETI SCHWENKE I TUUAIGA A LE MALO

 

Na teena e le alii o Ueti Schwenke le moliaga o le faaoolima i le tulaga lua o lo o tuuaia ai o ia e le malo, ina ua tulai i luma o le faamasinoga maualuga i le aso Faraile na te’a nei.

 

I lona teena ai o tuuaiga a le malo, ua faatulaga ai loa lana ulua’i iloiloga e faia lea i le aso 20 Me, 2013, o iina lea o le a faaatulaga ai loa le isi laasaga o lana mataupu, i le ono faatulaga lea o se aso e faia ai le faamasinoga autu, poo le faia o se maliliega ma le malo e faamuta ai lenei mataupu pe afai e mafai ai.

 

O le moliaga e pei ona tuuaia ai le ua molia, na afua mai i le faalavelave lea na tulai mai i le fanau o le aiga o Fanene i Nuuuli i ni nai masina e le’i mamao atu, lea na mafua mai i se uta pefu na alu atu ma se loli ma le faamoemoe e sasa’a i tafatafa o le fale o se tasi o aiga, ae tulai mai ai loa le vevesi ina ua taumafai e saili poo fea tonu e tatau ona sasa’a ai le uta pefu, ma faaiu ai loa i le faaaoga e le ua molia o se paipa PVC ma ta ai le ulu o se tasi na aafia i lenei mataupu, e pei ona taua i faamaumauga a le faamasinoga.

 

O lo o tumau pea tuutuuga a le faamasinioga o lo o tatala ai le ua molia i tua, e faatali ai le aso lea ua faatulaga e toe tulai ai luma o le faamasinoga.

 

O le tamaitai loia ia Julie Pasquale na tulai mo le itu a le malo, ae o le alii Loia Fautua ia Douglas Fiau na tula’i mo le ua molia i lenei mataupu.

 

O le afioga i le alii faamasino sili ia Michael Kruse sa faatautaia iloiloga o nei mataupu, i le lagolagosua a afioga i alii faamasino lagolago ia Mamea Sala Jr ma Faamausili Faasua Pomele.