FAATULAGA ASO FAIA AI FAAMASINOGA AUTU JAMES BARLOW

O le aso 18 Novema o le tausaga nei lea ua faatulaga e le Faamasinoga Maualuga e faia ai le faamasinoga autu a James Barlow, ina ua teena e le faamasinoga se talosaga a lana loia o Mark Ude e faasala ai le loia a le malo, i lona le tuuina atu o faamatalaga e faatatau i lenei mataupu.

Na taua e Ude i luma o le faamasinoga e faapea, o le tausaga na te’a nei sa ia talosagaina ai le loia a le malo mo le tuuina atu o faamatalaga e faatatau i lenei mataupu, peitai e oo mai lava i le taimi nei e leai se mea ua tuuina atu.

Ae na taua e le loia a le malo ia Mitzie Jessop e faapea, o le masina o Me o le tausaga na te’a nei na ia tuuina atu ai faamaumauga o lo o moomia e Ude tauala atu i le imeli (email).

O Barlow o lo o tuuaia i lona faia o uiga mataga i ni alii talavou se toatolu, e aofia ai lona faainu o i latou i le ava malosi, faamatamata i ata leaga toe fai i ai gaioiga faafeusuaiga mai latou nei.

O lo o taofia pea i le toese i Tafuna Barlow ina ua le mafai ona ia totogia le $100,000 sa faatulaga e le faamasinoga e tatala ai o ia i tua.

TETE’E ETI PONALI I TUUAIGA A LE MALO

Na teena e le alii o Eti Ponali  tuuaiga a le malo faasaga ia te ia, ina ua tulai i luma o le faamasinoga maualuga i le taeao ananafi ma ua faatulaga ai loa lona ulua’i iloiloga mo le masina fou, lea o le a iloilo ai e le faamasinoga le tulaga tonu e tatau ona oo i ai lana mataupu, i le faia lea o se maliliega ma le malo po o le tuuina atu e faataunuu sona faamasinoga iloilo.

O lo o tuuaia e le malo Ponali i lona faiaiga i se teineititi e 15 tausaga le matua, ma o lo o taofia pea o ia i le toese e aunoa ma se tupe e tatala ai i tua.

TEENA FAAMASINOGA TALOSAGA A SE ALII FAIPISINISI

Ua teena e le faamasinoga maualuga le talosaga na faaulu e le loia o lo o tulai mo se alii faipisinisi, ina ia aua nei aofia ai i molimau o le a tuuina atu e le faamasinoga i le taimi o lana faamasinoga, faamaumauga e faatatau i le suega o le DNA e pei ona faatautaia e le malo.

O le alii faipisinisi o lo o tuuaia i lenei mataupu, o le susuga lea ia Mike Kim, o lo o tuuaia i moliaga o le fesoasoani lea i se isi tagata e faatino le solitulafono o le faamalosi teine; faia o uiga mataga i se tamaitai; faiaiga i se tamaitai e laititi i lalo o le tulafono; taumafai e faaleaga mea molimau a le malo, ma le faia o ni gaioiga e ono lamatia ai le saogalemu o fanau.

ILOILOGA A ALII FAAMASINO I LE TALOSAGA

Na taua e le faamasinoga i lana iloiloga e faapea, o lo o talosaga le ua molia ina ia aua nei faauluina i taimi o le faamasinoga faamaumauga e faatatau i le suega o le DNA, e ala lea i lona le mana’o e tuuina atu le ripoti na saunia e le vaega o le Forensic Analytical Services Inc (FAS).

Fai mai le faamasinoga, e talitonu Kim e vava mamao le ripoti o le DNA lea o le a tuuina mai e le malo, ma tulaga lautele o suesuega faasaienisi.

Sa ia taua foi e faapea, sa i ai ni faafinauga a ni isi o Sainitisi i le moni ma le faamaoni o suega o le DNA, ma avea ai loa faafinauga nei a Saienitisi ma itu na le taliaina ai e le faamasinoga le toe faaaogaina o suega o le DNA i ni tausaga ua mavae.

Fai mai la Kim, e tatau lava i le faamasinoga a Amerika Samoa ona le faaaogaina le ripoti a le DNA e pei ona sauni le malo e tuuina mai, ona o le tulaga e pei ona ia taua, atoa ai ma le ono avea lea o le ripoti ma itu e le malamalama ai le vaega iloilo iuga.

I le faaiuga a le faamasinoga, na siitia mai ai e alii faamasino ni isi o mataupu sa iloilo e le faamasinoga i tausaga ua tuana’i, lea e fesoota’i ma le mataupu e pei ona finauina e Kim.

Fai mai le faamasinoga, sa mafai e le faamasinoga ona talia ripoti e faatatau i suega o le DNA e avea ma mea molimau i ni isi o mataupu ua tuana’i atu, ma e talitonu le faamasinoga, e leai se auala e alaga tatau ai ona le faia e le faamasinoga lena faaiuga i le taimi nei.

E talitonu foi le faamasinoga e faapea, e leai se avanoa o le a le mafai ai e le au iloilo iuga ona le malamalama i molimau e faatatau i suega o le DNA, ma e le taliaina foi e le faamasinoga le faafinauga a Kim fai mai e le malamalama le au iloilo iuga pe afai ae talia suega o le DNA e avea ma molimau i lana mataupu.

O le afioga i le alii faamasino sili lagolago ia Lyle L. Richmond ma Mamea Sala Jr na iloiloina lenei faaiuga.