MOLIA TUNU LUKI JR I LE TALEPE FALE

E lua moliaga ua molia ai nei le alii o Tunu Luki Jr., lea na osofaia le ofisa o le Matagalueg ao le Soifua Maloloina ia Oketopa 16, 2012 ma gaoia ni mea totino sa i totonu.

O le taeao nei ua fuafua e toe tula’i ai Tunu i luma o le Faamasinoga Faaitumalo, e toe faatulagaina aso o lona ulua’i iloiloga, i ona moliaga e aofia ai le talepe fale ma le gaoi.

O lo o ta’ua i faamaumauga a le faamasinoga, le mauaina atu e se tamaitai faigaluega o le ofisa o le Soifua Maloloina ia le ua molia i totonu o le ofisa.

Na fesili le tamaitai faigaluega i le alii ua molia, po o a ana mea o lo o fai i totonu o le ofisa, ae na tali le ua molia, o lo o faatali lona tina e faigaluega i le Ofisa.

Na taumafai le tamaitai e taofi le ua molia, peitai na sola ese, o lea na faafesootai ai loa leoleo.  A’o taumafai leoleo e saili ia Tunu, sa faailoa i ai e ni tamaiti sa nofonofo i le fale faatali pasi, o le alii e igoa ia Luki o lo o tamo’e atu i le atoa e leai sona mitiafu o faia, na’o lona ofuvae lanumumu o lo o ofu.

E tasi le masina talu ona tupu le faalavelave, ae faato’a maua e leoleo le ua molia.  Sa ia faamaonia i leoleo e faapea, o ia na talepeina le ofisa ae gaoi mea aoga sa i totonu.

E $25,000 le tupe lea ua faatulaga e le faamasinoga e totogi, ona faatoa mafai lea ona tatala le ua molia i tua, ma o le taimi nei, o lo o taofia pea o ia i le toese i Tafuna i le taimi nei.

TEENA LE TALOSAGA A PATI LEPOU MO SONA FAAMASINOGA FOU

Ua teena e le Faamasinoga Maualuga le talosaga a le alii o Pati Lepou po o Vatoi Ching Sam, na faaulu e lana loia fautua o Mark Ude, e talosagaina ai se avanoa e toe fai ai se isi ana faamasinoga fou.

I se vaega o le talosaga na faaulu e Ude sa ia taua ai e faapea, o ni isi o mafuaaga ua talosaga ai le toe faia o se isi faamasinoga fou, e lei mafai e le malo ona faamaonia o Lepou na faatinoina le solitulafono.

E le gata foi i lea, e ui sa taua le faaaoga e alii pagota na sosola, o mata pulepule ae e le’i i ai se molimau na faamaonia ai lea tulaga, e oo lava foi i le malo, latou te le’i tuuina atu ni mata pulepule e fai ma mau faamaonia o lenei mataupu.

O lo o taofi mau Lepou, e mama o ia ma ia moliaga.

O lo o talosaga foi Lepou i le faamasinoga, ina ia toe taga’i i lona faasalaga ina ia tuli faatasi ae le gata i lea, ia toese mai aso ia ua maea ona nofosala ai mai lona faasalaga o lo o tuli nei.

E 20 tausaga le umi o le faasalaga a Lepou, ina ua tausala o ia e se vaega iloilo iuga i le faalavelave lea na o latou sosola ai i tua mai le toese ma ni isi alii pagota se toatolu, ma latou fasia ai le alii leoleopo o le Faletupe o le ANZ i Tafuna i le masina o Ianuari 2010.

E na o Lepou lava na faataunuu lana faamasinoga autu, ae o isi pagota e toatolu na latou sosola faatasi, sa faia ni maliliega ma le malo, o i latou foi ia na molimau mo le malo i le faamasinoga o Lepou, ma o latou tuuaia ai e faapea, o Lepou na faia le tonu latou te sosola i tua ma le toese.

IOE MALIEO MAUI JR I LONA MOLIAGA

O le alii talavou lea na tuuaia i lona ulufale i le fale o se tamaitai i Fogagogo e aunoa ma se faatanaga, ua ia tautino i le Faamasinoga Maualuga, e faamaonia tuuaiga faasaga ia te ia.

Na uluai tuuaia e le malo le alii o Malieo Maui Jr i le moliaga mama o le talepe fale i le tulaga muamua, ae i lalo o le maliliega na sainia e Maui ma ua talia foi e le faamasinoga, ua ia ioeina ai le moliaga feololo o le talepe fale i le tulaga lua, lea na toe teuteu e le malo.

I le tali ioe ai o Maui Jr i le solitulafono lea ua tausala ai o ia, sa ia tautino ai e faapea, i se taimi o le aso 30 Me, 2011, na ia ulufale ai i totonu o le fale o le tamaitai na aafia e aunoa ma se faatanaga.

Na faailoa e le tamaitai na aafia i leoleo e faapea, na ala i luga ina ua ki atu e se tagata se moli uila i ona mata, o lea na ia ee atu ai i le ua molia ma fesili i ai poo a ana mea o lo o fai i totonu o lona fale, e lei tali le ua molia i se upu ae sei vagana ai lona tatala o le faitotoa ma alu i fafo.

Ua sauni loia mo le tuuina atu o a laua faafinauga i le faamasinoga mo se faasalaga mama mo Maui Jr, peitai ua malamalama le ua molia, tusa lava pe finau loia i le faamasinoga mo se faasalaga mama mo ia, e pule le faamasinoga pe talia pe teena ia faafinauga.

Ua ia malamalama foi, e le mafai ona toe suia lana tali ioe ua tuuina atu i le faamasinoga, pe afai e tuuina mai se faaiuga a alii faamasino ae le tusa ai ma lona manao.

O lo o tumau pea poloaiga o lo o tatala ai Maui Jr i tua, e faatali ai le aso 8 Fepuari lea ua faatulaga e lau ai lona faasalaga