Ads by Google Ads by Google

Tala o faamasinoga

TUUAIA ETI PONALI FAIA UIGA MATAGA I SE TEINEITITI 15 TAUSAGA

 

Ua taofia nei i le toese, e aunoa ma se tupe faatulagaina e toe tatala ai i tua ia se alii ua molia i moliaga mamafa e fa i lona faiaiga ma se teineititi e 15 tausaga.

 

O lo o ua molia Eti Ponali i le faiaiga ma se teineititi e i lalo ifo ma le 16 tausaga, faia o amioga faasotoma, ma moliaga e lua o le tagofia o itutinosa atoa ai ma le faia o uiga mataga i se tamaitai e le’i faaipoipo i ai, o solitulafono e mafai ona faasala ai se tasi i le toese mo le umi e le silia i le ta’i 5 tausaga.

 

Ua i luma nei o le Faamasinoga Maualuga le mataupu a Ponali ina ua le taunu’u lana ulua’i iloiloga sa fuafua e faia i luma o le Faamasinoga Faaitumalo i le taeao ananafi.

 

O lenei mataupu na tofu atu i le ofisa o leoleo i Fagaitua, ina ua faila e le tama o le teineititi na aafia sana tagi faasaga i le ua molia, i lona faia lea o ni uiga mataga i lona afafine.

 

I faamaumauga a le faamasinoga o lo o taua ai e faapea, pe tusa o le 7:30 na vaaia ai e le tama le tali e lona afafine o le latou telefoni, e le’i umi ae le toe va’aia e le tama lona afafine i totonu o le fale.

 

Na saili solo e le tama i ni isi o latou aiga lona afafine pe le o i ai, ae pe tusa o le tuana’i ai o se itula, sa toe vaaia ai loa e le tama lona afafine ua toe alu atu i le fale, ma ni faailoga i lona ua (love bites).

 

E le’i umi ae alu atu se fafine o le aulotu ma faailoa i le tama o le teineititi, o Ponali na faia uiga mataga i le ua a lona afafine, lea na faafesootai ai loa e le tama ia le ofisa a leoleo.

 

Ina ua fesiligia e leoleo le ua molia, sa ia ioeina lona faia o uiga mataga e pei ona taua i le teineititi na aafia, i le taimi sa la faiaiga ai.

 

EMMANUEL ULBERG

 

Na ulua’i tuuaia Emmanuel Ulberg i le moliaga mamafa o lona taumafai e totogi tupe se tagata faigaluega a le malo, atoa ai ma moliaga mama e tolu e aofia ai le ave taavale ‘ona, ave taavale faatamala, ma le i ai o se ava malosi i totonu o le taavale, ae i lalo o le maliliega lea sa ia sainia ma le malo ma ua talia foi e le faamasinoga, ua ia tali ioe ai i moliaga e lua o lona taumafai e totogi tupe se tagata faigaluega a le malo atoa ai ma le ave taavale ‘ona, ae solofua e le faamasinoga isi moliaga e tolu o lo o totoe ai.

 

Ua manatu loia o le a faatali le tuuina atu o ni a laua faafinauga i le faamasinoga mo se faasalaga o le ua molia, sei faitau muamua i le ripoti a le Ofisa Nofovaavaaia.

 

O le moliaga o le taumafai e totogi tupe se tagata faigaluega a le malo, e mafai ona faasala ai se tasi i le toese mo le umi e le silia i le 5 tausaga, po o se sala tupe e le silia i le $5,000, po o faasalaga uma e lua

 

Ae o le solitulafono o le ave taavale ‘ona, e tasi le tausaga e mafai ona loka ai se tasi i le toese, pe sala tupe e le silia i le $1,000, po o le faasala foi i faasalaga uma ia e lua.

 

O le aso 15 o Aperila 2012 na taofi ai e leoleo le taavale a Ulberg ina ua vaaia le tifa o le alu a le taavale i tafatafa o le stadium i Tafuna.  Ao taumafai le leoleo e faia le suega e iloa ai le malosi o le ‘ava i le tino o le ua molia, o le taimi lea na ia tuuina ai le $100 i le alii leoleo ma fai i ai, e tuu atu se isi avanoa ia te ia ae momoli o ia i le fale.

 

Na toe faafoi e le leoleo le tupe a le ua molia ae taofia loa o ia i lalo o le latou vaavaaiga.

 

O lo o tumau pea tuutuuga a le faamasinoga o lo o tatala ai Ulberg i tua, e faatali ai le lauina o lona faasalaga ia Aperila 25, 2013.

 

SALA McMOORE

 

E ono masina lea ua se’i ai e le Faamasinoga Faaitumalo le laisene ave taavale a Tala McMoore, ina ua faamaonia le solitulafono o le ave taavale ‘ona sa tuuaia ai o ia e le malo. Sa tausalaina foi o ia i le solitulafono o le fealua’i i se taavale ae le o lelei lana laisene ave taavale.

 

E ono masina le umi ua nofovaavaaia ai o ia i lalo o tuutuuga e ao ona ia usita’ia, e aofia ai le faasa ona ia toe tagofia o le ava malosi, e mafai foi e le malo ona faia se suesuega i lona tino i soo se taimi ina ia iloa ai, na te le o toe faaaogaina le ava malosi.

 

O le alii faamasino ia Elvis P. Patea sa taulimaina le mataupu a McMoore.

 

ANDREW PETERS

 

O le taeao nei lea ua faamoemoe e tulai ai i luma o le Faamasinoga Maualuga le alii o Andrew Peters, mo le tuuina atu o sana tali e tusa ai o tuuaiga faasaga ia te ia, ona o le mataupu lea o lo o tuuaia ai o ia i le faaoolima.

 

O ananafi na faatulaga e faia ai le ulua’i iloiloga o lenei mataupu i luma o le alii faamasino ia Elvis P. Patea, peitai e le’i faataunuuina lea iloiloga, ae ua manatu le ua molia e tuu sao atu loa lana mataupu i luma o le faamasinoga maualuga.

 

O le tausaga na tea nei na loka ai Peters ona o tuuaiga i lona gaoia o se telefoni mai totonu o se taxi sa paka i luma o se faleoloa i Pago Pago, ae ina ua o atu leoleo e su’e mai o ia, na sola le alii ma fai ai loa a latou tuliga ma leoleo.

 

I se maliliega na sainia e Peters ma le malo, ua malilie ai le malo e tali ioe le ua molia i le moliaga o le sola ese ma leoleo, ae solofua isi moliaga uma o lo o totoe ai i le pepa o tagi.

 

O le faaiuga o le tausaga na tea nei na magalo ai Peters peitai o lea ua toe tuuaia e le malo ma o lo o taofia pea o ia i le toese i le taimi nei, sei vagana ua totogi le $50,000 ona faatoa mafai lea ona tatala o ia i tua.