TUUAIA XAVIER RODRIQUEZI LE TALEPE FALE MA LE GAOI

Na teena e le alii o Xavier Rodriguez ia moliaga o le talepe fale i le tulaga muamua ma le gaoi, ina ua tula’i i luma o le Faamasinoga Maualuga i le taeao ananafi, ma ua faatulaga ai loa lana ulua’i iloiloga i le aso 4 o Mati.

O Xavier o lo o tuuaia i lo la osofaia ma sana uo se faleoloa i Mesepa i le vaiaso ua tuana’i, ina ua maua e le alii Asia e ana le faleoloa ia ata o nei alii i le masini pu’eata a le faleoloa.  O lo o tau saili pea e leoleo le alii na toalua ma Xavier.

E $10,000 lea ua faatulaga e totogi ona faatoa mafai lea ona tatala Xavier i tua mai le toese.

MANA’O AUKUSITINO FANENE E FAATAUNUU SONA FAAMASINOGA AUTU

O le aso 26 o Aokuso 2013 lea ua faatulaga e le Faamasinoga Maualuga, e faataunuu ai le faamasinoga autu a Aukusitino Fanene, ina ua le mafai ona faia se maliliega aufaatasi e faai’u lelei ai lenei mataupu.

O Fanene o lo o tuuaia i le faaoolima i le tulaga lua ma le faatupu vevesi i nofoaga faitele, ona o se faalavelave lea na tulai mai i Pago Pago i le masina o Novema o le tausaga na te’a nei.

O lea faalavelave na tulai mai ina ua mavana atu le ua molia ma ia maua atu ai le alii na aafia i totonu o lona fale sa loka.

O lo o taofia pea Fanene i le toese i Tafuna e faatali ai le aso e faia ai lona faamasinoga autu.

TETE’E MICHAEL TUI I TUUAIGA A LE MALO

Na teena e le alii o Michael Tui tuuaiga o le faaoolima i le tulaga lua, ina ua tula’i i luma o le Faamasinoga Maualuga i le vaiaso nei.  O lo o molia Tui i lona ta ina o le ulu o se alii i se fagupia.

Na ta’ua i faamaumauga a le faamasinoga e faapea, na tulai mai se faafitauli i le va o le alii ua molia faatasi ma Tui, o Toese Asiata ma ni alii na eva i luma o le fale ta lavalava a Luisa i Iliili.  I le 45 minute talu ona mavae le vevesi lea, ae toe vaaia e le alii na aafia ma ana uo, se taavale ua sosolo atu, ma oso mai ai i fafo  ia Asiata ma toe amata le vevesiga.  Na taumafai ni isi e vaovao le misa, ae faalogoina ai e molimau sa i ai se fagu ua ta’e, ina ua ta e Tui le ulu o le alii na a’afia i le fagupia.

O le masina fou lea ua faatulaga e toe fofogaina ai le mataupu a Tui i luma o le faamasinoga.

SAUNI FEO UTU E TALI IOE I ONA MOLIAGA

O le tina o lo o tuuaia i lona faaaoga o se fasi paipa e sasa ai lona ‘niece’, ua sauni e tuuina atu lana tali ioe i luma o le faamasinoga.

O le faaiuga o le vaiaso nei lea ua toe tolopo i ai le fofogaina o le maliliega a Feo Utu ma le malo, ina ua le faataunuuina i le Aso Faraile o le vaiaso na te’a nei, ona o le pisi o faamasino.

O lo o tuuaia e le malo Utu i moliaga o le faatupu vevesi i nofoaga faitele ma le moliaga mamafa o le faaoolima i le tulaga lua.

O ia moliaga na afua mai ina ua atoa le fa o aso, o fiu le ua molia e faatali lona ‘niece’ e lei toe foi atu i le latou aiga, o lea na ia sasaina ai o ia i le fasi paipa, ae ina ua fesiligia e leoleo le teineitiiti na aafia i le mafuaaga o lona sola ese mai le latou aiga, sa ia taua ai e faapea, o lona fefe tele i lona ‘aunty’, ua ia toe fia foi i ona matua i Samoa peitai e le o i ai ni ona pepa malaga ia te ia.

O lo o tumau pea poloaiga a le faamasinoga o lo o tatala ai Utu i tua, e faatali ai le aso lea ua fatulaga e fofogaina ai la latou maliliega ma le malo.

MOLIA SAININI FOSTER I LE GAOI

O le taeao nei lea ua fuafua e tula’i ai le tamaitai o Sainini Foster i luma o le Faamasinoga Faaitumalo mo le faatulagaina o lona ulua’i iloiloga, i moliaga o le gaoi, ina ua fiu se aiga e faatali se latou keke faaipoipoga sa okaina mai ia Sainini.

I faamaumauga o le faamasinoga o lo o ta’ua ai e faapea, o le aso 15 o Tesema na faaulu ai se tagi a se aiga i le Ofisa o Leoleo, ina ua fiu e faatali le latou keke na totogi ai le $920 ia Sainini.

Na ta’ua e le aiga i leoleo e faapea, na folafola atu Sainini, o le a kiliva atu le latou keke i le aso tonu o le faaipoipoga, peitai, ua o’o i le taimi ua mana’omia ai le keke, ae leai lava se keke, ma na fiu foi le aiga e telefoni i le teine fai keke, ae le tali mai.

O Sainini o se tina e kuka i se tasi o aoga a le malo, ae fai sana pisinisi tao keke, i lalo o le laisene pisinisi a lona tina.

Na faamaonia uma e le ua molia i leoleo tu’ua’iga a le itu tagi ae sa le’i mafai ona ia fa’ailoa le mafuaaga na ala ai ona leai se keke o le faaipoipoga pe aisea foi na le logoina ai le aiga ae e le’i o’o i le aso o le faaipoipoga.

Sa faatulaga e Leoleo ia se aso e feiloai ai le ua molia ma le itu tagi e faamautu ai se auala e toe totogi ai le tupe a le aiga, peitai, na fiu foi e faatali pe faafesotai le ua molia, ae le maua.